| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Сентябрь » 1 » Алексей Касьян: «Мағлубиятдан кейин мухлисларнинг кўзига қараш оғир»
13:52 Алексей Касьян: «Мағлубиятдан кейин мухлисларнинг кўзига қараш оғир» |
«Андижон» сафида тўп сураётган легионерлардан бири – Алексей Касьян ўз ўйини ва ҳарактери билан ажралиб туради. Молдовадан таклиф этилган ушбу ўйинчини Андижонда ҳурмат қилишади. Чунки у мухлисларнинг эътиборини қозона олган. Касьян ўз меҳнати ва ўйини билан қисқа фурсат ичида жамоанинг асосий таркибидан жой олди. Шу боис мураббий ва мухлисларнинг ишончини қозонишга бор кучи билан ҳаракат қилмоқда. Шунингдек, унинг «Бургутлар» таркибида тўп суриши қайсидир жиҳатдан ўйин темпини ҳам кучайтирмоқда десак янглишмаган бўламиз. Унинг фаолиятига назар ташлайдиган бўлсак, шу кунга қадар Молдавиянинг «Шериф-2», «Тирасполь», «Динамо», «Искра-Стал», Руминиянинг «Петролул» ва АҚШнинг «Кансас Сити» каби жамоаларида тўп сурган. «Андижон»га келганига қадар «Искра-Стал» учун тўп сурган бу ҳимоячи ушбу жамоа билан мамлакат кумуш медалини қўлга киритганлиги диққатга сазовордир.
Дарвоқе, у яқинда оила қурди ва ўз рафиқаси билан алоҳида уйда истиқомат қилмоқда. Яқинда унинг хонадонига ташриф буюриб, «Андижон»даги фаолияти хусусида суҳбатлашдик.
- Алексей, мавсум бошидан бери «Андижон» учун тўп суриб келяпсиз. Шундай экан, ўтган вақт мобайнида ўз ўйинингизда ва ҳаётингизда қандайдир ўзгаришлар юз бердими?
- Андижонга келганимда жамоа ўйинига ва бу ернинг иқлимига мослашиш менда яхши ўтди. Шахсий ҳаётимга келсам, мен уйландим ва ҳозирда рафиқам билан бирга истиқомат қиляпмиз. Айнан шу нарса менга етишмаётганди. Энди бу менга ўзига хос ёрдамчи куч вазифасини ўтамоқда. Клубда мен учун яратилган шароитлар ҳаммаси мени қониқтиради.
- Айтиш жоизки, бу йил илк бор Ўзбекистон чемпионатида тўп суряпсиз. Шу сабабли олий лигамизга келган дастлабки пайтдаги фикрингиз қандай эди-ю, бугунги кундаги фикрингиз қандай?
- Ўзбекистонга Это'О, Ривалдо каби юлдузлар келган пайтда, мен бу мамлакат чемпионати ҳақида эшитганман. Ўзим бу ерга келиб шунга амин бўлдимки, Ўзбекистон чемпионатида футболчилар техник жиҳатдан кучли ўйин кўрсатадилар. Боз устига мамлакатда жуда кўплаб иқтидорли ёшлар етишиб чиқаётганини ҳам кўряпман. Ўзбек футболи ривожланаётганлиги яққол кўриниб турибди. Бунга мисол қилиб айтадиган бўлсам, Молдова билан Ўзбекистон чемпионатини солиштирганда, сизларнинг футболингиз бир бош юқори. Бундан ташқари ушбу мамлакатда мухлисларнинг стадионга келиб ўз жамоасини қўллаб-қувватлашлари аъло даражада.
- Демак, Ўзбекистон чемпионатини Молдованикига нисбатан бир бош устун қўйишингиз бу сизнинг фаолиятингизда бир қадам олдинга ташлаганингиз билан боғлиқми?
- Ҳа, бу мен учун бир қадам олдинга ташлаш деганидир. Янги мамлакат ва янги чемпионатга келганимдан кейин ўзим учун унинг яхши томонларини сингдириб бораман.
- «Андижон»га келганингиздан буён асосий таркибда ўйнаб келяпсиз. Айтмоқчиманки, жамоада энди келган чоғингизда таркибдаги рақобат сизни ўйлантирганмиди?
- Бу ерга келишимдан олдин менда ҳеч қандай қўрқиш деган ҳолат бўлмаган. Рақобат бу – иккала футболчи ўртасида юз берадиган ажойиб тушунчадир. «Андижон»га келишимдан мақсадим, менга ишонган мураббийларга ва мухлисларга ўзимни яхши томондан кўрсатишдир. Улар менга ишонч билдиришгани учунгина бу ерга келганман. Ҳозир айтганимдек, Ўзбекистон чемпионатига келиб мен олдинга қадам ташладим ва бу юрт футболидан ўзим учун янгиликлар олмоқдаман.
