| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Июль » 17 » Сервер Жепаров: «ЖАМОАМНИ ҲАМ СОЧ ТУРМАГИМНИ ҲАМ ЎЗГАРТИРДИМ»
10:10 Сервер Жепаров: «ЖАМОАМНИ ҲАМ СОЧ ТУРМАГИМНИ ҲАМ ЎЗГАРТИРДИМ» |
Ўтган ҳафтанинг мамлакатимиз футболига оид энг муҳим трансфер воқелиги - шубҳасиз, терма жамоамиз сардори Сервер Жепаровнинг Саудия Арабистонининг «Ал-Шабаб» клубига ўтиши бўлди.
Ўтган йили «Сеул» таркибида Жанубий Корея чемпионлигини қўлга киритган Сервер ўз имкониятларини Саудия чемпионатида ҳам синаб кўришни лозим топди. Маълумотларга қараганда, Сервернинг трансфери Саудия клубига 3 млн. 200 минг долларга тушган. Жепаровнинг ўзи эса «Шабаб» билан 3 йиллик шартномага имзо чеккан. Ярим ҳимоячимизнинг янги жамоаси сўнгги чемпионатда 4-ўринни эгаллаган бўлсада, мамлакат кубоги соҳиби сифатида ОЧЛ йўлланмасини қўлга киритди. Бу клубга машҳур мутахассис Мишель Прюдом устозлик қилади. Таъкидлаш жоиз, Сервер Корея «К» лигасида 31 та учрашув ўтказган ва битта гол киритган. Якшанба куни футболчимиз ўз оиласи билан Сеулдан қайтиб келди. Фурсатдан фойдаланиб, терма жамоамиз сардори билан эксклюзив суҳбат уюштирдик.
- Сервер, сизни узоқ танаффусдан сўнг яна Тошкентда кўриб турганимиздан хурсандмиз. Очиғи, сизнинг Саудия клубига ўтишингиз кўпчилик учун кутилмаган ҳолат бўлди. Умуман, музокаралар қачон бошланганди?
- Чамаси, бир ой олдин музокаралар жараёни бошланганди. «Ал-Шабаб» клуби вакиллари тўғридан-тўғри менга мурожаат қилишди. Ўз кучимни янги чемпионатда ҳам синаб кўришимни маслаҳат беришди. Таклифни обдон ўрганиб чиққанимдан сўнг саудияликларга ижобий жавоб бердим. Айтишим мумкинки, бу трансфер агентларнинг аралашувисиз амалга ошди.
- «Сеул» раҳбарияти кетишингизни қандай қабул қилди?
- Аввалига бунга рози бўлишмади. Кейин эса чиндан ҳам кетмоқчи бўлсам, хоҳишимга қарши бормасликларини айтишди. Ёдингизда бўлса, «Сеул» билан 3 йиллик шартнома имзолагандим. Келишувнинг эндигина ярми ўтганди. Тўғриси, бир қарорга келиш мен учун осон бўлмади.
- Мураббийлар штаби билан қандайдир муаммо ёки келишмовчилик юз бермаганмиди?
- Йўқ, ҳеч қандай. Бу мавзуда гап-сўз бўлиши мумкин эмас. Жамоа раҳбарлари, мураббийлар штаби, футболчилар ва мухлислар билан очиқ юз билан, яхши кайфиятда хайрлашдик.
- «Ал-Шабаб» билан қанча муддатга шартнома имзоладингиз?
- 3 йилга.
- Шартнома имзолаш маросими қаерда бўлиб ўтди? «Ал-Шабаб»нинг янги футболчиси сифатидаги таништирув маросими қачонга белгиланди?
- Шартномага Сеулда имзо чекдим. Кенг оммага расман таништирув маросимининг ўтказилиш санаси ҳозирча маълум эмас. Тахминан, август ойи бошларида бўлса керак.
- Сизнинг трансфер суммангиз турли манбаларда турлича талқин қилинмоқда. Саудия матбуотида бу сумма 3 млн. 200 минг доллар, дея кўрсатилмоқда. Аслида ҳам шундайми?
- Икки томон ўртасидаги келишувда трансфер суммам ошкор қилинмаслиги кўрсатилган. Шу боисдан, бу саволингизга жавоб бера олмайман.
- Бундан чиқди, йиллик маошингиз ҳақида сўрамасам ҳам бўларкан-да...
- (кулади) Ҳа, шундай қилсангиз яхши бўларди.
