Кипрнинг "Апоэл” жамоаси барчани ажаблантиришни давом эттирмоқда. Оролликлар Чемпионлар лигасида муваффақиятли иштирок этишдан ташқари, жорий йилдаги еврокубоклар рейтингида пешқадамга айланиб олишди.

"Барселона” ҳозирча олтинчи

Европа Чемпионлар лигасининг амалдаги ғолиби "Барселона” ушбу мавсумдаги рейтингда ҳозирча олтинчи ўринда бормоқда. Гвардиола шогирдларининг ҳисобида 11 очко мавжуд. Рейтингни эса юқорида айтганимиздек, Кипрнинг "Апоэл” клуби бошқариб бормоқда. Кипрликлар саралаш босқичидаги натижалар ҳисобига етакчига айланишган. Гуруҳ босқичининг тўртинчи турнидан кейин "Апоэл” тўплаган очколар 14,5 га етди. Иккинчи ўринда "Бавария” ва "Бенфика” бормоқда. Бу икки жамоа ҳисобида 13 очкодан бор. Кейинги ўринларни "Арсенал” ва "Реал” банд этган. Испания ва Англия пойтахти шарафини ҳимоя қиладиган клубларда 12 очкодан мавжуд.

"Барселона”, Сток Сити”, "Фулхэм” ва "Виктория” жамоалари 11 очко тўплашга муваффақ бўлишган. Россия клублари орасида "Зенит”нинг кўрсаткичи яхши. Питерликлар айни дамда 9 очко жамғаришган.

Португалия кучли бешликда

Охирги йилларда португал клублари еврокубокларда омадли иштирок этишмоқда. Ўтган мавсумда Криштиану Роналду ватандошлари Россияни ортда қолдиришганди. Бу йил эса Португалия УЕФА рейтингида бешинчи ўринга кўтарилиб олди. Ўз навбатида Франция олтинчи поғонага тушиб кетди. Яна бир неча йилдан кейин мухлислар кучли бешлик деган иборани унутиб юборишса ажаб эмас. Зеро, бу ёғига фақат триолар юзага келмоқда. Биринчи учликда Англия, Испания, Германия. Иккинчи триода Италия, Португалия, Франция. Ниҳоят сўнгги учликда Россия, Украина, Голландия.

Шу ўринда Қозоғистон ҳақида тўхталмасдан иложимиз йўқ. Қўшниларимиз ҳозирда УЕФА рейтингининг 40 поғонасидан жой олишган. Бу албатта, қозоқлар учун яхши натижа. Негаки, Европанинг айрим кучли мамлакатлари қозоқлардан ортда қолмоқда.