Осиё чемпионати саралаш босқичига тайёргарлик кўраётган Ўзбекистон ёшлар терма жамоаси (U-19) бугун "Чиғатой” терма жамоалар тайёрлаш марказида ўзининг навбатдаги ўқув-машғулот йиғинларини бошлади.

Терма жамоа устози Аҳмаджон Мусаевнинг айтишича, йиғин доирасида иккита назорат учрашуви ўтказилиши режалаштирилган. Дастлабки ўйин 22 июль куни Тошкентнинг "Локомотив” клуби билан, 25 июльда эса, "Янгиер” жамоасига қарши бўлиб ўтади. Ҳар иккала беллашув ҳам "Чилонзор” стадионида ўтказилади.

Жамоа ўз машғулотларини "Чиғатой”даги майдонда олиб боради. Эртадан машғулотлар кунига икки маҳалдан ўтказилади.

Эслатиб ўтамиз, Ўзбекистон ёшлар терма жамоаси шу йилнинг 31 октябрь – 10 ноябрь кунлари Эронда ташкил этиладиган Осиё чемпионатининг саралаш босқичида иштирок этади. Аҳмаджон Мусаев жамоаси мезбонлар Эрон, Покистон, Ҳиндистон, Афғонистон ва Туркманистон билан бир гуруҳдан жой олган.