Ўзбекистон – Қирғизистон терма жамоалари ўртасида бўлиб ўтган учрашувдан аввал, ушбу терма жамоалар ўртасида энг кўп майдонга тушган футболчилар статистикасини берган эдик. Қизиғи шундаки, терма жамоамизнинг катта мураббийи Шуҳрат Мақсудов ва меҳмонлар бош мураббийи Марат Жумакеев 1992 ва 1994 йилларда бўлиб ўтган 3 учрашувнинг барида ўзаро бир-бирларига қарши майдонга тушганлар. Ҳимоячи Жумакеевга қарши тўп тепган Мақсудов, мазкур ўйинларда 3 маротаба гол урган.
Бу ҳақда Шуҳрат Мақсудовга ҳам айтдик.
«Тўғрисини айтсам, бу ҳақда биласдим. Ҳақиқатда ҳам қизиқ ҳолат. Бугун Қирғизистон терма жамоасининг олдида битта вазифа бор эди, имкон қадар кам гол ўтказиш. Шунинг учун ҳам улар бир ҳужумчи билан майдонга тушдилар ва асосий эътиборни ҳимояга қаратдилар. Бу тактика биринчи бўлимда ўз самарасини берди. Рақиб кучсиз бўлгани билан, бундай рақиб томонидан танланадиган тактика етарлича қийинчилик туғдириши маълум. Иккинчи бўлимда футболчиларимиз уч маротаба гол урдилар ва бунинг учун уларга раҳмат айтмоқчиман» – дейди Шуҳрат Мақсудов "Chempionat.uz"га берган интервьюсида.
- Бугунги Қирғизистон билан Сизга қарши ўйнаган жамоанинг ўртасида қандай фарқни сездингиз?
- Кўриниб турибди, улар ҳам футбол ўйнашни ўрганяптилар. Бу ёш жамоанинг келажаги бор.
- Мураббий сифатида, омаддан ташқари гол уриш учун яна нима етишмади деб ўйлайсиз?
- Ўзингиз кўрдингиз, биринчи бўлимда кўплаб вазиятларда биздан омад юз ўгирди. Футбол ва омад. Бунинг иккиси бир-бирига боғлиқ. Тўғри омад кучлиларга кулиб боқади, лекин омад бўлмаса ҳам қийин.