Эртага Вадим Абрамов бошчилигидаги Ўзбекистон олимпия терма жамоаси Лондон Олимпиадаси саралаш босқичи доирасида сафарда Амирлик олимпиячиларига қарши майдонга тушади. Ушбу муҳим баҳсга  вакилларимиз  қизғин ҳозирлик кўришди. Бугунги мақоламизда ана шу йиғин ҳақида  сўз юритамиз.

Тошкентдаги йиғин

Ўзбекистон олимпия терма жамоаси 8 ноябрь куни Тошкентда навбатдаги ўқув-машғулот йиғинларига киришди.

"Ўзбекистон” меҳмонхонасида истиқомат қилган терма жамоа аъзолари  шу куни эрталаб дастлабки машғулотни "Пахтакор” марказий стадионида ўтказишди. Аниқроғи, енгил югуриш машқлари бажарилди холос.

Мазкур йиғинда Россиянинг иккинчи дивизион вакили "Нефтехимик” клубида тўп сураётган Даврон Мирзаевнинг келмаслиги маълум бўлди. Мураббийлар буни ҳужумчи олган жароҳатидан ҳали бутунлай фориғ бўлмаганлиги билан изоҳлашди.   

12 ноябрь куни эса олимпиячилар Ўзбекистон миллий терма жамоаси билан назорат учрашувини ўтказди. Ўйинда бош жамоамиз 4:3 ҳисобида ғалаба қозонди.

Баҳрайнга 21 нафар футболчи билан

Вадим Абрамовнинг иккинчи жамоаси 16 ноябрь куни  эрталаб 08:30 да Шаржа орқали Манамага учиб кетди. Терма жамоа мураббийлар штаби сафарга 21 нафар футболчини олиб кетишга қарор қилди. Дилшод Раҳматуллаев ва Владимир Козак жароҳати туфайли Тошкентда қолди. Шунингдек, Отабек Валижонов ва дарвозабон Виктор Мочаловга ҳам таркибдан жой тегмади. Уларнинг ўрнини, Даврон Ҳошимов ва Николай Гурьяновлар тўлдиришди.

Муҳим ўйинлар олдидан дуранг

Пайшанба куни Ўзбекистон олимпия терма жамоаси Манамадаги "Миллий” стадионда Баҳрайн олимпия терма жамоасига қарши ўртоқлик учрашувини ўтказди.

Биринчи бўлим тенг курашлар остида ўтди ва томонлар дарвозага йўл топа олишмади. Иккинчи бўлимда ҳар иккала жамоа ўйинида жонланиш кўзга ташланди. Учрашувнинг 48-дақиқасида Саад мезбонларни ҳисобда олдинга олиб чиқди. Шундан кейин Вадим Абрамов шогирдлари ҳисобни тенглаштиришга астойдил ҳаракат қилишди. Бу иш ўйин якунланишига 1 дақиқа қолганида амалга оширилди. Захирадан майдонга туширилган Олег Зотеев ҳимоячиларнинг хатосидан унумли фойдаланиб, мувозанатни тиклади – 1:1.

Учрашувдан кейин Вадим Абрамов ўйин ҳақида ўз фикрларини билдириб, узоқ муддатли парвоздан кейин чарчоқ аломатлари бироз сезилганлиги ҳақида маълум қилди. Шунингдек, амирлик айғоқчиларга сирларни ошкор қилмаслик учун аралаш таркибни майдонга туширганини ва БААда умуман бошқача ўйин бўлишини таъкидлаб ўтди.

Ўзбекистон олимпия терма жамоаси делегацияси Манамадан Дубай шаҳрига учиб кетди ва у ерда  эртага БААга қарши кечадиган беллашувга тайёргарлик кўради.   

Баҳрайн ОТЖ – Ўзбекистон ОТЖ - 1:1 (0:0)

Голлар: Саад 48, - 1:0. Олег Зотеев 89, - 1:1.

Ўзбекистон: Санжар Қувватов, Даврон Ҳошимов, Бобуржон Омонов, Жаҳонгир Меҳмонов, Салим Мустафоев, Шерзодбек Каримов, Фозил Мусаев, Ойбек Қиличев, Жасур Ҳасанов, Николай Гурьянов, Павел Смоляченко.

Сингапурлик ҳакамлар

Эртага бўлиб ўтадиган ўйинни сингапурлик ҳакамлар бригадаси бошқаради. Бош ҳакам Абдул Башир Маликга ён чизиқларда унинг ватандошлари Гек Фенг Гох ва Тан Ю Мун кўмаклашадилар. Захирадаги ҳакам ҳам Сингапурдан – Лео Хо. Учрашув комиссари эса Ким Ёнг Жу (Жанубий Корея).

Эслатиб ўтамиз, ўйин Ал Айн шаҳридаги "Халифа” стадионида бўлиб ўтади. Учрашув Тошкент вақти билан 19:20да бошланади.