Хабарингиз бор, 23 июль куни Ўзбекистон миллий терма жамоаси учун 2014 йили Бразилияда ўтадиган жаҳон чемпионатига бўлган саралаш турнири старт олади. Ҳамюртларимиз 23 июль куни "Пахтакор” марказий стадионида қўшниларимиз – Қирғизистон термасини қабул қиладилар. Жавоб ўйини 28 июлга белгиланган. Тошкентдаги учрашув олдидан миллий терма жамоамиз фан-клуби ҳам ўзига яраша ҳозирлик ишларига киришмоқда. Жумладан, 21 ва 22 июль (пайшанба-жума) кунларига ишқибозларимизнинг Қирғизистон билан ўйинга тайёргарлик машғулотлари режалаштирилган. Ушбу машғулотлар "Пахтакор” марказий стадиони ҳудудидаги кичик аренада бўлиб ўтади. Иккала куни ҳам бошланиш вақти – соат 18:00да.
Мазкур йиғилишларга асосан икки жамоа - "Бунёдкор” ва "Пахтакор” фан-клублари аъзоларининг кўпчилик бўлиб келишлари табиий ҳол. Шу билан бирга, Ўзбекистон миллий терма жамоасининг фан-клуби бу тайёргарлик жараёнига мамлакатимизнинг бошқа жамоалари фан-клублари вакилларини ва Ватанимиз жамоасига бефарқ бўлмаган ҳар бир оддий мухлисларни ҳам таклиф этади.
Йиғилишлар якунида барча мухлисларга 12-13-рақамли фан-секторларга кириш чипталари тақдим этилади. Келинг, азизлар, Ватанимиз жамоасини ҳаммамиз биргаликда қўллаб-қувватлайлик!
|