Бир ҳафталик танаффусдан сўнг Тошкентнинг «Локомотив» клуби аъзолари мамлакат биринчилигининг 2-босқич ўйинларига пухта тайёргарлик кўриш учун ўқув-машғулот йиғинига тўпланишди. Машғулотларда жамоа деярли тўлиқ таркиб билан иштирок этмоқда. Шунингдек, 2-лигада қатнашаётган «Локомотив-2» жамоасидан бир қатор умидли ёшлар асосий таркиб билан машғулот ўтамоқда.

21 июлдан 5 августгача давом этадиган ушбу йиғин Тошкент вилояти Дукент шаҳарчасида ташкил этилади. Машғулотларда асосий эътибор футболчиларни функционал ҳолатини яхшилашга қаратилади. Шу билан бирга йиғин давомида учта назорат-синов учрашуви ўтказиш ҳам режалаштирилган. Ўйинлар 24, 27 ва 30 июль кунлари ўтказилиши эҳтимоли юқори. Аммо, спарринг рақиблар номи ҳали маълум эмас. Дукентдаги йиғин якунига етгач, машғулотлар пойтахтга кўчади.