Дам олиш кунлари Европанинг бир қатор мамлакатларида миллий биринчиликларнинг навбатдаги турлари бўлиб ўтди. Кучли бешликда чемипонат баҳслари энг қизғин палласига кирган бўлса, айрим биринчиликлар ўз поёнига етиб бормоқда. Хусусан, якунига етган ҳафтада бир нечта мамлакатда чемпион номи маълум бўлиб улгурди. Бугунги мақоламизда анна шулар хусусида сўз юритамиз.

"Шахтёр”ва Кумиковнинг биринчи олтини

Қозоғистонда чемпионанга якун ясалди. Охирги турда "Остона”ни мағлубиятга учратган Қараганданинг "Шахтёр” жамоаси ўз тарихида биринчи марта олтин медални қўлга киритди. Ушбу жамоани биз учун таниш бўлган мутахассис – Виктор Кумиков бошқармоқда.

Кумуш медал эса ҳамюртимиз Улуғбек Бақоевнинг собиқ клуби – «Жетису”га насиб этди. Охирги турда мағлубиятга учраган «Остона” бронза медални "Актобе”га бой бериб қўйди.

"Охирги турда мағлубиятга учрашга ҳақимиз йўқ эди, дейди "Шахтёр” устози Виктор Кумиков.  - Айтиш жоизки, бугунги об ҳаво ҳам вазифамизни анча мураккаблаштирди. Шундай бўлса-да, жамоа масъулятни ҳис этган ҳолда мақсадга эришди. Биринчи навбатда бизни ҳар доим қўллаб-қувватлаб келган мухлисларимизни ушбу чемпионлик билан табриклайман”,- деб сўзини якунлади россиялик мутахассис.

"Мольде" ва Сульшернинг муваффақияти

Норвегия чемпионати якунланишига икки тур қолган бир пайтда олтин медал эгаси аниқ бўлиб улгурди. Айни дамда "Манчестер Юнайтед”нинг собиқ ўйинчиси Оле Гуннар Сульшер бошқараётган "Мольде” жамоаси чемпионликни тантана қилди. Уларга энг яқин таъчибчиси "Русенборг” ёрдам бериб юборди.

38 ёшли мутахассис "Мольде”ни биринчи марта чемпионликка олиб келди.

"Кулиб турквчи жаллод” лақабини олган собиқ футболчи ушбу жамоани 2010 йилнинг ноябрь ойидва қабул қилиб олганди. Қисқа фурсат ичида олтин медалга сазовор бўлди.

"Ғалабаларимизнинг асосий сабабчилари футболчилар бўлишди, деб шогирдларини мақтамоқда "МЮ”нинг собиқ ўйинчиси. – Шогирдларим машғулот жараёнида ва ўйин пайтида тинимсиз меғнат қилишди. Бунинг натижасида биринчи марта чемпион бўлдик”,- деб сўзини якунлади Сульшер.

Бронза муносиб "ювилди”

Қозоғистон ва Норвегиядан фарқли улароқ Литва чемпиони ва кумуш медал соҳиби анча олдин аниқланганди. Чемпионат якунланишига уч тур қолганда эса бронза медалнинг соҳиби ҳам маълум бўлди.

"Экранас” олтин медални қўлга киритган бўлса, Литванинг яна бир машҳур жамоаси "Жальгирис"га кумуш медал насиб этди. Ниҳоят, учинчи ўринга "Судува" жойлашди.

Ушбу жамоа бронза медални муносиб тарзда ювди. Аниқроғи, ушбу турда Марияпол шаҳри шарафини ҳимоя қиладиган клуб рақиби дарвзоасига жавобсиз 13 та тўп киритди. Натижада "Судува"дан жой олди. Айтиш жоизки, мавсум бошида бу жамоа олдига айнан совринли ўринлардан бирини эгаллаш вазифаси қўйилганди.

"Менинг шогирдларим ўзларини профессиналлар каби тутишди ва ўз ишларига катта масъулият билан ёндошишди. Бугунги ўйинда янаям кўпроқ гол киритишимиз мумкин эди.  Алам қилаётгани охирги турлардагина юқори спорт формасига кирдик. Мавсум бошида камида учинчи ўринни эгаллашни мақсад қилгандик. Демак, вазифа бажарилди. Бунинг учун барча футболчилардан миннатдорман», - дейди "Судува" бош мураббийи Виргиниюс Любшис.

"Левадия” медалсиз қолди, "Флора” эса...

Эстония эса чемпионат ўзининг энг қизғин палласига кирди. Бу ерда ҳам кучли учлик аниқланган бўлса, олтин медал кимга насиб этиши ҳамон сўроқ остида қолмоқда. Навбатдаги турда дуранг ўйнаган "Флора” 10 чемпионлик учун жуда яқинлашди.  Мамлакатнинг энг номдор жамоаси "Левадия” ўз тарихида биринчи марта медаллардан қуруқ қолди.

Қизиғи шундаки, "Флора”нинг дуранг ўйнаши оқибатида учинчи ўринга "Транс” чиқиб олди. Шундай бўлса-да, чемпионлик масаласи охирги турда аниқланади.

"Бахтимизга ҳаммаси ўз қўлимизда. Бошида анча қийинчиликларга дуч келдик. Лекин футболчилар барчасига сабр қилишди ва навбатдаги олтин учун бир қадам қолди. Хурсанд бўлишга ҳали эрта. Бизни яна битта мураккаб учрашув кутиб турибди. Бўлажак рақибимиз ҳам анойи эмас. Расман чемпион бўлгач, уни нишонлашимиз керак”, - дейди "Флора” устози Рейм.

Аброр Деҳқонов тайёрлади