- «Сеул»дагидан кўра яхшироқми?
- Худди шундай. «Ал-Шабаб» томонидан таклиф қилинган шароитлар мени тўлиқ қониқтирди. Араб клубларининг легионерларга катта миқдорда маблағ сарфлаши ҳеч кимга сир эмас.
- Демак, Саудия клубига ўтишингизда моддий таклиф муҳим аҳамиятга эга бўлган. Шундайми?
- Қисман. Лекин мен масаланинг молиявий тарафини биринчи ўринга қўймаган бўлардим. Шунчаки муҳитни ўзгартиргим келди. «Сеул»га ўтган илк мавсумдаёқ Корея чемпиони бўлдим. Энди бу ҳолатни Саудия Арабистонида ҳам такрорлашга ҳаракат қиламан.
- ОФК расмий сайтига берган интервьюнгизда Саудия чемпионатидаги илк ўзбек футболчисига айландим, деган жумлани ишлатдингиз. Лекин сизни бу борада табриклай олмаймиз. Сабаби сизга қадар 1995-96 йилги мавсумда Азамат Абдураимов Макканинг «Ал-Ваҳда» жамоаси шарафини ҳимоя қилган. У 20 та ўйинда майдонга тушиб, рақиблар дарвозасини 10 маротаба ишғол қилган...
- Ростданми? Бу ҳақда аввал эшитмаган эканман. Мени ҳайрон қолдирдингиз. Тўғриси, буни менга ҳеч ким айтмаганди. Корея клубига ўтганимдан сўнг, Александр Гейнрих ва Темур Кападзелар ҳам менинг ортимдан эргашишганди. Ўйлайманки, яқин орада Саудия чемпионатида ҳам ўзбек футболчиларининг сони ортади.
- Янги жамоангиз сафига қачон бориб қўшиласиз?
- ЖЧ-2014 саралаш босқичи доирасидаги Қирғизистонга қарши ўтказиладиган ўйинлардан сўнг. 18 июлдан «Ал-Шабаб» Германияда янги мавсумга тайёргарликни бошлайди. Ушбу йиғиннинг ўрталарида клуб ихтиёрига етиб бораман.
- Корея иқлими, урф-одатлари бизга анча яқин эди. Саудиянинг жазирама иссиғи сизни чўчитмаяптими?
- Айни пайтда Кореяда ҳам жуда иссиқ иқлим ҳукмрон. Шундай экан, бу борада хавотирга ўрин йўқ.
- Нима деб ўйлайсиз: адаптация, яъни янги муҳитга мослашиш жараёни узоқ чўзилиб кетмасмикан?
- Авваллари миллий терма жамоа ҳамда клубларимиз таркибида бир неча маротаба Саудия заминида ўйнаганман. Лекин ҳозир вазият бутунлай ўзгача. Олдинлари 2-3 кунга борган бўлсам, энди бутунлай шу чемпионатда ўйнашимга тўғри келади. Ўйлайманки, бу жараён узоқ чўзилмайди.
- «Ал-Шабаб»да сизни нечанчи рақамли футболкада кўрамиз?
- Ҳали рақам танламадим.
- Бу 8, 88 ёки 30 рақамларидан бири бўладими?
- (кулиб) Шундай бўлишига умид қилиб қоламан.
- Бошқа таклифлар ҳам бормиди?
- Таклифлар етарлича эди. Кореянинг ўзидан бир нечта жамоа мени ўз сафида кўришни истаётганди. Шунингдек, бир қатор араб клублари ҳам ўз сафларига чорлашди. Лекин таклифлар орасидан «Ал-Шабаб» варианти менга кўпроқ маъқул келди.
- Россия клубларида тўп сураётган ўзбекистонлик футболчиларнинг сафи кенгайиб қолди. Аҳмедов, Турсунов, Марков премьер-лига, Акопянц, Ковалёв, Шишелов, Бикмаев, Галиулинлар 1-лига клублари шарафини ҳимоя қилишяпти. Сизда ҳам шундай имконият бир неча маротаба бўлганди. Лекин маълум сабаблар билан Россия премьер-лигасига кўчиб ўтишингиз амалга ошмай қолганди. Агар яна шундай таклиф бўлса, уни қабул қилармидингиз?
- Бўлмасам-чи. Билишимча, Россия клублари ҳам мен билан қизиқишган. Лекин ҳеч қандай расмий таклиф бўлмагани учун бунга ортиқ эътибор қаратмадим.
