Одамлар орасида бир дарёни икки марта кечиб ўтиш мумкин эмас, деган гаплар юради. Аммо бу иримга футболчилар сира ишонишмайди. Аксинча қурқмасдан собиқ жамоаларига қайтишади.

Шуни айтиш жоизки, бугунги мақоламизда ижардан қайтган футболчиларни тилга олмаймиз. Бу камбэк биз учун қизиқарли эмас.

Январь ойидаги трансфер пайтида бизга бир қатор қайтишларни тақдим этди. Ҳозир ҳамма жойда Тьерри Анри ва Пол Скоулзлар ҳақида гапирилмоқда. Гарчи, франциялик ҳужумчи уч ой муддатга ижара асосида собиқ жамоасига қайтган бўлса-да, дайди ўғилнинг қайтиши катта воқелик сифатида тилга олинди. 

Пол Скоулз эса Сэр Алекс Фергюсоннинг илтимосига биноан яна фаолиятини тиклади. Умуман бу мавзу ҳақида етарлича гапирилди. Бугун бошқа ўйинчилар хусусида гаплашамиз.

Аввало шуни таъкидлаш жоизки, газетамизнинг олдинги сонида Анри ва Скоулзнинг издошлари бўлиши мумкин бўлган футболчилар хусусида гаплашгандик. Бугун эса айнан собиқ клуби либосини иккинчи марта кийган айрим ўйинчиларни ёдга солиб ўтамиз.

Хосе Антонио Рейес

Қишки трансферлар чоғида шунингдек, собиқ жамоасига тиниқли испаниялик футболчи Хосе Антонио Рейес ҳам қайтиб келди. Фаолияти давомида "Атлетико”, "Реал”, "Арсенал”, "Бенфика” каби жамоаларда тўп сурган футболчи мавсумни "Севилья”да давом эттирадиган бўлди. Ушбу клубда Рейес футболчилик фаолиятини бошлаганди. 21 ёшида эса Туманли Альбионга кетиб қолганди. Орадан шунча йил ўтиб, яна "Севилья” қайтди.

Сол Кэмпбелл

2010 йилда "Арсенал” сафига қайтиш айнан мана шу ҳимоячига нисиб этганди. Ўша мавсумда Венгер жамоасининг ҳимоясида муаммолар вужудга келганди. Шунинг учун франциялик мутахассис "Тоттенхэм” футбол мактаби тарбияланувчисини ортга қайтаришга мажбур бўлганди.

Йохан Кройф

Футболчилик фаолиятини ўзининг ёрқин дамларини ўтказган жамоага иккинчи марта қайтиб келиш эстафетасини Йохан Кройф бошлаб берганди. Голландиялик машҳур футболчи 34 ёшида ўзининг қадрдон "Аякс” клубига қайтиб келганди. Унгача у Испания ва АҚШда ўйнаган. Аммо Кройф футболчилик фаолиятини негадир "Фейеноорд”да якунлашга қарор қилди. 

Айтганча, гап роттердамликлар ҳақида кетар экан, яна битта маълумотни эътибор қаратишни жоиз деб топдим. Бутсасини михга илиш учун "Фейеноорд”нинг нафар тарбияланувчиси Жованни ван Бронкхорст ва Йон даль Томассонлар клубга қайтиб келишганди.

Микаэль Баллак ва Йоан Мику

"Бордо"да порлаган Мику олти йиллик саёҳатдан кейин фаолиятини якунлаш учун яна  собиқ клуби либосини кийган.

"Байер” сафида Чемпионлар лигасида ғалаба қозона олмаган Микаэль Баллак ҳам бахтини излаб Лондонга йўл олганди. Аммо "Челси” билан Европанинг энг нуфузли мусобақасида муваффақият қозона олмади. Аввалроқ эса "Бавария” сафида ҳам олтин медалдан қуруқ қолди.

Ҳозир эса у ливеркузенликлар сафида ўзининг иккинчи ёшлигини бошидан ўтказмоқда. Микаэль айнан "доришунослар” таркибида фаолиятини якунласа керак.

Эдгар Давидс ва Александр Глеб

Худди шундай ёшда Эдгар Давидснинг хаёлига ҳам ўзининг ёрқин дамларини ўтказган "Аякс” келиб қолди. Натижа у Амстердамга қайтди ва шу ерда футбол билан хайрлашди.

Лекин орадан ҳеч қанча вақт ўтмай, фаолиятини тиклади.