- Ҳозир «Андижон» 7-ўринни эгаллаб турибди. Сиз барча ўйинларда майдонга тушиб жамоа шарафини ҳимоя қилиб келяпсиз. Айтингчи, ўтказиган учрашувлар сизда қандай хотиралар қолдирмоқда?
- Мен иккинчи даврадаги ўйинларимизга тўхталадиган бўлсам, «Пахтакор», «Қизилқум» ва «Нефтчи» клубларига қарши ўтказилган ўйинлардаги мағлубиятларимизда фақат ўзимиз айбдормиз. Тошкентда «Пахтакор» устидан ғалаба қозонаётиб йирик ҳисобда мағлубиятга учрадик. Тўғриси, ютаётган пайтингда мағлубиятга учраш бу ёмон нарса. Шунингдек, «Нефтчи» билан ўйиннинг биринчи бўлимида биз жуда яхши ўйин намойиш этгандик ва танаффусга 1:0 ҳисобидаги ғалаба билан чиқиб кетдик. Агарда иккинчи бўлимда ҳам ўша ўйинимизни кўрсатганимизда бемалол айтишим мумкинки, фарғоналикларни йирик ҳисобда мағлубиятга учрата олардик. Биз қишки йиғин давомида Россия, Дания, Руминия жамоалари билан куч синашиб тенгма-тенг ўйин кўрсатгандик. Лекин ҳозирги қайд этаётган салбий натижаларимизда фақат ўзимиз айбдормиз.
- Ҳар бир ўйиндаги мағлубият футболчиларга турлича таъсир қилиши мумкин. Масалан, легионер сифатида бу сизга қандай таъсир ўтказади?
- Мағлубиятга учраганимизда аввало айбни ўзимдан қидираман. Балки ўша вазиятда бошқачароқ ўйнаганимда бундай бўлмасмиди деб ўйлаб таҳлил қиламан. Кейинги учрашувларда бу аби хатолар такрорланмаслиги учун қўлимдан келганича ҳаракат қиламан. Айниқса, ўз майдонингда мағлуб бўлиш бу оғир. Ўйиндан сўнг кўчага чиққанингда мухлисларнинг кўзига қараш бу чиндан қийин.
- Олий лиганинг кўплаб клубларида легионерлар тўп суришмоқда. Аммо «Андижон»да хорижлик ўйинчиларга осон эмас. Яъни, улар доимий равишда мухлисларнинг диққат марказида бўладилар. Уларнинг босими сизларга халақит қилмайдими?
- Мухлислар томонидан бўладиган босим бизга ҳеч қандай салбий таъсир кўрсатмайди. Бу аксинча бизни янада олдинга чорлайди. Ишқибоз бўлгач у ҳар доим ўзи учун ижобий натижани талаб қилади. Майдонга тушаётганимда бу каби ҳолатларни эсимдан чиқараман. Фақат жамоамиз ютишини ва ўзим учун ишониб топширилган позицияда мустаҳкам ўйин кўрсатиш ҳақида ўйлайман. Бошқа нарсалар менга таъсир қилмайди. Муҳими, биз жамоанинг ғалабаси учун курашамиз.
- «Андижон»ни кейинги ўйинларда ҳам мураккаб беллашувлар кутиб турибди. Масалан, бирин-кетин «Шўртан» ҳамда «Бунёдкор»га қарши ўйинларни мисол қилиш мумкин. Умуман, кейинги учрашувларда жамоанинг имкониятини қандай баҳолаш мумкин?
- «Шўртан» билан ўйингача бизда вақт бор. Ўзингиз биласиз, Андижондан Ғузорга бориш учун 1000 километрга яқин йўл босилади. У ерга бориб яна шунча йўл босиб мағлубият билан қайтиш эса биз учун оғир. Бунинг учун албатта «Шўртан»га қарши яхши тайёргарлик кўряпмиз. «Бунёдкор», «Насаф» сингари жамоалар қайсидир жиҳатдан кучли бўлишлари мумкин. Аммо ҳар бир жамоа ҳам барқарор ўйин кўрсатавермайди. Бу ердаги ҳар бир жамоа билан тенгма-тенг ўйнаса бўлади.
- Сизни фикрингиз бўйича «Андижон»да етакчи футболчи ким?