- Корея чемпионатига кўчиб ўтганингиздан сўнг соч турмагингизни ўзгартиргандингиз. Иссиқ иқлим ҳукмрон бўлган Саудия чемпионатида ҳам сизни ўзига хос услубда кўрамизми?
- Сизга кичик сирни очаман (кулади). Соч турмагимни ўзгартиришга улгурдим.
- Янги устозингиз Мишель Прюдом ҳақида нима дея оласиз?
- У билан ҳали кўришмадик. Интернет хабарлари асосида «Ал-Шабаб» жамоасини ўрганиш жараёнида бу мутахассис ҳақида ҳам маълумот тўплашга ҳаракат қилдим. Кўп давлатларда ишлаган. Тажрибали, шу билан бирга талабчан, қаттиққўл мураббий.
- Корея чемпионати борасидаги умумий хулосаларингиз қандай бўлди? «К» лигани Осиёнинг энг кучли чемпионати дейишади. Бу фикрга қўшиласизми?
- Ҳақиқатан ҳам шундай. Фикримни биргина мисол билан исботлашим мумкин. Ўтган йили «Сеул» мамлакат чемпионлигини қўлга киритганди. Бу йил эса собиқ жамоамнинг ишлари кўнгилдагидек эмас. Хатто 14-ўринга тушиб кетган пайтлари бўлди. Ҳозир ҳам «Сеул»нинг турнир жадвалидаги ўрнига ҳавас қилиб бўлмайди. Тасаввур қилинг, Ўзбекистон чемпиони бўлган жамоа келаси мавсумда аутсайдерлар қаторида юрса. Бизда бундай ҳолат яқин йилларда юз бермаса керак.
- Кореядаги ватандошларимиз - Кападзе ва Гейнрихнинг ўйинлари ҳақида қандай фикрдасиз?
- Саша «К» лигадаги дебют ўйинидаёқ бизга қарши тўп сурди ва амалдаги чемпион жамоа дарвозасига чиройли гол урди. Гарчи бизнинг дарвозамизни ишғол қилган бўлса-да, бундан хурсанд бўлгандим. Бошланиши чакки эмасди. Лекин сўнгги турларда у кўпроқ захирадан майдонга туширилмоқда. Балки мураббийлар Гейнрихни захирадан майдонга тушиб, ўйинни кучайтириши учун шундай йўл тутишаётгандир. Кападзе ҳақида эса фикрим ижобий. Ярим ҳимоячи бўлишига қарамай, ҳисобида 3 та гол бор. Қисқа фурсатда жамоанинг етакчисига айланди. «Инчхон» ҳам совринли ўринлар учун курашяпти. Агар Темур шу зайл ўз устида ишлашда давом этса, ҳозирги жамоаси таркибида узоқ ушланиб қолмайди. Эшитишимча, Кореянинг етакчи клублари аллақачон Кападзега қизиқа бошлашган.
- «Бунёдкор»даги собиқ жамоадошингиз Стевица Ристич яна Кореяга қайтди ва «Сувон Самсунг» клуби футболчисига айланди. У билан учрашишга улгурдингизми?
- Ҳа, Стево билан учрашдик. У билан кечки овқатни бирга тановвул қилдик. Гейнрихга энди бироз қийин бўлади. Унга ҳақиқий рақобатчи топилди. Ристич тўпурарлик қобилиятини намойиш этишга тушиб кетди. Сўнгги турда «Чуннам Драгонс» дарвозасини ишғол қилди. У 3-4 йил давомида Корея чемпионатида тўп сурган, «Поханг» таркибида мамлакат чемпиони бўлган. Шундай экан, унга қийин бўлмайди.
- «К» лигадаги чемпионат якунланганидан сўнг ўтказиладиган «плей-офф» тизимига муносабатингиз қандай?
- Менимча, бундай тизим дунёда фақат Кореяда бўлса керак. Авваллари бу ҳақда ҳатто эшитмагандим. Ўйлашимча, бу ерда бироз адолатсизликка йўл қўйилган. Узоқ ва машаққатли давом этган мавсумни пешқадам сифатида якунлаган жамоа учун чемпионлик кафолатланмаган. Турнир жадвалида кучли олтиликдан жой олган жамоалар ўзаро «плей-офф» босқичида чемпион номини аниқлашади. Яъни 6-ўриндаги жамоа ҳам «тож»ни кийиш имкониятига эга бўлади. Худди шундай воқеа юз берганди. Бундан 3 йил аввал мавсумни зўр-базўр 6-ўринда якунлаган «Похан Стилерс» клуби охир-оқибат «К» лига чемпионига айланганди. Ўшанда югурганники эмас, буюрганники бўлганди. Яна бир менга маъқул келмайдиган жиҳати бу - кучлилар сафини ҳеч бир жамоа тарк этмаслигидир. Бу ҳолат жамоаларда боқимандаликни юзага келтиради.