Қайтиш азобини ўзида ҳис этган футболчилардан бир бу беларуслик ярим ҳимоячи Александр Глебдир. 27 ёшли ярим ҳимоячи ўзининг энг ёрқин дамларини "Штутгарт”да ўтказганди. Кейинроқ "Арсенал”нинг таклифни қабул қилиб, Лондонга жўнаб кетди. "Тўпчилар” сафида ҳам яхши тассурот қолдирган Глеб ўзини "Барселона”да синаб кўришга аҳд қилди. Аммо Каталонияда Саша омадсизликка учради. Натижада собиқ жамоасига ижарага бериб юборилди. Лекин Глеб иккинчи марта Германияда ўзини кўрсата олгани йўқ.

Дмитрий Чигринский

Украиналик ҳимоячи ҳам "Барселона” сафига киришиб кета олмади. Украин футболидаги энг қиммат трансфер эгаси саналган Чигринский Каталонияда атиги бир мавсум ўйнади, холос. Кейин яна Донецкка қараб йўл олди.

Андрей Шевченко

"Олтин тўп” – 2004 соҳиби бўлган Шева фаолияти давомида икки марта камбекка қўл урган. 2006 йилда "Милан”ни тарк этиб, "Челси” сафига бориб қўшилган Шева негадир Лондонда ўзини кўрсата олмади. Натижада учинчи мавсумдан кейин отасидек бўлиб қолган Берлусконининг олидига қайтди. "Милан” ҳам дайди ўғлини қучоқ очиб кутиб олди.

Худди Глеб каби Андрей ҳам иккинчи қайтишида мухлислар ишончини оқлай олмади. 33 ёшида Шевченко бундан бир неча йил олдин кетган йўналиши бўйича ортга қайтди. Аниқроғи, унинг юлдуз бўлиб етитшига ҳисса қўшган Киевнинг "Динамо” жамоаси либосини кийди. Айни дамда у Сёмин жамоасинингг асосий фигуралардан бирига айланган.

Хуан Рамон Рикельме

Ушбу ҳужумчидан Европада кўп нарса кутишганди. Аммо Рикельме на "Барселона”да, на "Вильярреал”да ишончларни оқлай олмади. "Кўҳна қитъа”да ўйнаб кетишига кўзи етмаган футболчи "Бока Хуниорс”га қайтишдан бошқа чора топа олмади. Айни дамда у "Бока”нинг ҳақиқий етакчиси.

Лукас Подольски

"Кёльн" жамоасида ном қозонган футболчи "Бавария"ни деб жамоадан кетганди. Бироқ Мюнзенда ҳужумчининг ишлари юришмай қолди.

Гарчи унга номдор клублардан таклиф тушганига қарамай, Подольский "Кёльн” вартиантини танлади. Ҳозир у ўзини бахтиёр ҳис этмоқда.

Людовик Жюли

Айрим ҳолларда футолчилари собиқ жамоаларига ёрдам бериш мақсадида бир дарёни иккинчи марта кечиб ўтишга мажбур бўлишади. Мана шундай футболчилардан бири Людовике Жюлидир. "Монако” билан 2004 йилги Чемпионлар лигаси финалига қадар етиб борган ярим ҳимоячи 2011 йилда оғир аҳволда қолган клубга қайтиб келди. Аммо Жюли Моне Карлога келганида вазиятни ўнглашнинг иложиси қолмаганди. Айни дамда "Монако” Франция чемпионатининг иккинчи дивизионида иштирок этмоқда.

Эстебан Гранеро ва Хосе Кальехон

Баъзан эса футболчилар собиқ клубларига юлдуз даражасига чиққач, қайтишни афзал билишади. Юқорида номи тилга олинган футболчилар шулар жумласидандир. Эстебан Гранеро "Реал"дан кетиб,"Хетафе"да икки мавсумни ажойиб тарзда ўтказди. Кейинроқ эса яна Мадридга қайтди. Худди шундай ишни Хосе Кальехон ҳам қилди. У "Эспаньол"да ўйнади.

Тан олиш керак, Гранеро ва Кальехонлар ҳали юлдуз даражасига етишганларича йўқ.

Херард Пике ва Сеск Фабрегас

"Барса”нинг икки тарбияланувчиси Каталонияга ҳақиқий юлдуз бўлиб қайтишди.

