Ғузорнинг «Шўртан” жамоаси чемпионатнинг навбатдаги турида сафарда "Динамо”га йирик 0:3 ҳисобида мағлубиятга учраганидан кейин клуб раҳбарлари туркманистонлик мутахассис Тачмурод Агамуродовга "чиқиш эшик”ларини кўрсатишди. Бу ҳақда клуб расмий сайти хабар тарқатган.

Умуман олганда, жамоа сўнгги уч учрашувда атиги бир очко жамғарди. Ваҳоланки, Тачмурод Шамакович биринчи давра якунига етгач, катта мақсадлар билан жамоага таклиф этилганди. Бироқ, "Шўртан” миллий чемпионат ўйинларида туркманистонлик мураббий қўл остида атиги учта ғалаба қозонди, холос.

18 сентябрь куни жамоа раҳбарияти навбатдан ташқари йиғилиш ташкил этишди ва йиғилишда бош мураббийнинг "Шўртан” клубидаги тақдири кўриб чиқилди.  Жамоа мутасаддилари туркманистонлик мутахассиснинг кўрсатган натижасидан ҳам, олиб борган ишидан ҳам қониқиш ҳосил қилмади ва уни эгаллаб турган лавозимидан озод этишга қарор қабул қилди. Шунингдек, Тачмурод Шамаковичга ёрдам бериб келган Игорь Хомуха ҳам эгаллаб турган лавозимидан четлатилди.