- Бу йилги олтин медаллар учун қайси жамоалар даъвогар бўлиб турибди? Сизнингча, якунда «улоқ« қайси жамоада кетади?
- Асосий даъвогарлар сифатида «Чонбук Моторс» ва «Похан Стилерс» клубларини эътироф этган бўлардим. Айниқса, яқин таъқибчиларидан сезиларли тарзда ўзиб кетаёган «Чонбук»нинг имкониятини юқори баҳолайман.
- Сервер, келинг, энди Кореядан Ўзбекистонга қайтсак. Миллий чемпионатимиз ўйинларини интернет орқали кузатиб бордингизми? Аввалги йиллар билан солиштирганда ўзгаришлар борми?
- Кузатиб бордим. У даражада катта ўзгаришлар йўқ, назаримда. Жамоалар икки қутбга ажралиб қолишган. Совринли ўринлар учун курашаётган 4-5 жамоа ва олий лигада ўз ўрнини сақлаб қолиш учун ҳаракат қилаётган қолган клублар.
- «Пахтакор»-«Бунёдкор» учрашуви ҳақида қандай фикрдасиз?
- «Дерби» тушунчаси бу йил «Эл-Классико»га айланди, десам янглишмаган бўламан. Бу галги ўйинни он-лайн тизимда кузатиб бордим. Тошкентга келганимдан сўнг такроран кўриб чиқдим. Мухлислар жуда чиройли, шиддатли ўйинга гувоҳ бўлишди. Ҳар икки жамоада ҳам гол уриш учун етарлича вазиятлар юзага келди. Лекин дарвозабон ва ҳимоячиларнинг маҳорати дарвозалар дахлсиз қолишини таъминлади. Кейин ҳар икки жамоа таркибидаги йўқотишлар ҳам ўйин натижасига таъсир ўтказди, деб ўйлайман. «Пахтакор»нинг бугунги шаклланаётган таркибига ҳавас қиляпман. Ёш футболчилар жорий мавсумда катта тажриба тўплашди. Ҳам миллий ва олимпия терма жамоаларида, ҳам ОЧЛ ўйинларида орттирилган тажриба келаси йили бу жамоанинг кучини белгилаб беради.
- Кўпчилик «Насаф» жамоасини чемпионлик пойгасидан чиқди, деб хисобламоқда. Сиз бу фикрга қўшиласизми?
- Менимча, чемпионлик учун кураш сўнгги турларгача давом этади. Шахсан мен иккинчи даврадан «сюрпризлар» кутяпман. Лекин чемпионатнинг ҳал қилувчи палласида «Насаф» ОФК Кубогида ҳам иштирок этаётган бўлади. Бу ҳолат қаршиликларнинг ўйинига бироз таъсир қилиши мумкин. Жамоа Осиёнинг нуфузи жиҳатидан иккинчи мусобақасида ғолиб чиқишга энг муносиб номзод бўлиб турибди.
- Миллий терма жамоамизнинг Австриядаги йиғинини ўтказиб юборяпсиз. Бу ҳолат расмий ўйинларда ўзининг салбий таъсирини ўтказмайдими?
- Йиғинда иштирок эта олмаётганимдан афсусдаман. Лекин вазият шундай бўлишини тақозо этди. Ҳозирда мураббийлар кўригидан бир неча нафар янги футболчилар ўтишяпти. Мураббийлар штаби ҳар бир позицияга икки нафардан тенг кучли футболчиларни танлаб олишни режалаштиришган. Бу қарорни қўллаб-қувватлайман. Ўзимга келсак, бу борада ҳавотирга ўрин йўқ.
- «Ал-Шабаб» клубига ўтишингиз бир қадам олдинга ташланган қадамми ёки..?
- Буни вақт кўрсатади.
|
|
Просмотров: 807 |
Добавил: 11x11
| Рейтинг: 0.0/0 |
| |
 | |  |
|
