Ўзбекистон терма жамоаси аралаш таркиби Австриядаги ўқув-машғулот йиғинлари доирасида ўзининг иккинчи учрашувини ўтказди. Бу сафар Вадим Абрамов шогирдлари Россиянинг "Ростов” клубига қарши майдонга тушиб, кескин курашлар остида кечган ўйинда 2:3 ҳисобида имкониятни бой беришди.

Биринчи бўлимда ростовликлар Игнатий Нестеров қўриқлаётган дарвозага жавобсиз учта тўп киритишга муваффақ бўлишди. Роман Адамов дублга эришган бўлса, яна битта гол болгариялик Чавдар Янков ҳисобига ёзилди.

Танаффусдан кейин майдондаги вазият тубдан ўзгарди ва гол уриш навбати ўзбекистонлик футболчиларга келди. Аммо "Ростов” ўйинчиларидан фарқли равишда улар бу ишни икки бора уддасидан чиқа олишди холос. Ҳар иккала голга ҳам Александр Шадрин муаллифлик қилди.

Эслатиб ўтамиз, Австриядаги ўқув-машғулот йиғинлари 18 июльга қадар давом этади. Шундан сўнг миллий терма жамоа аъзолари ЖЧ-2014 саралаш босқичи доирасида Қирғизистон билан бўладиган ўйинга Тошкентда ҳозирлик кўришади.

Ўртоқлик учрашуви
ЎЗБЕКИСТОН - РОСТОВ (РОССИЯ) 2:3 (0:3)
Голлар: Александр Шадрин (50, 88) - Роман Адамов (7, 20), Чавдар Янков (35)
Ўзбекистон:Игнатий Нестеров, Салим Мустафоев, Акбар Исматуллаев (Лутфулла Тўраев, 26), Ислом Тўхтахўжаев, Шавкат Муллажонов, Фозил Мусаев, Владимир Козак, Жасур Ҳасанов (Павел Соломин, 30), Олег Зотеев, Носир Отақўзиев, Александр Шадрин.