| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Ноябрь » 25 » Айтишларича, “Андижон”нинг легионерлардан қарзи бор экан?!
18:06 Айтишларича, “Андижон”нинг легионерлардан қарзи бор экан?! |
Бугунги кунда мамлакатимиз футболи юксалиб бораётгани каби футбол журналистикаси ҳам жадаллик билан ривожланиб бормоқда. Шу сабабли ҳам юртимизда футболга оид хабарлар тез ва эркин тарзда оммага етказилмоқда.
Ўтган ҳафтанинг энг шов-шувли хабарлари қаторидан шубҳасиз, "Андижон” клубининг легионерларга ойлик маошларини бермаганлиги тўғрисидаги хабар ўрин олди, десак янглишмаймиз. Мухлису мутахассисларнинг диққат марказида бўлган мазкур хабарга ҳар ким ўзича фикр билдирди. Кимдир тарқатилган хабарнинг тўғрилигини тасдиқласа, яна кимдир бу хабарни шунчаки шов-шув бўлиш учун ёзилган деган фикрга келди.
Оммавий ахборот воситалари томонидан "Андижон” клуби легионерларга ойлик маош ва мукофот пулларини бермаганлиги тўғрисидаги хабар тарқалган вақтда хизмат сафари билан Андижон вилоятида бўлганлигим боис матбуотда эълон қилинган воқеликка ойдинлик киритиш мақсадида футбол клубида бўлдим.
Дастлаб, жамоа матбуот котиби Шуҳрат Жўраев билан боғланиб, жамоа футболчиларига берилган таътил ва легионерлар масаласида чиққан хабар бўйича маълумот беришини сўрадим. Мени клуб базасида кутиб олган ҳамкасбимиз биринчи навбатда андижонлик футболчиларга яратилган шарт-шароитлар билан таништирди. Унинг таъкидлашича, миллий чемпионатимиз якунига етгач, жамоа раҳбарияти футболчиларга қишки таътилга чиқиш учун рухсат беришган. Шу сабабли маҳаллий футболчилар айни пайтда ўз оила аъзолари билан бирга экан. Танишув жараёнида бўш вақтини унумли ўтказаётган молдовалик икки легионер Алексей Касьян ва ҳужумчи Александр Поповичнинг ўзаро бильярд ўйнаётганига гувоҳ бўлдим. Ўйин тугагач, ҳимоячи Алексей Касьян билан суҳбатлашишга муваффақ бўлдим.
- Алексей, эшитишимизча, клуб бир неча ойдан бери ойлик маошингизни бермаётган экан?
- Очиғи, бу гапни қаердан олганингизни билмадим. Жамоа менга иш ҳақимни ўз вақтида берган.
- Унда нега ҳамма қатори таътилга кетмадингиз?
- Аввало, шуни айтишим керакки, таътилда ватанимга бориш ёки бормаслик ўзимнинг ихтиёримда. Андижонда ушланиб қолишимга келсак, Молдовага учиш учун ҳафтада бир бора рейс амалга оширилар экан. Шу сабабли бўш ўринлар бўлмаганлиги учун юртимга бориш бир оз чўзилиб кетди. Насиб қилса, 25 ноябрь куни Тошкент-Киев-Кишинёв йўналиши бўйича Молдовага учаман.
- Молдовада кўп қоласизми?
- Тўғрисини айтсам, Андижондан кетгим келмаяпти. Аммо ҳаммага бир вақтда таътил берилган экан, мен ҳам уйга бориб келишим лозим. Қолаверса, жамоам билан келаси йилнинг 31 ноябрига қадар шартнома имзолаганман. Молдовадан қайтишимга келсак, клуб мураббийи декабрь ойидан бошлаб янги мавсумга тайёргарлик кўришни режалаштирган. Мураббий чақириши билан ҳар қандай шароит бўлмасин жамоа сафига келиб қўшиламан. Шу сабабли юртимда қанча вақтгача қолишимни билмайман.
- Умуман олганда, клуб раҳбариятининг легионерларга бўлган муносабати қандай?
- Мен ҳали бирор жойда легионерларни бунчалик ҳурмат қилишини кўрмаганман. "Андижон” билан шартнома имзолашим билан раҳбарият мен сўраган барча шарт-шароитларни яратиб берган. Жамоада бирор бир ишни амалга оширмоқчи бўлсам улар ҳеч иккиланмасдан менга ёрдам беришади. Сўзимни исботи сифатида бир гапни айтмоқчиман. Шахсан Фозил аканинг ёрдами билан ёзги таътил вақтида ватанимга бориб, уйландим. Сўнг Андижонга оила аъзоларимни ҳам олиб келдим. Келишим билан раҳбарият мени оилам билан бирга бўлишим учун барча шароитларни яратиб берди. Бунинг учун "Андижон” жамоаси раҳбарияти ва Фозил акага ўз миннатдорчилигимни билдираман.