Бу икки  футболчи Каталониядан жуда ёш пайтларида кетган. Пике ўз омадини "Манчестер Юнайтед”да синаб кўрган бўлса, Фабрегас "Арсенал”нинг етакчилардан бирига айланиб бўлганди. Айтиш жоизки, Венгер жамоасида Сеск асосий фигуралардан бир эди. Узоқ уринишлардан кейин 2011 йил ёзда "Барса” ўзининг тарбияланувчисини қайтаришга эришди.

Дэвид Бекхэм ва Лэндон Донован

АҚШ чемпионатаидан ҳам қизиқарли камбэклар учраб туради. Масалан, Бекхэм "Сеҳрли диёр”га кетгач, тез орада Европа футболини соғиниб қолди ва икки марта Италиянинг "Милан” жамоасида ижара асосида ўйнаб кетди.

Унинг "Лос Анжелес Гэлакси”даги жамоадоши Лэндон Донован ҳам "Эвертон”га келиб кетгач, ўз мамлакатида  кўп юра олмади ва яна Англияга қайтишга аҳд қилди.

Валерий Карпин

Ҳозирда Москванинг "Спартак” жамоасида бош мураббий бўлиб ишлаётган Валерий Карпин ҳам бир пайтлар бошидан шундай кунларни ўтказган. "Спартак”дан кетгач, Испаниянинг "Реал Сосьедад” клуби сафига бориб қўшилган Карпин бу жамоада икки мавсумни ўтказди. Кейин эса "Валенсия” ва Сельта” клублари либосини ҳам кийишга улгурди. Бироқ унинг ишлари бошқа жамоада юришмагач, яна Виго шаҳрининг асосий клубига қайтишга қарор қилди ва адашмади. У "Реал Сосьедад” билан Испания чемпионатида иккинчи ўринни қўлга киритди.

Фёдор Черенков ва Станислав Черчесов ва бошқалар

Россияда ҳам камбеклар тез-тез содир бўлиб туради. Олег Романцев бошчилигидаги "Спартак” бир пайтлар кўплаб собиқ ўйинчиларини қучоқ очиб кутиб олган. Масалан, "қизил оқлар”нинг севимли ўйинчиларидан бири Фёдор Черенковнинг "Ред Стар” сафидаги ўйини қовушмади ва ортига қайтиб, Москвада футбол билан хайрлашди. Россия терма жамоасининг собиқ посбони Станислав Черчесов ҳам икки марта ижара асосида "Спартак”да ўйнаб кетган.

Бундан ташқари, Николай Писарев  ҳам икки марта "қизил оқлар” либосини кийишга муваффақ бўлган. Айтиш жоизки, айни дамда Россия ёшлар терма жамоасини бошқариб бораётган мутахассис ўзининг олтин даврини айнан "Спартак”да ўтказган.

Россия терма жамоаси тўпурарларидан бири Владимир Бестчасних ҳам фаолияти давомида икки марта камбэкка қўл урган. Унинг иккинчи қайтиши "Спартак”нинг сўнгги чемпионлигига тўғри келган.

Дарвозабонлар орасида Черчесовдан ташқари, Руслан Нигматуллин ҳам икки марта "Локомотив" шарафини ҳимоя қилган. Лекин ҳар икки сафар ҳам унинг омади келмаган. Негаки, бу пайтда "Локо” дарвозасини Сергей Овчинников қўриқларди. У ҳам Москвага хорижий сафардан қайтганини эътироф этиш жоиз.

Ўзбекистон терма жамоасининг собиқ дарвозабони Алексей Поляков эса уч марта "Локомотив”да кўриниш берган. Айни дамда у "Локо-2” шарафини ҳимоя қиляпти.

Александр Кержаков "Севилья”да ўзини кўрсата олмагач, Россияга қайтишни афзал билди. Бу пайтда Москванинг "Динамо” клуби ҳужумчи учун яхшигина пул таклиф этди. Бироқ, "Динамо” сафида у узоқ қололмади. Негаки, уни собиқ жамоаси "Зенит”да кутишаётганди.

Игорь Семшов эса  "Динамо”дан "Зенит”га кетиб, яна шу йўналишда ортга қайтган. Семшовгача аргентиналик ҳужумчи  Алехандро Домингес шундай йўл тутганди. Аввалига "Рубин”ни тарк этган ҳужумчи ўз ватанида омади юришмагач, Қозонга қайтиб келганди.

Шунингдек, қуйидаги футболчилар Андрей Тихонов, Дмитрий Лоськов, Дмитрий Кириченко каби ўйинчилар ҳам ўз навбатида камбэк қилишга улгуришган.

Аброр БЕК тайёрлади