"Бунёдкор" клуби расмий сайтининг хабарига кўра, Германияда фаолият юритувчи халқаро футбол тарихи ва статистикаси федерацияси IFFHS  дунё клубларининг янги рейтингини эълон қилди.

Унга кўра, мамлакатимиз чемпиони  224-ўрнини банд этиб турибди. "Қалдирғочлар” бу сафар ўтган ойдаги мавқеларини олти поғонага яхшиладилар.

Англиянинг "Эвертон”, Италиянинг "Парма” ҳамда "Сампдория”, Аргентинанинг "Бока Хуниорс”, Россиянинг "Локомотив” ва бошқа бир қанча номдор жамоалар "Бунёдкор”дан ортда боришмоқда.

Рейтингда Қаршининг "Насаф” клуби мамлакатимизнинг биринчи рақамли жамоаси сифатида кўрсатилган. "Аждарлар” 212-ўриндан 169-поғонага кўтарилиб олишди.

Тошкентнинг бошқа бир жамоаси "Пахтакор” эса 411-ўриндан 332-поғонага юқорилади.

Рейтингни эса ҳамон Европа  Чемпионлар лигасининг амалдаги ғолиби "Барселона” бошқариб бормоқда. Иккинчи поғонада эса Испаниянинг бошқа бир жамоаси – "Реал” жойлашган. Англиянинг "Манчестер Юнайтед” клуби бу ойда учинчи ўринга кўтарилди. "Порту” Европа суперкубогини бой бергач, рейтингнинг  тўртинчи поғонасига жойлашди.