- Кимнидир алоҳида кўрсатишим қийин. Нега деганда, кимдир бир ўйинда яхишроқ ўйнаса, кейингисида ўзини кўрсата олмаслиги мумкин. Менимча етакчи бу - жамоа сардори Александр Половков.
- Шу ўринда айтингчи, футболдан ташқари кўпроқ нималарга қизиқасиз?
- Футболдан ташқари асосан оилам ва дўстларим билан бирга бўлишни ёқтираман Улар билан шаҳар айланишни ва кафеларда мириқиб хордиқ чиқаришни хуш кўраман.
- Бир неча ойдан бери Андижонда яшаяпсиз. Шундай экан, бирор манзилга ўзингиз қийналмасдан етиб борасизми?
- Ўзимга керак бўлган жойларни яхши биламан.
- «Андижон»да бирор-бир легионернинг узоқ йиллар давомида тўп сурганини кам кўрганмиз. Айтмоқчиманки, кейинчалик ҳам фаолиятингизда бу ерда давом эттириш истаги қай даражада? Ёки янада олдинга қадам ташлаш борасида бошқа режаларингиз борми?
- «Андижон»даги кейинги фаолиятим ҳақида гапиришнинг ҳозир мавриди эмас. Чунки олдинда ҳали бир нечта ўйинларимиз бор. Биз мавсумни эгаллаб турган 7-ўринмиздан юқорироқ поғонада якунлашни мақсад қилганмиз. Албатта, ҳар бир ўйинчи ўз жамоасидаги ўрнини топиб олгач ўзини янада кучлироқ чемпионатда синаб кўришни хоҳлайди. Бироқ ҳозир бу ҳақида умуман ўйлаш ниятим йўқ. Барча фикр-у, ҳаёлимиз қолган ўйинларни муваффақиятли якунлашга қаратилган. Биз имкони қадар максимал натижаларга эришишга ҳаракат қиламиз.
- Дарвоқе, «Андижон»га иккинчи даврада ҳамюртингиз Александр Попович келиб қўшилди. Бизга маълум бўлишича унинг бу ерга келишига сиз сабабчи бўлибсиз. Аслида бу ҳолат қандай юз берди?
- Поповични таклиф қилганимнинг боиси шундаки, у тажрибали ўйинчи. Уни ёши ёки бошқа жиҳати учун эмас, балки ўша иқтидори туфайли тавсия қилганман. Мен уни жуда яхши биламан. «Искра-Стал» сафида бирга ўйнаганмиз. Гарчи ҳали гол ура олмаган бўлса-да, яхши спорт формасида эканлигини «Динамо» билан учрашувда исботлади.
- Айтингчи, ҳаётда қандай пайтда жаҳлингизни чиқариш ёки кайфиятингизни кўтариш мумкин?
- Мен ҳаётда қувноқ инсонман. Шунинг учун ўзимни-ўзим кайфиятимни бемалол кўтара оламан. Ҳеч ким жаҳлимни осонгина чиқара олмайди. Тўғри, ҳаётда ҳар хил вазият бўлади. Аммо ўзимни бошқара олмайдиган даражага тушиб қолмайман. Ҳамма вақт вазиятдан босиқлик билан чиқиб кетишга уринаман.
- Хорижлик қайси футболчига ўхшашни истайсиз?
- Мен ҳеч қачон бирор-бир футболчига ўхшаб ўйнашга ҳаракат қилмаганман. Икки йилдан бери ҳимоянинг чап қанотида ўйнаяпман. Бунгача эса мен ҳужумкор ярим ҳимоячи сифатида тўп сурардим. Менга Диего Марадонанинг ўйини ёқади. Клублардан эса шубҳасиз «Барселона»ни айтаман. «Андижон»ни ушбу жамоага интилиб ўйин кўрсатишини хоҳлайман.
- Агарда сизга «Оқ Роберто Карлос» деб ном беришса қандай қабул қилган бўлардингиз?
- Ҳамманинг футболда ўз номи бор. Роберто Карлос бу – Карлос. Алексей Касьян эса бу – Касьян. Кимдир мени оқ Роберто Карлос деб чақирса хафа бўлмайман. Лекин ўзимни унга сира ўхшатиб кўрмаганман. Қолаверса, унинг ўйинларини анчадан бери кузатганим йўқ.
Маъмур МАМАДАЛИЕВ ва Шуҳратбек ЖЎРАЕВ суҳбатлашди
Манба: www.andijon-pfc.uz
|
|
Категория: Интервью |
Просмотров: 583 |
Добавил: 11x11
| Рейтинг: 0.0/0 |
| |
 | |  |
|
