"Олтин тўп” соврини учун асосий даъвогар саналган "Барселона” ҳужумчиси Лео Месси "Франс Футбол” нашрига интервью берди.  Аргентиналик футболчи қаторасига учинчи бор нуфузли мукофотни қўлга киритишга яыин турибди. Бундан олдин бундай натижани УЕФАнинг ҳозирги президенти Мишель Платини қайд этганди. Франциялик собиқ футболчи қаторасига уч марта "энг яхши футболчи” дея тан олинганди.

- Ўйлашимча, бу йил ҳам менинг асосий рақобатчиларим ўтган йилдаги каби Хави, Иньеста ва Роналдулар бўлишади. Учинчи бор "Олтин тўп” соҳиби бўлиш ниятим йўқ эмас. Шунда афсонавий футболчилар Платини, Кройф ва Ван Бастенлар билан тенглашиб олсам зўр иш бўларди. Биламан, ҳозирга қадар фақат Платининига қаторасига уч марта "олтин тўп”ни қўлга киритган, холос.  Демак, менда ҳам ушбу рекордни янгилаш имконияти бор. Агар бу йил энг яхши футболчи бўла олмасам ҳам хафа бўлмайман. Негаки, ҳали менинг фаолиятим олдинда – дейди Месси.

Одатдагидек ўзини камтар тутган Месси финал босқичига йўл олишини катта муваффақият сифатида тан олиши билдириб ўтди. Қизиғи шундаки, ўтган йили ҳам аргентиналик футболчи шундай сўзларни айтганди.

- Яна такрор айтаман. Номходлар орасида бўлишнинг ўзи катта бахт. Лекин "Олтин тўп”ни қўлга китиришнинг ўзига яраша завқи бўлса керак, деди Месси.

Журналистлар билан мулоқот чоғида "Барса” ҳужумчиси футбол тарихидаги энг яхши футболчи ким деган саволга ҳам жавоб бериб ўтди. Унинг айтишича, Пеленинг ўйинларига баҳо бериши қийин экан.

- Мен ҳеч қачон Пеленинг ўйинларини майдонда кўрмаганман. Шунинг учун бу борада жуяли фикр билдира олмайман. Аммо кўпчиликнинг унинг фантастик ўйинчи бўлганини айтади, деб баёнот берди Лео.

Шунингдек, қаламкашлар аргентиналик ҳужумчидан дунёнинг энг кучли футболчиси ким деган саволга ҳам жавоб олишга интилишди. Бу борада Леонинг фикри қуйидагича бўлди.

- Биласизми, мен дунёнинг тенгсиз футболчиси бўлиш учун майдонга тушмайман. Менга қандай баҳо беришлари ҳам мени қизиқтирмайди. Ҳар бир учрашувда жамоамга фойда бериш учун тўп сураман. Менинг шахсий ютуқларим "Барселона” ғалабалари олдида ҳеч нарса эмас. Мен учун биринчи ўринда клубимнинг муваффақияти туради. Менинг мақсадим фаолиятимни тугатганимдан кейин мухлислар мени ёрқин хотиралар билан эсга олишсин. Жамоавий ва шахсий совринларим билан фахрланишни, уларни болаларимга кўрсатишни истайман.  

Кечирасизу, мен ўзимга-ўзим баҳо бера олмайман, дея таъкидлайди Месси.

Месси учун якунига етган мавсумнинг энг яхши ўйини Чемпионлар лигаси финали бўлди, десак муболаға бўлмайди. "Уэмбли” стадионида бўлиб ўтган баҳсда аргентиналик футболчи "МЮ” дарвозасига гол киритди. Унинг жамоаси эса "қуҳна қитъа”нинг тенгсиз клубига айланди.

- Лондонда киритган голларимдан ташқари, "Реал” дарвозасига йўллаган иккита тўпим биз учун муҳим аҳамият касб этарди. Умуман олганда "Қироллик клуби” билан бўлган тўқнашувларни сўз билан ифодалаб бўлмайди, дейди Леонель.

Аргентиналик футболчи йилнинг омадсиз учрашуви дея Испания Кубоги финалини тан олди. Бундан ташқари, Копа Америка турнири ҳам Леода ёмон хотирот қолдирганига урғу бериб ўтди.

- Ростини айтсам, Копа Америка мусобақасида омадсиз иштирок этишимизни умуман кутмаган эдим. Афсуски, чорак финалда Уругвайга пенальтилар сериясида  ютқазишга лойиқ эмасдик, деб афсусланади Лео.

Терма жамоа мавзусини давом эттириб, Месси қандай қилиб сардор бўлганини айтиб ўтди.

- Ҳаммаси одатдагидек содир бўлди. Бир куни терма жамоа бош мураббийи  Алехандро Сабелья менга сардор бўлишни тавсия этди. Мен бу таклифга иккиланмай рози бўлдим.

Батитса даврида ҳам у менга шундай таклиф билан чиққанди. Лекин мен Маскерано сардор бўлиб қолишини айтгандим.

Асли олганда, сардорлик боғичини тақишкатта маъсулиятни табал этди. Бошқа томондан эса бунинг қулайликлар кўп.

Ўз навбатида Мееси "Барселона” ҳали жуда эрта эканлигини таъкидлаб ўтди.

 - "Барселона”нинг ўз анъанаси бор. Сардорлик боғини энг тажрибали  ўйинчига берилади. Айни дамда улар сони "Барса”да жуда кўп. Лекин ишончим комилки, бир куни менга ҳам навбат тегиб қолади, деб сўзини якунлади Лео Месси.

Маълумот ўрнида

Даъвогарлар 23та қолди

Маълумотларга кўра, ФИФА "Олтин тўп"га номзодларни 50 тадан 23 тагача қисқартирди. Биринчи рўйхатда "Барселона”нинг 10 нафар футболчиси жой олган бўлса, бу сафар улар сони 8 нафарни ташкил этди.

ФИФА расмий сайтининг хабарига кўра рўйхатга қўйидаги футболчилар киритилган: Эрик Абидаль (Франция, "Барселона"), Серхио Агуэро (Аргентина, "Манчестер Сити"), Карим Бензема (Франция, "Реал"), Икер Касильяс (Испания, "Реал"), Криштиану Роналду (Португалия, "Реал"), Даниэл Алвеш (Бразилия, "Барселона"), Самуэль Это`О (Камерун, "Анжи"), Сеск Фабрегас (Испания, "Барселона"), Диего Форлан (Уругвай, "Интер"), Андрес Иньеста (Испания, "Барселона"), Лионель Месси (Аргентина, "Барселона"), Томас Мюллер (Германия, "Бавария"), Луиш Нани (Португалия, "Манчестер Юнайтед"), Неймар (Бразилия, "Сантос"), Месут Ўзил (Германия, "Реал"), Жерар Пике (Испания, "Барселона"), Уэйн Руни (Англия, "Манчестер Юнайтед"), Бастиан Швайнштайгер (Германия, "Бавария"), Уэсли Снейдер (Голландия, "Интер"), Луис Суарес (Уругвай, "Ливерпуль"), Давид Вилья (Испания, "Барселона"), Хави Алонсо (Испания, "Реал"), Хави ("Барселона).

Аброр Деҳқонов тайёрлади