Кўплаб футбол мухлислари Фарғонанинг "Нефтчи”  жамоаси ҳақида кўпроқ маълумот олишга интилишади. Аммо сўнгги пайтларда Юрий Вазгенович Саркисян бошқарувидаги клуб ҳақида ОАВда жуда кам маълумотлар берилмоқда. Бунинг сабаби нимада? Бугунги мақоламизда шу масалани кўриб чиқамиз.

Айнан мана шу савол билан футбол мухлислари бизга кўп бора мурожаат этишади. Айрим ишқибозлар эса бизни кўпроқ "Пахтакор” ва "Бунёдкор” ҳақида ёзишда айблашади. Тан олиш керак, уларнинг гапларида жон бор. Аммо биз ҳам истаймиз ҳар доим "Нефтчи” ҳақида ёзишни. Бироқ  унинг ҳар доим ҳам иложини тополмаймиз. Негаки, жамоада матбуот хизмати яхши йўлга қўйилмаган. Клуб ҳақида маълумот олиш учун кимга мурожаат этишни билмаймиз ҳам. "Пахтакор” ва "Бунёдкор” хусусида эса янгилик олиш жуда осон. Бундай гапларни «Насаф» , "Шўртан” каби жамоаларга ҳам қуллаш мумкин. Шундай, расмий сайтига кирасиз ва маълумот олаверасиз. Наҳотки, "Нефтчи”дек жамоада ҳам шандай ишни амалга ошириш мушкул бўлса? Дарвоқе, "Нефтчи”нинг бирор бир футболчиси билан интервью олмоқчи бўлсангиз Юрий Саркисяндан рухсат сураш керак дейди.  Қизиқ, мен ҳали футболчининг интервью бериши учун мураббийдан рўхсат сўраганини эшитмагандим. Ўйлаб кўринг, Криштиану Роналду журналистлар билан учрашиш учун бош мураббйидан изн сўраб ўтирса-я? Бу кулгули эмасми? Фарғонада эса шунақа...

Клуб ҳақида хабарларни ҳам айнан Юрий Вазгеновичдан олиш мумкин. Аммо "Нефтчи” устози кайфиятига қараб қаламкашлар билан муомалада бўлади.  Шунинг учун, газеталарда фарғоналиклар ҳақида маълумотлар жуда кам ёзилади.

Бу ҳам майли ўтган йили  бўлиб ўтган воқеа менинг қўлга қалам олишимга тўртки бўлди. 2010 йили қишда "Нефтчи” футболчиларининг Туркиядан қайтишганини эшитиб клуб базасига йўл олгандим. Мақсадим жамоанинг хориждаги ўйинлари хусусида маълумот олиш эди. Базадаги кишилардан бири менга Асад Дўрмонов ёрдам бериши мумкинлиги ҳақида айтди. Шу пайтда Дўрмоновлар сулосасининг катта  вакили "Нефтчи” ўринбосарлари билан машғулот олиб бораётган эди. У билан сўрашгач, жамоанинг Туркиядаги йиғини тўғрисида озроқ маълумот беришини илтимос қилдим. Шу пайт мени менсимагандек бўлган Дўрмонов қўйидагича жавоб қайтарди: " Менинг бунга ҳаққим йўқ. Юрий Вазгеноич келсин, шундан сўрайсиз”. Менинг кайфиятим тушиб кетди. Наҳотки, Асад Дўрмоновга бешта ўйин натижаси ва кимлар билан ўйналганини айтиш қийин бўлса? Ахир бошқа жамоаларда бундай ҳолат бўлмайди-ку?  Клубнинг истаган вакилидан сўрасангиз хоҳлаган маълумотни айтиб беришади.

Хафсалам пир бўлиб базани тарк этаётган бир пайтда "Нефтчи” футболчиларидан бири учраб қолди. Ундан бир амаллаб натижаларни билаб олдим. Аммо у ҳам кимлар билан ўйинганини айтиб беролмади. Аниқроғи, қайси жамоалар билан тўп суришганини билмаслигини айтди. Қизиқ, наҳотки, ўша футболчи ким билан майдонга тушганини билмаса. Афтидан ўша ўйинчи адашиб футболга кириб қолган кўринади. Акс ҳолда... Гапларим ушбу футболчига оғир ботмаслиги учун айтайлаб унинг исмини айтмайман. Негаки, у мени лол қолдирган  бошқа бир гапни айтди. Ростини айтсам, ёш футболчи билан суҳбатлашар эканман ўзим учун янги бир нарсани кашф этдим. Саволларим орасида ўйинчига "Нефтчи”да матбуот котиби ким, маълумот олиш учун кимга мурожаат этиш керак " деган савол бердим. Ёш ярим ҳимоячининг жавоби мени ҳайратда қолдирди. Буни эшитсангиз, сиз ҳам ҳайрон қолишингиз турган гап.

Нима эмиш, "Нефтчи” га сотқинлар керак эмас экан. "Мураббиймизнинг фикрича, бизга матбуот котиби керак эмас экан. Улар бизнинг сирларимизни сотишар экан”- деб жавоб қайтарди футболчи.

Мана сизга матбуот котибига бўлган эътибор. "Нефтчи” учун жамоадаги ўзгаришларни айтиш сир саналар экан. Нима ҳам дердик.

Бундан чиқди қолган жамоаларимиз сотқинлар бор эканда. Айримларида бир нечта матбуот котиби бор.

Менимча, матбуот котиби жамоанинг бир бўлаги саналади. Масалан: "Бунёдкор”ни олайлик. Бу жамоа ҳақида миш-мишлар тарқалди дейлик, дарҳол матбуот котибига мурожаат қилинади. Ёки уларнинг ўзлари бу вазиятга ойдинлик киритишади. Агар "Қалдирғочлар”да ҳам худди "Нефтчи”даги каби фикр юритишганида, жамоа ҳақида маълумот ололмай ҳамма сарсон бўларди. Айниқса, россиялик ҳамкасбларимиз. Тан олиш керак, "Бунёдкор”нинг обрўси ошишида матбуот котибларининг ҳам салмоқли ҳиссалари бор...

Рўзали Қурбонов