Монтеррейда,
иккинчи кундирки ёмғир қуймоқда. Ҳатто, шаҳарнинг энг яхши
меҳмонхоналаридан бири ҳисобланган Президент Интерконтиненталь
меҳмонхонасининг айрим ерларидан чакка ўтаяпти. Бассейнлар тўлиб
кетмоқда.
Аэропортдан меҳмонхонага келаверишда йўлнинг чап томонидан ўзимизнинг
тоғлардаги сойга ўхшаган жарликларни кўрганда, нега бу ерда сув тўлиб
оқмаса ҳам шунақа кенг ва катта қилиб канал қазиб қўйишган деган савол
туғилган эди. Бир кун ўтмасдан ўзимиз жавоб топдик. Монтеррей тоғлар
орасидаги шаҳар. Бу ерда ёмғир фасли бўлиб, муайян бир вақт давомида
тинмай ёмғир ёғади. Тақдир экан, биз ҳам ана шу ёмғир фаслида Уругвай
терма жамоасига қарши чорак финал учрашувини ўтказамиз, шекилли.
Торреонда эканлигимизда, Гвадалаҳарадаги сунъий қопламали майдонни
телевизор орқали кўриб, ҳайрон қолгандик. Ҳа, барака топкурлар, Мексика
иссиқ мамлакат бўлса, қишда қор ёғиб майдон чимини совуқ уриб кетмаса,
нима қиласан сунъий қопламали майдон қуриб? А ўша пулни менга
бермайсанми, мен кўм-кўк чимдан гиламга ўхшаган табиий майдон қуриб
бермайманми?!
Гвадалаҳарада ҳам ёмғир кўп ёғади. Шу
сабабли ҳам шаҳар маъмурияти марказий стадионни сунъий қоплама билан
барпо этган. Монтеррейдаги ёмғирли об-хавони кўриб, биз ҳар ҳолда шундай
ҳулосага келдик. Чунки, мана шу тинмай ёғаётган ёмғир туфайли ҳам 2июн
куни бўлиб ўтадиган ўйин-олди расмий машғулотлари ФИФА томонидан бекор
қилиниши мумкин. Чунки, 45 дақиқадан 2 жамоа майдонда тўп тепса, ўйин
кунида бу ерда яхши футбол ўйнаб бўлмайди.
Терма жамоа
футболчилари ҳам бугун нам ва хўл майдонда машғулотлар олиб боришди.
Машғулотлар майдони ҳам ўзи водийга ўхшаб кетадиган Монтеррейнинг бир
чеккасида, аммо баҳаво жойида жойлашган. Оддийгина университетга қарашли машғулотлар майдонини кўриб, ҳавас
қиласан киши. Футбол ўйнаш учун барча шароитлар етарли. Бундан ташқари,
Торреонга яқин бўлганлиги учунми Монтеррей ҳам бизга секин-аста ўз
бағрини очаётганди. Машғулотларга келганимизда, қора булутлар тоғ
орқасига беркиниб, ёмғир тинган ва қуёш нурлари кўринаётганди.
1 июл куни эрталаб сув ҳавзаси ва тренажёр залида машғулотлар ўтказган
Ўзбекистон терма жамоаси куннинг иккинчи ярмида ФИФА томонидан
ажратилган мазкур майдонда машғулотлар ўтказди. Аввалига футболчилар
майдон четида тикланиш машқларини бажаришди, югуришди. Ундан кейин чигал
ёзди машқларига ўтилди.
Аҳмаджон Мусаев ҳамда Муродбек Исмоиловлар тўпни назорат қилиш
маҳоратини янада оширадиган машқларни ташкил қилишди. Алексей Рошин
дарвозабонлар билан шуғулланди. Алексей Евстафеев машғулотларни кузатиб,
керакли жойда танбеҳ бериб, футболчиларнинг хатоларини тўғрилади.
Руслан Шамсутдинов эса, зарур бўлганда футболчиларнинг тикланиш
жараёнини тезлаштирадиган воситалар орқали оёқларини уқалаб
мураббийларга ёрдам берди. Терма жамоа шифокори Рустам Меҳмонов эса,
Австралияга қарши ўйинда жароҳат олган Бобур Давлатов билан банд бўлди.
Дарвоқе, йигитлар
машғулот қилиб туришсин шу ерда, биз ғир этиб Монтеррейдаги шифохонага
бориб келамиз: Бобур Давлатов, Рустам Меҳмонов ва терма жамоа ёрдамчиси
Кристофер Поллет билан бирга.
Бугун Монтеррей марказий шифохонасида терма жамоанинг энг ёш аъзоси,
1996 йил 1 март куни таваллуд топган Бобур Давлатовнинг оёғи шифокор
назоратидан ўтказилди. Футболчининг жароҳати у қадар жиддий бўлмаса-да, Давлатовни бунга ишонтириб бўлмасди. У хавотир
оларди. Шифокор Рустам Меҳмонов катта мураббий Аҳмаджон Мусаевнинг
буйруғига кўра, Давлатовни рентген қилдирди. Натижа биз кутганимиздек:
Давлатов соппа соғ. Оёқларига ҳам ҳеч нарса қилмаган. Фақатгина қайрилиб
кетганлиги боис мушакларни лазер нурлари орқали даволаб, уқалаб туриш керак.
