Европа Чемпионлар лигасининг "Бавария” – "Манчестер Сити” учрашувида аргентиналик ҳужумчи Карлос Тевес захирадан майдонга тушишдан бош тортиб барчани ажаблантирди. Айнан мана шу воқеа ўтган ҳафтанинг энг муҳим воқеалардан бири бўлди, десак муболаға бўлмайди.

Умуман олганда, яна Тевес тилларда достон.

Икки ҳафталик дисквалификация

Олинган маълумотларимизга кўра, "Манчестер Сити" клуби раҳбарияти аргентиналик ҳужумчи Карлос Тевесни икки ҳафтага дисквалификация қилишга қарор қилди. Футболчининг  "Бавария" клубига қарши кечган учрашувдаги "беадаблиги” бунга сабаб бўлди.

Карлос Тевес икки ҳафта давомида "шаҳарликлар" билан машғулотларда иштирок этиш ҳуқуқидан маҳрум этилди. Шу билан бирга мана шу муддат давомида жамоа иштирокидаги бирорта ҳам ўйинда майдонга тушмайди.

Шундан сўнг "шаҳарликлар" раҳбарияти охирги вақтларда можаролар гирдобида ўралашиб қолган футболчининг тақдири борасида бир қарорга келади.

Тевес жазоланиши мумкин

Ўз навбатида ФИФА вице-президенти Жим Бойс Карлос Тевесни умрбод футболдан четлаштириш керак деган фикрни илгари сурди.

"ФИФА  футболчини умрбод футболдан четлатиш учун етарлича кучга эга деб ўйлайман. Агар  чиндан ҳам Тевес шундай қилган бўлса, унда клуб бундан кейин ҳам усиз ўйнашни давом эттириши лозим.

 "Шаҳарликлар" бу ҳақда ФИФАга расман арз қилиб чиқишса ва буни исботлай олишса, "қўлоқсиз” ҳужумичга қарши истаган санкцияни эълон қилиш учун ҳеч муаммога дуч келмаймиз. Бундай ишлар илгари умуман бўлмаган. Аргентиналик ўйинчичнинг қилган қилиғини кечириб бўлмайди. Бўлиб ўтган воқеа кишида фақат нафрат уйғотади.

Футболчи чиндан ҳам айбдор бўлса ва "Манчестер Сити" уни "ҳайдаб” юборса, ишончим комилки, Тевес кейинги ҳафтадаёқ бошқа клубга бориб яна катта пуллар ишлашга киришади.

Клуб раҳбарлари ва ФИФА буни яхшилаб ўйлаб кўришлари лозим. Карлос Тевес бош мураббийни менсимаган бўлса, кейинроқ бошқа ўйинчилар ҳам худди йўлни танламаслигига ҳеч ким кафолат бера олмайди. Кейин уларни тўхтатиб қолиш амримаҳол?”, деди Бойс.

Даъвогар жамоалар

Бу қилмишидан кейин Карлитос "шаҳарликлар” таркибида узоқ қолмаса керак. Футбол эксперти Марк Сегал 27 ёшли футболчи кейинги фаолиятини қаерда давом эттириши мумкин деган саволга жавоб излаб кўрди.

«Анжи», Махачқалъа: Россия премьер лигасида иштирок этаётган клуб қисқа фурсат ичида катта ютуқларни қўлга киритишни режалаштирган. Яқинда клуб "Интер”дан камерунлик ҳужумчи Самюэль Это’Они  20 миллион еврога сотиб олиш орқали нияти жиддий эканлигини кўрсатиб қўйди.

Айни дамда жамоага бразилиялик афсонавий футболчи Роберто Карлос сардорлик қилаётир. Карлосдан ташқари махачқалъаликлар сафида "Челси”нинг собиқ ярим ҳимоячиси Юрий Жирков ҳам тўп сурмоқда.

Тевес уйини жуда соғинган, бироқ катта миқдордаги маош унинг соғинчни четга суриб қўйиши ҳеч гап эмас. Худди Это’О каби. Камерунлик ҳужумчининг бир ойлик иш ҳақи 15,3 млн. фунтга тенг. Тевесга бундан ҳам кўпроқ ойлик таклиф этилиши мумкин.

«Бока Хуниорс»: Карлос Тевес Европанинг бир қатор кучли клублари сафида тўп суришига қарамай, Аргентинанинг гранд жамоаси унинг қалбида абадий из қолдирган. Бир пайтда футболдаги дастлабки қадамларини қўйган «Ла Бомбонера» стадионига қайтиш Карлитоснинг азалий орзуси.  Тевес ҳам кўплаб футбол юлдузлари каби фаолияти биринчи жамоасида якунлашни ният қилган. Агар вазият ҳозиргидек чигал бўлмаганида "Бока” умуман "Сити” билан келиша олмасди. Бироқ, ҳозир музокаралар олиб боришнинг мавриди эмас.

«Коринтианс»: Тевес ўйинаган яна бир Жанубий Америка жамоаси. Аммо бу клуб аргентиналик қўшниларига қараганда, молиявий томондан анча ривожланган. Ушбу жамоа яқинда телевизион шартнома орқали катта даромад қилди. «Коринтианс»да футболчини сотиб олиш учун пул бор. Ёзда бразилияликлар Тевесга харидор бўлишганди. Аммо "Сити” раҳбарлари билан келишишнинг иложи бўлмади.

Пуллар келади ва кетади. Бироқ Тевеснинг «Коринтианс»га қайтиши жамоа мухлисларига ёқмаслиги турган гап. Негаки, бир пайтлар Карлитос "Вест Хэм” дан тушган таклифни қабул қилиб Бразилиядан "қочиб кетганди”.

«Пари Сен-Жермен»: Бу вариант ҳам Тевесни оиласига яқинлаштирмаслиги аниқ. Бироқ "ПСЖ”нинг узоқ йиллик режаси 27 ёшли футболчига ёқиши мумкин. Бундан ташқари, Франция пойтахти шарафини ҳимоя қиладиган жамоа учун қатарлик шайхлар катта пул тикишган. Маълумки, "Манчестер Сити”нинг хўжайни ҳам шарқлик шайхлар саналади.

Бошқа томондан ПСЖ спорт директори бўлиб ишлаётган Леонардо аргентиналик футболчи билан тил топишиб кетишига шубҳа қилмасак ҳам бўлади. Худди шундай ишни бир пайтлар Роберто Манчини қилганди.

Боз устига Тевесни яқинда "Манчестер Сити” дан тортиб олинган бошқа бир ватандоши Пасторе билан бир жамоада тўп суриш имконияти Парижга олиб келиши мумкин.

«Малага»: Яна бир шарқлик инвесторлар ҳомийлигидаги жамоа. "Малага” Испания чемпионатидаги "Барса” ва "Реал” гегемонлигига чек қўйишга жиддий бел боғлаган. Жамоани "Қироллик клуби”нинг собиқ устози Мануэль Пеллегрини бошқармоқда. Испанияга келиш Тевес учун ҳар томонлама қулай бўлиши мумкин. Негаки, аргентиналик футболчи доим Англиядаги қийинчиликлардан нолиб келган. Ёзда Пеллегрини «Ла Росаледа» стадионида таъмирлаш ишларни бошлаб юборди. Тевеснинг келиши "Малага”нинг ниятлари амалга ошишида катта ёрдам беришга шубҳа йўқ.

АброрБЕК тайёрлади