Гаджиев "Анжи”дан кетгач, кўпчилик ушбу жамоани Роберто Карлосга топшириш керак деган фикрни илгари сурганди. Бироқ унда ҳали етарлича тажриба йўқ. Шуни ҳисобга олган рус ҳамкасбларимиз махачқалъаликларни бошқариши мумкин бўлган мураббийларни санаб ўтди. Етти нафар номзод мураббийнинг айримлари ҳозир ишсиз юришибди. Ҳамюртимиз Одил Аҳмедов тўп сураётган жамоага бош мураббий бўлишга ким муносиб? Юқорида ушбу саволга жавоб излаб кўрамиз.

Карло Анчелотти

Италиялик машҳур мутахассис ҳамон ишсиз юргани кишини ажаблантиради. Карло май ойида "Стэмфорд Бридж”дан ҳайдалганидан бери "таътил”да. Бунинг сабалари бор албатта. Биринчидан ушбу мураббий бироз дам олишни истаганди. Иккинчидан эса унга тузукроқ таклиф тушмади.  ПСЖ спорт директори Леонардо собиқ устозини Парижга олиб келишни режалаштираётганди. Бироқ жамоанинг ўйини қовушиб кетгач, Анчелотти Францияга боришига ҳожат қолмади.

Карло ота ёши катта футболчилар билан ишлаш ҳадисини олганини ҳисобга олсак, у "Анжи”ни кучайтира олади. Негаки, айни дамгача Анчелотти ўз жамоаси билан икки марта Европа Чемпионлар лигасида ғалаба қозонган ва унда етарлича тажриба бор.

Рафаэль Бенитес

"Валенсия”, "Ливерпуль” ва "Интер” жамоаларида ишлаган Рафа Бенитес сўнгги пайтларда омадсиз трансферлар, кутилмаган қарорлар ва клуб раҳбарлари билан тортишишдан бошқасига ярамай қолди. Афтидан, испаниялик мутахассис учун Европанинг топ клубларига бориш учун "эшиклар ёпилган”. Бу билан Бенитес номли мураббий йўқ бўлиб кетди, дейиш фикридан йироқмиз. Унинг икки марта Чемпионлар лигасида ғалаба қозонганини кўпчилик эсидан чиқарган бўлишса ажаб эмас. Мураббийнинг ўзи эса яна ишга қайтиш иштиёқида юрибди. Фақат уни таклиф қиладиган жамоа топилмаяпти. Агар Бенитес "Анжи”га келса, иши юришиб кетармикан? Буни албатта, олий ҳакам – вақт кўрсатади.

Луи ван Гал

Голландиялик мутахассисга охирги пайтларда барқарорлик етишмаяпти. Бунга натижалар сабаб эмас. Балки, ван Галнинг оғир характери уни бир жойда узоқ вақт қуним топишига халақит беряпти.

"Анжи” ушбу мураббийга таклиф юборса, ван Гал бунга рози бўлиши мумкин. Боиси, Луи ўз олдига юқори мақсадларни қўядиган клублар билан ишлашни ёқтиради. "Анжи” эса "Бавария”нинг собиқ устозини қониқтирадиган ҳолатга эга. Бу жамоада пул ҳам етарли.

Жан Пьеро Гасперини

"Женоа”да рақобатдош жамоа ярата олган мураббйининг "Интер”да иши юришмади. "Нерадзуррилар” ушбу мутахассиснинг 3-4-3 тактикасига мос туша олишмади. Жамоанинг ёмон натижа кўрсатганига биргина Гасперини айбдор эмас. Тўғри, натижа учун бош мураббий жавоб беради. Лекин Моратти ҳам айбсиз деб бўлмайди.

Гасперининг омадсилиги қаерда биласизми? У "Интер”га барчаси изидан кетганида келди ва вазиятни унглай олмади. Гасперини энжи Апенини ярим оролида ишлай олмаса керак. Шундай экан уни Россияга олиб кетиш вақти келди. Фақат бунга Жан Пьеронинг ўзи нима дер экан?

Юрген Клоп

Жаҳоннинг энг ёш ва иқтидорли мураббийларидан бирини Дортмунддан олиб келиш жуда мушкул вазифа. Бироқ иложсиз нарсанинг ўзи бўлмаганидек, Клоппнинг Россияга кўчиб ўтиши учун унинг барча айтганларини қилиш керак. Аниқроғи, Юргенни жамоаси билан сотиб олиш даркор. Айни дамда "Анжи”га яхши дарвозабон керак 15 млн евро Романа Вайденфеллерни олиш мумкин. Жамоа яна битта ҳужумчига мухтож Лукас Барриос учун 25 млн. тўлаш талаб этилади. Махачқалъага янги юлдуз керак. Бунинг учун "Боруссия” офисига Гетцени нархини сўраш учун хат жўнатиш лозим.  

Бироқ, Марио Гетценинг Россияга келмаслиги аниқ. Матс Хуммельсда ҳам шу йўлни танлаш эҳтимоли юқори.Невена Суботични эса қишдаёқ сотиб олиш имконияти бор.

Луис Фелипе Сколари

Ушбу мутахассиснинг Европадаги охирги иш жойи "Челси”да бўлганди. Бироқ Лондонда унинг омади чопмади. Сколари "аристократлар”га бир йил ҳам устозлик қила олмади. Жанубий Америкада футболчилар билан болалардек муносабатда бўлишарди. Бунга кўникиб қолган Сколари "Челси”да ҳам шундай қилишга қарор қилганди. Афсуски, Дрогба, Лэмпард ва Терри каби футболчиларга бу ҳолат ёқмади. Натижада "Челси” мавсум якунланишини ҳам кутиб ўтирмай  бразилиялик мураббийга чиқиш эшикларини кўрсатди.

Сколарини "Анжи”га олиб келиш бироз енгил кечиши мумкин. Лекин бир муаммо бор. Агар Бразилия Футбол федерацияси Луис Филипега ЖЧ-2014 арафасида терма жамоа бош мураббийлигини таклиф этса, махачқалъаликларга уни олиб келиш муаммога айланди. 

Гус Хиддинк

Икки жамоада ишлашса ўрганган Хиддинк учун Туркиядаги иши маъқул келмаяпти. Шунинг учун Гус баҳорда "Челси” келишга қарор қилганди. Ёзда эса унинг агенти "Интер” билан музокара олиб борди. Аммо Туркия Футбол федерацияси Хиддинкни Европа чемпионатидан олдин қўйиб юбормоқчи эмас. Роман Абрамович голландиялик мутахассисни "Челси”га қайтариш учун қўлидан келган барча ишни қилди. Аммо ТФФ раҳбарлари ҳам охиргача кураш олиб боришди.

Хиддикни олиб келиш учун "Анжи”да битта йўл бор - ёзгача кутиш. Лекин жамоага ҳозир янги қон жуда зарур. Жамоа бош мураббийсиз узоқ вақт қола олмайди.  

Аброр БЕК тайёрлади