Мана шу гапни
эшитгач, Давлатовнинг юзига қон югурди. У энди оёғини бемалол босиб,
машғулотларда қатнашиш мумкинлигини ўзи англаб етди.
Машғулотларда Давлатов жамоадошлари билан тенгма-тенг шуғулланди
деёлмайману, аммо алоҳида дастур асосида майдон четида югуриб,
чигал-ёзди машқларини бажарди. Ўзининг ва шифокор Рустам Меҳмоновнинг
сўзларига кўра, Бобур Давлатов Уругвайга қарши ўйингача тузалиб кетади.
Австралияга қарши ўйинда Аббосбек Маҳсталиев ҳам бироз оқсоқланган эди.
Аммо, ундан умуман ҳавотир олмаса ҳам бўлади. Бугун жамоа сардори энг
фаол шуғулланган футболчилардан бири бўлди.
Машғулотлардан
сўнг, футболчилар меҳмонхонага келиб, сув-ҳавзасида шуғулланишди. Стол
тенниси ўйнашди. Сузиш машқларини бажаришди.
Шундан сўнг, кечки овқатни тановвул қилган футболчиларнинг Монтеррейдаги иккинчи куни ҳам ўз якунига етди.
Ўзбекистон Футбол
Федерациясининг матбуот хизмати Мексикада бўлиб ўтаётган Жаҳон
чемпионати мусобақалари ҳақидаги ахборот танқислиги муносабати билан
имкон қадар Ўзбекистонга Лотин Америкасида бўлиб ўтаётган ушбу мусобақа
ва унда иштирок этаётган ўсмирлар терма жамоасининг ҳаёти, машғулотлари,
яхши-ёмон кунлари ҳақида маълумот бериб бормоқда. Бу материаллар фото
ва видеорепортажлар билан бойитилмоқда. Сўнгги вақтларда видеолавҳалар
сони кўпаймоқда. Афсуски, баъзи веб-саҳифалар кундаликнинг фақат матнини
кўчириб ўзларида босиб чиқарганларида, кундаликка илова қилган
видеолавҳа ва фоторепортажларни чоп этмаяптилар. Якунда эса, ишқибозлар
вазиятни тўғри баҳоламасдан, бошқа манбалардан видео излашмоқда. Мабодо
сиз Мексикадаги кундаликларни биринчи бўлиб ўқиб, видеолавҳаларни энг
аввал томоша қилмоқчи бўлсангиз, бунинг қийин жойи йўқ. Ўзбекистон
Футбол Федерациясининг расмий вэб саҳифаси www.the-uff.com ни
очасиз ва ўша ерда мақолани ўқиб, унинг тагидаги фотосурат ва
видеолавҳаларни бемалол томоша қилиб, ахборотга бўлган эҳтиёжингизни
қондиришингиз мумкин. Ахборот олинаётганда уни тўғри манбадан ва ўз
вақтида қидиришни ҳам ўрганиш вақти етди, зеро бугун ишқибозлар ҳамма
ахборотни ҳам ўқимаяпти, улар маълумотларни чертиб-чертиб, саралаб
мутолаа қилмоқдалар.
2 июл, яъни эртага маҳаллий вақт билан соат 11:00 да бизнинг
меҳмонхонадан 5 дақиқалик йўл нарида жойлашган ФИФА делегацияси
истиқомат қиладиган Камино Реал меҳмонхонасида Уругвай ҳамда Ўзбекистон
терма жамоалари иштирокида ўйин-олди йиғилиши бўлиб ўтади. Унда ўйин
билан боғлиқ барча масалаларга жавоб олинади. Жумладан, Монтеррейга
Торреондан келиши кутилаётган Ўзбекистон терма жамоасининг фан клуби
аъзоларига ҳам чипталар берилади.
Дарвоқе, терма жамоа фан клубининг бир қисми бугун кечқурун Монтеррейга
етиб келди. Улар Ўзбекистон Республикаси байроқлари, Ўзбекистон Футбол
Федерацияси тайёрлаган футболка ва майкалар, дўппилар ва бошқа
атрибутикалар билан келишди. Фан клубнинг қолган аъзолари эртага келиши
режалаштирилган. Улар орасида фан клуб раиси, бизнинг терма жамоамизнинг
ёрдамчиси Кристофер Поллетнинг жияни Пиру Ламбаррй ҳам бор.
Поллетнинг сўзларига кўра, Ўзбекистон Уругвайни мағлубиятга учратадиган
бўлса фан клуб терма жамоани қўллаб-қувватлаган олис Гвадалаҳарага ҳам
боради. Бу сўзларни эшитарканман, ич-ичимдан ўйладим: "Аслида бизга
бегона, аммо яқинларимиз каби бизга меҳр қўйган ва дўстлашган бу
торреонликлар олдидаги қарзимизни қандай узамиз?”
САНЖАРБЕК РИЗАЕВ
ЎФФ МАТБУОТ КОТИБИ
|
