Euro-Football.Ru сайти одатига кўра, якунига етган ҳафтанинг "Энг қизиқарли ибора”ларини тўплашга эришди. Ушбу рукннинг бу галги меҳмонлари Дель Пьеро, Пеле ва Гаскойнлар бўлишди.  

Мақоламизни яна Италиядан бошлаймиз. Ўтган ҳафтда Апенин ярим оролида Алессандро Дель Пьеронинг футбол билан хайрлашиши ҳақида кўп гапирилди.

Энг қизиғи,  "Ювентус” клуби президенти  Андреа Аньелли ҳам Алекснинг футболдан кетиши ҳақида маълум қилди.

"Шуни айтишим жоизки, жамоамиз сардори Алессандро Дель Пьеро "Юве” сафида ўзининг охирги мавсумини ўтказмоқда. Гарчи унинг ўзи буни хоҳламаса ҳам у билан хайрлашамиз”.

Таъкидлаш керакки, Дель Пьеро бутун фаолияти давомида фақат "Ювентус” клуби шарафини ҳимоя қилди. 2006 йилги можаролардан кейин ҳам у "Кекса сеньора”дан кетишини истамади. Алекс 1992 йилда "Ювентус”даги деюбт учрашувини ўтказганди. Бу давр оралиғида у туринликлар таркибида 682 та ўйинда майдонга тушиб, рақиблар дарвозасини 285 марта аниқ нишонга олган.

Тан олиш лозим, "Ювентус”нинг кўплаб совринларни қўлга киритишида Дель Пьеронинг хизматлари беқиёс бўлган. Энди эса ундан осонгина воз кечишмоқда.

Айнан мана шу нарса Лучано Моджининг жаҳлини чиқаргани боис, "Ювентус”нинг собиқ директори Андреа Аньеллини танқид қилиб чиқди.

"Ростини айтсам, Аньеллининг баёнотига тушунмадим. Агар Дель Пьеро  майдонда бўлса ҳар қандай рақиб таҳликага тушади. Аминманки, ҳозир ҳам унинг жамоага бераётгани ёрдами беқиёсдир. Клуб раҳбарларининг март ойидаги қарорларини тўғри қабул қилгандим. Негаки, ушанда Алекс ўйинида пасайиш кўзга ташланаётганди. Ҳозир эса унинг ҳолати аъло даражада. Андреа Аньеллининг билиб – билмай айтган гапи 37 ёшли футболчига оғир ботиши турган гап. Агар унинг кайфияти бўзилса бутун жамоа ўйинига таъсир этиши мумкин. Менимча, бу нарса ҳозир "Юве”га асло керак эмас. Жамоада Алекснинг ҳурмати анча баланд. Шунинг учун унга қилинган беҳурматлик барчага ёқмаслиги турган гап”- дейди "Ювентус”нинг собиқ директори.

Сандронинг кетиши ҳақидаги гап-сўзлар дарҳол овоза бўлиб кетди. Маълумотларга қараганда, Дель Пьеро кейинги мавсумни АҚШ ёки Қатарда бошлаши мумкин.

"Бир ҳақиқатни айтаман, Дель Пьеро кетгач, "Ювентус”нинг даври ҳам поёнига етади. "Бьянконерилар" яна ҳозиргидек қудратга эга бўлишларига ишонмайман.

Йигирма йилдан бери Дель Пьеро билан тўқнаш келамиз. У бутун умрини "Ювентус”га бағишлади. Унинг кетаётганини эшитиб, кўнглим оғриди. Аслида Алекснинг ҳурматини жойига қўйишлари керак эди. Менимча, у бошқа жамоада ҳам юқори савияда ўйнай олади”,- дейди Франческо Тотти.

Мадриднинг "Атлетико” клуби ярим ҳимоячиси Диего Рибаса Да Куньянинг гаплари ҳам қизиқарли бўлди. Бу футболчи бир пайтлар "Ювентус” шарафини ҳимоя қилган.

"Ювентус” раҳбарлари сабрли бўлишлари керак. Жамоа ҳар доим ғалаба қозонишни истайди. Бироқ айрим ҳолларда бу ишни уддалашнинг иложи бўлмайди. Ахир ҳаётда ҳамиша биз айтганимиздек бўлмайди-ку. Аммо улар на ўйинчиларга, на мураббийларга имкон беришмайди. Ўз вақтида менга шундай хиёнат қилишганди. Умид қиламанки, бу ҳолат Антонио Конте билан такрорланмайди”,- дейди Да Кунья.

Ўзининг хурмача қилиқлари билан донг таратган англиялик собиқ футболчи Пол Гаскойн навбатдаги марта қизиқарли баёнот билан чиқди. Британиядаги клиникаларнинг бирида даволанаётган собиқ ҳужумчи қўйидаги сўзлари айтди.

"Гоҳида ўзимга шундай савол бераман. Агар мен йигирма йилдан кейин туғилганимда нима бўларди. Ишончим комилки, ўшанда ҳам футбол ўйнардим. Лекин қайси жамоа шарафини ҳимоя қилишимни аниқ билмайман. Бироқ шуниси маълумки, кўплаб муаммоларимдан халос бўлардим. Ҳозирги ўйинчиларда бўш вақтининг ўзи бўлмаяпти. Деярли уч кунда битта ўйин ўтказилади. Бундан ташқари, реклама ва бошқа соҳалардан кўпроқ пул топиш керак. Хуллас, вақт жуда тиғиз.  Кимдан ким ичкиликка берилдими, тамом деяверинг. Буни тўғри тушунаман. Мен бир вақтнинг ўзида ҳам тўп тепардим, ҳам барда пиво ичардим. Кўпчилик бунинг учун менга мухлислик қиларди. Бугунги кунда эса бу номер ўтмайди. Фақат туғилишга бироз шошилганимдан афсусланаман. Ҳар доим даволанишга келганимда шу ҳақида ўйлайман”, деб нолимоқда Гаскойн.

Мақоламиз охирида футбол қироли  - Пеле ҳақида гаплашамиз. Маълумки, ХХ асрнинг энг яхши футболчиларидан бирининг башорати ҳеч қачон тўғри чиқмаган. Шундай бўлса-да, Пеле бўлажак мундиал ҳақидаги тахминлари билан ўртоқлашди.

"Менинг фикримча, 2014 йилда Бразилияда бўлиб ўтадиган навбатдаги Жаҳон чемпионатида олтин медал мезбонларга насиб этади. Тўғри башорат қилишга ҳали анча эрта. Бироқ, Менезеснинг иш жараёни бир пайтлар муниалда ғалаба қозонган мураббийларникига ўхшаб кетяпти. Унинг ишига сидқидилдан ёндошаётгани таҳсинга сазовор. Бундан ташқари, Бразилияда янги авлод футболчилари етишиб чиқмоқда. Неймар, Пьязон, Гансо, Лукас Лейва, Невес ва Давид Луислар юқори савияда ўйин намойиш этишмоқда. Қолаверса, ўз майдонингда деворлар ҳам ёрдам беради, дейишади.

Мессими? Бу футболчи аллақачон Жаҳон кубогини қўлга киритиши лозим эди. Бразилияда Лео каби юлдузлар ҳам бош совринсиз қолишади”, - деди футбол қироли.

Аброр Деҳқонов тайёрлади