| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Июль » 18 » Ойбек Нурбоев: «Болалигимдан «Нефтчи» мухлисиман»
06:06 Ойбек Нурбоев: «Болалигимдан «Нефтчи» мухлисиман» |
Фарғонанинг «Нефтчи» клубида ҳамон авлодлар алмашинуви юз бераётганлигига қарамай, жамоа биринчи давра баҳсларини 4-поғонада якунлади. Бунда албатта, иқтидорли ёшларнинг ҳам муносиб ҳиссалари бор.
Айтайлик, 13-турда фарғоналиклар Косонсойда «Навбаҳор» меҳмони бўлиб, 2:0 ҳисобида ғалаба қозонишди. Ушбу ўйинда «Нефтчи»нинг иқтидорли ҳимоячиси Ойбек Нурбоев ҳисобни очди. Бу олий лигада дебют мавсумини ўтказаётган футболчининг дастлабки голи бўлди. Яқинда Ойбекка ўзимизни қизиқтирган бир нечта саволлар билан мурожаат қилдик.
- Ойбек, аввало, олий лигада голларингиз ҳисобини очганлигингиз билан табриклаймиз. «Навбаҳор»га қарши кечган ўша ўйиндан қандай хотиралар қолди?
- Табрик учун раҳмат. Дарҳақиқат, жорий мавсумда олий лигада дебютимни нишонладим. Наманган жамоаси дарвозасига урилган дастлабки голим бир умр ёдимдан чиқмаса керак. Бундан албатта, чексиз хурсандман.
Шуни таъкидлашим жоизки, «водий дербиси» баҳслари доимо жанговар тарзда ўтади. Шунга мувофиқ, мезбонлар бизга муносиб қаршилик кўрсатишга ҳаракат қилишди. Лекин уларга имконият бермадик ва муҳим уч очкони қўлга киритдик.
- Ўйиндан олдин ғалаба қозонишингларга қанчалик ишонч бор эди?
- Жамоамизнинг олдига ҳар бир ўйинда максимал натижага эришиш вазифаси қўйилган. Шу боис сафардан олдин фақат ютуққа кўз тиккандик, гарчи майдонда кураш оғир кечишини тушанган бўлсакда. Худога шукр, мақсадимизга эришдик.
- Жорий йил иккита «водий дербиси»да иштирок этдингиз. «Андижон» ва «Навбаҳор» клубларининг ўйинларида қандай фарқни илғадингиз?
- Ушбу икки жамоага қарши баҳсларни бир-бирига солиштириш қийин. Чунки «Андижон»ни ўз майдонимизда қабул қилдик (10-тур, 3:0). «Навбаҳор»га қарши эса сафарда тўп сурдик. Таъкидлаш жоизки, асосийси, икки ўйинда ҳам омад бизга кулиб боқди.
- «Нефтчи» биринчи даврани 4-поғонада якунлади. Бу натижа сизнингча, ҳаққоний бўлдими?
- Айрим учрашувларда ўз савиямизда ўйнамадик. Акс ҳолда, давралар оралиғидаги танаффусга 3-ўринни эгаллаган ҳолда чиқиб кетишимиз ҳам мумкин эди. Ҳали олдинда чемпионатнинг ярми турибди. Ҳал қилувчи даврада янада яхшироқ натижа кўрсатишга ҳаракат қиламиз, албатта. Мақсадимиз мавсум якунида кучли учликдан жой олиш.
- «Нефтчи»нинг ҳимоя чизиғида сиздан ташқари, бир қатор иқтидорли ёшлар ва тажрибали футболчилар тўп суришади. Шундай бўлсада, жамоанинг асосий таркибидан ўрин оляпсиз. Бунга қандай эришяпсиз?
- Дарҳақиқат, клубимизнинг ҳар бир чизиғида рақобат кучли. Шундай экан, машғулотларда астойдил тер тўкиб, ўз устимда қаттиқроқ ишлашга ҳаракат қиляпман. Бу эса ўз мевасини беряпти - мана, асосий таркибдан ўрин олдим.
- Бунда жамоа устози Юрий Саркисяннинг ишончи ҳам муҳим ўрин тутса керак...
- Нукуслик бўлсамда, болалигимдан «Нефтчи»га мухлислик қилганман. Сабаби бир пайтлари жамоа таркибида кумирим Неъматулла Қутибоев тўп сурарди. У қорақалпоғистонлик болалар учун ҳақиқий кумир эди. Кейинчалик «Жайхун» таркибида айнан Неъматулла аканинг қўл остида ўйнашга муваффақ бўлдим. «Нефтчи»да ўйнаш ниятим борлигини пайқаган мураббийимиз мени Юрий Вазгеновичга тавсия қилди ва ўтган йили жамоа кўригидан яхши ўтиб, фарғоналиклар сафига қабул қилиндим. Бир йил ўринбосарлар таркибида ўйнаганимдан кейин секин-аста бошланғич таркибга қўшилдим. Табиийки, Саркисянни ишончи мени олдинга чорлаяпти.
- Қорақалпоғистонда иқтидорли футболчилар кўп, бироқ олий лигада ушбу ҳудуддан жамоа йўқ...
- Ҳа, Қорақалпоғистонда истеъдодли футболчилар оз эмас. Лекин кучли ҳомийлар йўқ. Шунданми, бирор-бир жамоа олий лигада муқим жой ололмаяпти. Биз ҳам элитада жамоамиз бўлиши ва унда тўп суришни хоҳлаймиз. Аммо...
- Якунда шахсий биографиянгиз ҳақида ҳам тўхталсангиз...
- Оиламизда барча-барча футболга қизиқади. Шундай муҳитда ўсганим боис миллионлар ўйинига кучли меҳр қўйганман. Етти ёшимдан кўчада тўп тепишни бошлаганман. Сўнг Нукусдаги футбол мактаб-интернатига ўқишга кирдим. Бу ерни тамомлаганимдан кейин фаолиятимни «Жайхун»да бошладим. Шу тариқа катта футболга қадам қўйдим. Мамлакатимизнинг таниқли клубларидан бири - «Нефтчи»да юқори мақсадларга эришишни ният қилганман.
МАЪЛУМОТ УЧУН
Ойбек Нурбоев
Туғилган санаси ва манзили: 1988 йил 3 май, Қорақалпоғистон Республикаси, Нукус шаҳри
Футбол билан 10 ёшидан шуғуллана бошлаган
Биринчи мураббийи:Собит Мусаев
Нукусдаги футбол мактаб-интернатини тамомлаган
Амплуаси: ҳимоячи
Фаолияти: «Жайхун» (Нукус, 1-лига) - 2007-2009; «Нефтчи» (Фарғона) - 2010-...
Мухлислик қиладиган жамоалари: «Манчестер Юнайтед» ва «Реал»
Ёқтирган футболчилари: Рауль ва Серхио Рамос
манба: "ИнтерФУТБОЛ" газетаси.
|
|
Просмотров: 534 |
Добавил: 11x11
| Рейтинг: 0.0/0 |
| |
 | |  |
|
