Лондоннинг «Тоттенхэм»
клубида тўп сураётган россиялик ҳужумчи Роман Павлюченко "Спорт Эскпресс” нашри
мухбири билан суҳбатда бўлди. Мусоҳаба давомида рус футболчиси унга қизиқиш
билдираётган жамоалар хусусида айтиб ўтди. Таъкидлаш жоизки, Павлюченко
аллақачон "шпорлар” захирасига михланиб қолган.
- Яқинда Қурбон Бердиев
сизга Россиядан таклифлар бўлаётгани ҳақида гапириб ўтди. Ҳақиқатдан ҳам шундайми?
- Билмадим. Эҳтимол туркманистонлик мутахассис сайтлардаги янгиликларни
ўқигандир. Улар мени ҳар ҳафта дунёнинг турли бурчакларига жўнатиб юборишяпти.
Қаерда футбол ўйнашса мен ўша ерга "бориб келдим”.
- Айтишларича, "Рубин” ҳам
сиз билан жиддий қизиқаётган экан. Бу ҳақда эшитдингизми?
- Бундан хабарим йўқ. Албатта бош мураббийнинг ўзидан бундай гапларни
эшитиш ёқимли. Охирги пайтларда "Рубин” анча мазмунли футбол намойиш этмоқда.
- Сиз Россиянинг икки
жамоасига ўтишингиз мумкин – ЦСКА ёки "Зенит”.
- Ҳа.
- Айтайлик, қишда сизда
иккита йўл пайдо бўлди. Лондонда қолиш ёки Москвага қайтиш. Қандай қарорга
келган бўлардингиз?
- Билмадим. Бир қарорга келишдан олдин яхшилаб ўйлаб курардим. Лекин
ҳозир менга аниқ таклифлар бўлгани йўқ. Шундай экан эҳтимоллар назариясидан
четроқда юрганимиз маъқул. Январда нима бўлишини билмаймиз-ку.
- Лондондаги ҳаёт тарзи ва
оилангизнинг фикри муҳим аҳамият касб этса керак?
- Албатта. Ростини айтсам, Англия пойтахтида ҳаёт бошқача. Лондонда
завқланиб яшаш мумкин. Бу ерда тўғри яшашади. Биздаги каби эмас.
- Тўғри яшаш деганда нимани
назарда тутяпсиз?
- Бу ерда хотиржам яшаш мумкин. Афсуски, Россияда доимо хавотирда
юрасиз. Кўчада ҳар хил одамлар бор. Хуллас, бунга мисоллар келтиришим шарт эмас
деб ўйлайман.
- Англияга кўчиб
ўтганингизга ҳам уч йилдан ошди. У ерда ўтган умрингиздан мамнунмисиз?
- Албатта. Бу ерга келиб хато қилганим йўқ. Менинг қарорим тўғри
бўлганини сезяпман. Менимча, ҳар бир футболчи Англияда тўп суришни орзу қилади.
Туманли Албьионда кўп нарсарларни ўргандим, ҳам ўрганяпман.
- "Тоттенхэм”га кетаётиб, у
ердаги фаолиятингиз омадли кечишини ўйлаганмидингиз ёки...
- Бошида қийин бўлишини билган ҳолда Англияга йўл олгандим. Ўйиганимдек
аввалига жамоага мослашишда муаммоларга дуч келдим. Ҳаммаси чипакка чиққан
пайтлар ҳам бўлди. Кейинроқ эса ишларим юришиб кетди.
- Қаерда кўпроқ ишлашга тўғри
келади – Англиядами ёки Россияда?
- Машғулот жараёнида Англияда
камроқ ишлаймиз. Ўйин пайтида эса Россияникидан икки баробар кўп куч сарфлашга
тўғри келади.
- Агар тақдир тақозоси
туфайли яна Россияга қайтиб келсангиз Лондондаги қайси одатни ўзингиз билан
бирга олиб келасиз? Умуман олганда, шу уч йил ичида инглизга айландингизми?
- Биз руслар агрессив кишилармиз. Инглизлар ичида юриб анча мулойим
бўлиб қолишингиз аниқ. Такрор айтаман бу ердаги ҳаёт тамоман бошқача. Улардан
ўрганадиган нарсалар бир талай.
- Шартномангиз борасида
ойдинлик киритиб ўтсангиз. "Шпорлар” билан ҳамкорлингиз 2012 йилнинг ёзига қадар
амалда бўладими ёки олдинроқ якунига етадими?
- Шундай деса ҳам бўлаверади. Шартномам амалий жиҳатдан ёзда ниҳоясига
етади. Аммо уни ўзайтиришимиз ҳам мумкин. Барчасини вақт кўрсатади.
Аброр
БЕК тайёрлади
| 
