Россия премьер лигасида ўз ўрнига эга бўлиб бораётган Маҳачқаланинг «Анжи» жамоаси билан ҳамкорлик қилиш борасида икки жамоа раҳбарлари келишиб олдилар. Одил Аҳмедов «Анжи»га кўчиб ўтганидан сўнг, унинг у ердаги фаолияти ҳам «Пахтакор»даги каби муваффақиятли кеча бошлади. Бунинг натижасида «Анжи» раҳбарларининг Ўзбекистон футболига бўлган муносабатлари тубдан ўзгарди ва улар доимий равишда "Пахтакор" билан ҳамкорликни йўлга қўйиш борасида, тошкентликлар билан келишиб олдилар. Табиийки бундан «Пахтакор» билан бирга Ўзбекистон футболи ҳам ютади. "Пахтакор", энг аввало ёшларга катта эътибор беришни ўз олдига биринчи рақамли мақсад қилиб қўйган. «Анжи» жамоаси ҳам, юлдузларни ҳарид қилиш билан чекланиб қолмасдан, ўз академиясига жиддий эътибор қаратишни мақсад қилган. Бу борада пойтахтликларнинг 10 йиллик тажрибаси бор. «Анжи» ва «Пахтакор» ўртасида нафақат футболчиларни алмаштириш, балки академия, маркетинг ва матбуот хизмати каби бўлимлар ўртасида ҳам ҳамкорлик ўрнатиш мақсад қилинган. Хабарингиз бор, куни кеча ҳуқуқий жиҳатдан «Анжи» клубига тегишли бўлган Грузия терма жамоаси аъзоси Ираклий Климиашвили "Пахтакор" билан шартнома имзолади. Ушбу траснфер юқоридаги ҳамкорликнинг илк натижасидир. Бундан кейин "Пахтакор" мухлислари, «Анжи» ва «Пахтакор» ўртасида йўлга қўйиладиган кўплаб ҳамкорлик меваларидан баҳраманд бўладилар.
www.pakhtakor.uz
|