Россиянинг Euro-Football.Ru сайти ўз одатига кўра, "Ҳафтанинг энг
қиқзиқарли иборалари” рукнида ортда қолган етти кун ичидаги қизиқарли фикрларни
ёдга олиб ўтди.
Мақоламизни Италиядан бошлаймиз. Охирги пайтларда Апенин ярим оролида тез-тез
мураббийлар алмашинуви юз бермоқда. Шундай экан кундан-кунга аламзада
мутахассислар сони ҳам ортмоқда. Ўтган ҳафтада икки нафар собиқ бош мураббий
"дардларини дастурхон” қилишди.
Испаниялик мутахассис Рафаэль Бенитес "Интер" президенти Массимо Мораттини танқид қилиб чиқди: "Мен
"нерадзуррилар"ни бошқарган пайтимда жамоа иккита совринни қўлга
киритди. Шундай бўлса-да, клуб раҳбарлари мен билан ёмон муносабатда бўлишди.
Моратти жуда кўп хато қилади ва унинг адашишлари жамоага қимматга тушмоқда. Менимча,
"Интер”нинг муаммолари клуб президенти билан боғлиқ. Бу кетишда миланликлар
инқироз кўчасига кириб қолишлари ҳеч гап эмас”.
"Кальяри"нинг собиқ устози Роберто Донадони ҳам журналистлар
билан бўлган мулоқот чоғида ўзини тутиб туролмади: "Мен жамоани қийин
пайтда қабул қилиб олгандим. Кейин клубни оёққа турғаздим. Қолаверса, бу
шаҳарда яшаш оиламга ёқарди. Мухлислар ҳам мени ёқтиришарди. Улар билан кўчада
кўришганимизда мени илиқ кутиб олишмоқда. Бироқ кутилмаганда мени истеъфога
чиқаришди. Клуб президенти Массимо
Челлино барчага ёқишга ҳаракат қилади, футболни яхши тушунади. Аммо у жуда
айёр ва баджаҳл. Ҳалигача тушунмайман мени нима учун ҳайдашганини. Клуб
президенти нима сабабдан истеъфога чиқарилаётганимни тушунтириб ҳам бермади.
Ишдан бўшатишганини менга жамоа бош директори маълум қилди”.
Бир томондан ҳар икки мутахассис ҳам ҳақ. Иккинчи томондан эса...
Ўз навбатида Италия терма жамоаси собиқ бош мураббийларидан бири,
афсонавий Чезари Мальдини "Скуадро Адзурра”нинг ҳозирги устози Пранделли ҳақида
танқидий фикр билдирди.
"Терма жамоа устозининг қарорини тушунмадим. У нима учун Асвальдони
йиғинга таклиф этди. Айни дамда ушбу футболчи у қадар барқарор ўйин намойиш эта
олмаяпти. Ҳозирда Италия терма жамоасига айнан голни ҳис этадиган ҳужумчилар
етишмаяпти. Унинг ўрнига Сандро Матрини олганидан кўпроқ фойда берарди. Умуман
олганда, Пранделлининг қарорлари тушунарсиз бўлмоқда”, деди Мальдинилар
сулоласи катта вакили.
Энди бироз Россияга сайр қиламиз. "Спартак” бош директори Валерий
Карпин ўзини башоратчи ролида синаб кўрди.
"Менинг фикримча, икки уч йилдан кейин легионерлар лимитини олиб
ташалашади. Негаки, бу пайтга бориб ЦСКА ва "Зенит”да ўйнайдиган футболчининг
ўзи қолмайди. Россиялик ўйинчилар нафақага чиқишади. Ўларнинг ўрнини
тўлдирадиган футболчиларни кўрмаяпман. Жамоалар ғалаба қозонмай қўяди. Шунинг
учун лимитни ўзгартиришади”.
Бундан ташқари, якунига етган ҳафтада бирданига бир нечта футболчилар
фаолиятларини якунлаш ҳақида ўйлаётганларини айтиб ўтишди. Улар орасида
"Барселона” сардори Карлес Пуйоль ҳам бор.
" Охирги пайтларда жароҳатлар мени тез-тез безовта қиляпти. Афсуски, бу
муаммоларнинг ечимини топа олмаяпман. Фаолиятимни якунлаш ҳақида ўйласам
тикланишим ҳам қийин бўляпти. Нима қилишга ҳам ҳайронман”, деб кўйинади Карлес.
"Милан”нинг швейиялик узун сочли ва узун бўйли ҳужумчиси Златан
Ибрамовичнинг сўзлари ҳам бўйи бастига монанд бўлди.
"Болалигимда кўпроқ тўп тепиш учун дарслардан қочиб кетардим. Ўша
пайтларда тўғри келган жойда футбол ўйнашдан чарчамасдим. Ҳозир эса вазият
тамоман ўзгарди. Энди ўз имкониятимдан ортиқ тўп тепа олмайман. Ҳаммаси ёшнинг
ўтиб бориши билан боғлиқ. Мен фаолиятимни ғолиб сифатида якунлашни истайман.
Ростини айтсам, ҳозирданоқ нафақага чиқиш ниятим йўқ. Аммо юқори чўққида
бутсамни михга илишни мақсад қилганман. Бугунги кунга келиб ўзимни анча эҳтиёт
қиладиган бўлиб қолдим. Илгаригидек рақиблар билан ҳадеб тўқнашвермайман. Ўйинга ҳам олдинги каби тайёргарлик
кўрмаяпман. Мен фақат ўз ишимни бажаряпман, холос. Бу ҳаётий қонунлардан бири,
деб ҳисоблайман, - деди Златан.
Бахтимизга ҳамма фархийлар ҳам нафақага чиқишни исташмайди. Бунга
яқинда 35 ёшни қарши олган, "Рома” афсоналаридан бири Франческо Тотти мисол
бўла олади. "Император” яқинда журналистларнинг яна беш йил футбол ўйнашга
кучингиз етадими, деган саволларига қуйидагича жавоб қайтарди.
"Нега қисқа фурсатни айтяпсиз. Билмадим, менинг кучим етгунича
футболдан завқ оламан. Балки бу беш олти йил бўлар. Эҳтимол ўн йилга чўзилар.
Эртага нима бўлишини ҳеч ким билмайди”. Тоттининг сўзлари кишини хурсанд этади.
Бироқ унинг ўзига бир хил савияда тўп суриш насиб этармикан?
Мақоламиз охирида яна бир тўпурар ҳақида гаплашамиз. Айни дамда у ҳам
сиёсатчи, ҳам ёзувчи. Тўғри топдингиз, бу Ромарио. Бразилиялик мазкур ҳужумчи
футбол тарихидаги ўз ўрнини топишга ҳаракат қилди.
"Футбол тарихидаги энг кучли футболчи ким? Бу саволнинг жавоби оддий. Албатта бу Пеле. Кучли учлик
эса қуйидагича кўриниш олган – Пеле, Ромарио ва Марадона. Футбол қиролидан
кейин мен тураман. Негаки, мен Марадонгадан кўра, кўпроқ ютуқларга эришдим.
Кўпроқ гол киритдим. Буни муҳокама қилишга ҳожат йўқ”,- деди бразилиялик собиқ
футболчи. Футгол газетаси
Аброр
Деҳқонов тайёрлади
| 
