Иккинчи давра бошланиши арафасида «Навбаҳор» футбол клуби раҳбарияти ва
жамоа аъзолари иштирокида йиғилиш бўлиб ўтди. Мазкур йиғилишни ўтказишдан
асосий мақсад бош мураббий масаласига ойдинлик киритишдан иборат бўлди.
Давралар оралиғида Усмон Асқаралиев зиммасига вақтинчалик бош мураббий
вазифасини бажариш юклатилганди. ЎФФ ва ПФЛ томонидан қабул қилинган низомга
асосан олий лига жамоаларини бошқарадиган мураббийлар «Про» ёки «А»
лицензиясига эга бўлиши кераклиги кўрсатиб қўйилган. Айни пайтда Асқаралиевда
юқоридаги кўрсатилган лицензиялар йўқлиги боис ПФЛ мураббий масаласига иккинчи
даврага қадар ойдинлик киритиш талабини қўйганди.
Йиғилиш қатнашчилари ўз фикр-мулоҳазалари билан ўртоқлашишгач, бош
мураббийлик вазифасига бир неча йиллардан бери жамоада фаолият олиб бораётган
Мустафо Байрамов номзодини тавсия этилди. Йиғилиш қатнашчилари Байрамов
номзодини бир овоздан маъқуллашгани боис иккинчи даврада Мустафо Байрамов
«Навбаҳор» бош мураббийи сифатида фаолият олиб борадиган бўлди. Усмон
Асқаралиев эса жамоанинг катта мураббийи этиб тайинланди.
|