Бундан бир неча кун олдин «Нефтчи” ва "Пахтакор”нинг собиқ футболчиси Акмал Холматов Фарғонага келганини ва "Нефтчи” машғулотларида иштирок этаётгани ҳақида маълумотлар пайдо бўлганди. Лекин Холматовнинг "Пас” билан йил охирига қадар шартномаси бор эди. Акмалнинг Фарғонага келишига сабаб у Саркисян билан трансферини сотиб олиш борасида келишишга қарор қилганди. Бироқ, «Нефтчи” устози собиқ шогирдига ёрдам бера олмаслигини айтгач, тожикистонлик футболчи яна ортига қайтиб кетди.

Кетиш олдидан Юрий Саркисян унга трансфер масаласини ҳал этса, албатта "Нефтчи”га олишини айтиб уни юпатди.  

Бироқ, у иш осон кечмаслиги аён. Аслида "Пас” қўйи дивизионга тушиб кетгани боис, Холматов жамоани тарк этишга қарор қилганди. Қани кўрамиз, воқеалар ривожи қандай тус олар экан.

"Нефтчи” жамоаси ҳақида гапирадиган бўлсак, жамоа бугун Водилдаги йиғинни якунлайди ва футболчиларга икки кунлик таътил берилади. Жамоани тарк этганлар ҳам йўқ эмас. Санжар Асқаралиев "Навбаҳор”га кетган бўлса, жамоанинг учинчи дарвозабони Алишер Аҳмедов ҳам ўзига бошқа иш жойи қидиришга мажбур бўлди.

Айтганча, Санжарнинг "Нефтчи” билан тузган шартномаси ҳали якунланмаган.