Легионер футболчилар билан суҳбат давомида уларнинг Андижондан олган таассуроти катта эканлигига амин бўлдим. Улармаҳаллий футбол ишқибозлари билан бўш вақтларида бемалол суҳбат қуриши, айрим пайтларда Андижон шаҳрини томоша қилишга ҳам чиқишар экан. Ушбу суҳбатдан сўнг клуб ижрочи директори Фозил Мирзаев билан учрашдим. Табиийки, учрашув жараёнида дастлабки саволим матбуотда чоп этилган "Андижон” клубининг легионерларга бўлган муносабати ҳақида бўлди.
- Фозил ака, тарқатилган хабарларга қараганда жамоа легионерлардан ҳанузгача қарзи бор экан?
- Тўғриси, матбуотда чоп этилган бундай хунук хабарни эшитиб, ҳайрон қолдим. Бизнинг бирорта легионеримиз ёки бирор бир ходимимиз билан алоқада бўлмасдан туриб, журналист нимага асосланиб бундай хабарни тарқатганлигига ҳанузгача тушунолмай келаяпман. Энг ёмони шундаки, футболчилардан қарзимиз бўлмаса-да, қайсидир футболчи номидан журналист Ўзбекистон футбол федерацияси Президенти Мираброр Усмоновдан клубда қолиб кетган ойлик маошларини олишда ёрдам беришини сўраган.
- Балки ҳақиқатдан ҳам бирор бир легионер футболчи шикоят қилгандир?
- Мазкур хабар тарқалгандан сўнг клубдаги барча ходимлар билан гаплашиб чиқдим. Аммо бирортаси бу ҳақда ҳеч нима билмаслигини айтишди. Қизиғи шундаки, легионер футболчиларимизнинг бирортаси ўзбек журналистларини танишмайди. Шу сабабли журналист нимага асосланиб, бундай хабар берганига ҳайронман.
- Умуман олганда клубнинг футболчилардан қарзи қанча?
- Қарз ҳақида гап бўлиши мумкин эмас. Мана, ишонмасангиз "ведимость”ни кўришингиз мумкин. Ґамма футболчилар тўлиқ ойлик маошларини олиб бўлишган.
- Легионерлар билан тузилган шартнома муддати қачонгача белгиланган?
- Икки нафар молдовалик легионеримиз - ҳимоячи Алексей Касьян ва ҳужумчи Александр Поповичларнинг шартнома муддати 2012 йилнинг 31 ноябргача белгиланган. Шунингдек, Юрий Целих – янги йилнинг 1 февралига қадар жамоа ихтиёрида бўлади. Фақатгина Александр Половковнинг шартномаси ноябрь ойи охирида якунига етади.
- Умуман олганда, сўнгги вақтларда матбуотда "Андижон” жамоаси кўпроқ тилга олинмоқда. Бунинг сабаби нимада деб ўйлайсиз?
- Халқимизда мевали дарахтга тош отилади, деган гап бор. Жамоамиз фаолияти билан кўпчилик қизиқаётган экан, демак, турли хил хабар тарқалаверади. Фақатгина уларнинг ичида аниқ манбаага асосланган хабарлари кам ҳисобланади.
Ўзингиз гувоҳи бўлганингиздек, жамоа ижрочи директори ва клуб легионерларининг фикрлари бир хил. Ваҳоланки, молдовалик футболчилар билан суҳбат чоғида Фозил Мирзаев мени "Андижон” клубида эканлигимдан бехабар эди. Шу боис ҳам матбуотда тарқалган "Андижон” клубининг легионерлар маошини бермаганлиги тўғрисидаги хабар қанчалик тўғри ёки нотўғрилиги ҳақида хулоса чиқариш ўзингизнинг ихтиёрингизда. Биз фақатгина юзага келган муаммо аслида қандай даражада ҳақиқатга яқин эканлигини билишга ҳаракат қилдик, холос.
Фарҳод НОРБЎТАЕВ
Манба: «FutGOL» газетаси
|
|
Категория: Ўзбек футболи |
Просмотров: 548 |
Добавил: 11x11
| Рейтинг: 0.0/0 |
| |
 | |  |
|
