"Челси”нинг Чемпионлар лигасидаги йирик ғалабасидан кейин кўплаб
журналистлар "Аристократлар”нинг сербиялик ҳимоячиси Бронислав Ивановичдан
интервью олишди. Булар орасида "Спорт Экспресс” нашри мухбири ҳам бор эди.
Россиялик ҳамкасбимиз "Локомотив”нинг собиқ ўйинчисини узоқ кутди.
- Бронислав ростини айтинг,
рус тилини унутиб юбормаяпсизми? Ҳар ҳолда сиз билан гаплашиб турадиган Юрий
Жирков энди бошқа жамоада ўйнаяпти.
- Яширмайман рус тилида жонли гаплашишни жуда қумсаб қолдим. Машғулот
жараёнида, базада бу нарса етишмаяпти. Жирков билан телефон орқали тез-тез
гаплашиб турибман. У билан муносабатларимиз яхши.
- Юрий билан гаплашганимизда
у "Челси” ва Англия премьер лигасини соғинмаётганини айтди.
- Биласизми, Жирковда Россияга қайтиш иштиёқи кучли эди. Шунинг учун
ватанидан таклиф бўлганида жон деб уни қабул қилди ва унинг қарорини тўғри деб
ҳисоблайман. Бундан ташқари, Юрийнинг
оиласи ҳам Россияга кўчиб ўтишни истаётганди. Айни дамда унинг ўйинларини
кўзатиб боряпман. Унга омад тилайман.
Ўзимга келсак, ҳали Сербияга қайтиш ниятим йўқ. Лекин ҳар доим туғилиб
ўсган мамлакатимдан таклифлар бўлиб турибди.
- Яқинда Николя Анелька
"Анжи” томонидан юборилган таклифни ўрганиб чиқаётганини матбуотда маълум
қилди. Умуман олганда, Жирков кетганидан кейин бу мавзу жуда машҳур бўлиб кетдими?
- Ўйлашимча, "Анжи” дунё бўйлаб
яхшгина ном қозонди. Ҳозир ҳамма у жамоада ўйнашни хоҳламоқда. Афсуски, кўплаб
футболчилар пул учун шу йўлни танлашмоқда. Жамоаларга янги хўжайинларнинг
келиши одат тусига айланмоқда. Миллиардерлар клубни сотиб олишгач, катта маблағ
эвазига ютуқларга эришишни мақсад қилишган. Ўз навбатида футболчилар ҳам катта
пул ишлаб топишмоқда.
- Собиқ жамоанинг
"Локомотив” ўйинларини кўзатиб боряпсизми?
Жамоанинг бирор бир футболчиси билан мулоқотда бўляпсизми?
- "Локо”нинг ҳозирги футболчилари билан гаплашмадим. Лекин собиқ
жамоадошларим билан кўришиб турибмиз. Масалан, ҳозиргина Билялетдинов билан
учрашдим. Баъзан "Локомотив”нинг ўйинларни кўраяпман. Ҳар доим шу жамоага
мухлислик қиламан.
- Бугун сиз мавсумдаги
голлар ҳисобини очдингиз. Андре Виллаш-Боаш
ёки клуб раҳбарларидан бирортаси сизни табрикладими?
- Йўқ. Бош мураббиймиз ҳеч кимни алоҳида табрикламайди. Шунчаки,
бугунги ғалаба учун ҳаммага миннатдорчилик изҳор қилди. Биз уч ўйиндан кейин
етти очко жамғардик. Айнан мана шу нарсадан португалиялик мутахассис хурсанд.
- "Челси”га Андре Виллаш-Боаш келгач, жамоа бошқачароқ
ўйин намойиш этмоқда. Бу Карло Анчелотти давридаги футболдан тамоман фарқ
қилади?
- Бўлиши мумкин, лекин хулоса
чиқаришга шошилманг. Тан оламан, биз айрим нарсаларни ўзгартирди. Бу эса бизга
фойда беряпти.
- Италиялик мутахассис
"Челси” билан икки марта олтин медални қўлга киритганига қарамай, уни истеъфога
чиқаришди. Бу сизни ажаблантирмадими?
- Бу саволни менга эмас клуб раҳбарларига берганингиз маъқул.
- Андре Виллаш-Боаш устози
Жозе Моуриньонинг натижаларини қайтаришга қодирми?
- Бунга ҳам аниқ жавоб айта олмайман. Сабаби, Моуриньо "Челси”да
ишлаганида мен йўқ эдим. Шунинг учун икки португалиялик мутахассиснинг ишини
таққослай олмайман. Ҳаммасини вақтнинг ҳукмига қолдирган афзал.
- Келинг, мавзуни бироз
ўзгартирамиз. Сербия терма жамоаси нега Европа чемпионати саралаш босқичда
муваффақиятли иштирок эта олмади?
- Буни изоҳлаб беришим қийин. Биз ҳозир оғир дамларни бошдан
ўтказаяпмиз. Навбатдаги саралаш баҳсларигача руҳан тетик бўлимиз зарур. Акс
ҳолда...
- Терма жамоанинг асосйи
ўйинчилари Неманья Видич ва Деян Станковичлар халқаро фаолиятиларини
якунлашганини маълум қилишди.
- Ҳаммаси кайфиятга боғлиқ. Умид қиламанки, вақт ўтиши билан иккиси ҳам
яна терма жамоага қайтади.
- Сиз ҳам терма жамоадан
кетишни режалаштирмаяпсизми?
- Асло. Сербия бош жамоаси
сафида насиб бўлса, ЖЧ-2014 да ўйнамоқчиман.
- Европа чемпионатида
иштирок этадиган Россия терма жамоасидан нималарни кутаяпсиз?
- Сербия қитъа биринчилигига бора олмагач, биз ҳаммамиз русларга
мухлислик қиламиз. Ўз навбатида мен Россия термасига омад тилайман. Россия 2008
йилги Европа чемпионатидаги натижани яхшилашга интилиши бор гап. Бунинг учун
русларда яхши имконият бор. Адвокат жамоасида кучли ўйинчилар тўпланган. Лекин
ёзда россияликлар осон бўлмаслиги аниқ.
Аброр
Деҳқонов тайёрлади
| 
