Euro-Football.Ru сайти ўз
анъанасини давом эттирган ҳолда ўтган
ҳафтадаги "энг қизиқарли иборалар” тўпламини мухлислар ҳукмига ҳавола этди. Бу
гал рукн "меҳмонлари” Хавьер Пасторе, Ольга Смородская, Олег Блохин каби футбол
оламининг машҳур кишилари бўлишди.
Пасторенинг аламлари
Аргентина терма жамоаси ярим ҳимоячиси Хавьер Пасторе интервьюларнинг
бирида Италия ва Франция чемпионатларини таққослади. Солиштириш баҳонасида ПСЖ
ўйинчи дилидаги гапларини тўкиб сочди.
"Ростини айтсам, ПСЖ ўтишни у қадар хоҳламагандим. Икки клуб менинг трансферим
борасида келишувга эришди. Буни тўғри тушуниш керак, парижликларнинг катта
миқдордаги пул таклиф қилиши "Палермо” раҳбарларига ёқиб тушди. Мен Апенин ярим оролидаги фаолиятимни давом эттиришга
қарши эмасдим. У ерда мен иккита ажойиб мавсумни ўтказдим. Менга Италия футболи
жуда ёқади. Аммо у ерда битта камчилик бор. Ёш футболчиларга унчалик эътибор
қаратишмайди. 24 ёшга кирган футболчини ҳам ҳали ёш дейишади. Холбуки, бу ёшда анча тажриба тўплаш мумкин.
Франция чемпионати эса тамоман бошқа дунё. Бу ерда очиқ футбол
тарафдорлари кўпчликни ташкил этади.
Биринчи дивизионда рақиб дарвозаси олдида жуда кўп имкониятлар юзага
келади”- дейди Пасторе.
"Локо” президенти
Подольскини танимади
Охирги пайтларда Москванинг "Локомотив” жамоаси президенти Ольга
Смородская ҳам тез-тез матбуотда чиқиш қиляпти. Унинг айтган ҳар бир гапи эса
журналистларни беэътибор қолдирмаяпти. Смородскаянинг Лукас Подольски ҳақидаги
фикрлари қизиқарли бўлди.
"Мен умуман бундай футболчи борлигини билмайман”- деди "Локо”
президенти Подольскини сотиб олмоқчимисизлар деган саволга жавобан.
Блохин асабийлашяпти
Европа чемпионати яқинлашган
сари Украина терма жамоаси бош мураббийи асабийлашиб боряпти. Олег Блохин
навбатдаги матбуот анжуманида мухбир билан жанжалашиб қолди. Ушбу можаро тез
якун топганига қарамай, кўпчиликнинг эътиборини тортди. Украина тарихидаги энг
яхши мураббийнинг эҳтиросларга берилишига нима сабаб бўлди? Балки қуръа
натижасими?
Янги имидж ёрдам берди
"Кубань” жамоаси ҳужумчиси Лассина Траоре Россия чемпионатининг
32-турида "Спартак” дарвозасига тўп киритди. Ўйиндан кейин у ўзининг
муваффақиятлари сири нимада эканлигини ошкор қилди.
"Гол киритиш ёқимли, лекин асосийси жамоанинг кучли саккизликдан ўрин
олгани. Ўйлайманки, мен ва жамоамизнинг омадли юриши бардавом бўлади. Биласизми, Краснодарда
африканча соч турмагини биландиган сартарошни топдим. У сочимни бошқача
турмаклади – "Спартак”га тўп киритдим. Эҳтимол кейинги мавсумда ҳам имиджимни
ўзгартирмасман. Ўйлайманки, бу "Кубань” мухлисларига ҳам ёқади”,- деди Траоре.
Балоттели бир ойнага қарасин
"Ливерпуль” бош мурабийи Кенни Далглишдан инглиз мухбирлари "Манчестер
Сити”даги бебош ҳужумчи Марио Балотелли ҳақида сўрашди. Италиялик футболчи
ҳамон можаролар марказида бўлиб турибди.
"Балотеллининг муаммоларига ким айбдор? У ойнага бир қараса, унинг
жавобини топади, деб ўйлайман”, - дея киноя қилади Далглиш.
Ди Наталенинг орзуси
"Удинезе” ҳужумчиси Антонио Ди Натале "Рома” дарвозасига гол киритгач,
Италия терма жамоасига қайтиш учун ҳамма нарсага тайёр эканлигини айтиб ўтди.
Шунингдек, Антонио бир куни Чезаре Пранделли уни бош жамоага таклиф қилишини
интизорлик билан кутаётганини ҳам таъкидлади. Бироқ, эртасига "скуадро адзурра”
устози "Рома” – "Удинезе” учрашувини курмаганлигини айтиб, Ди Наталени хафа
қилди.
Ўз навбатида Пранделли "Кьево” дарвозабони Стефано Соррентино хусусида қуйидагича фикр
билдирди.
"Охирги пайтларда Стефано яхши ўйнаяпти. У терма жамоада ҳам ўйнашга
қодир. Бироқ, бизда қария Буффон бор ва ёш дарвозабонлар ҳали кўп кутишларига
тўғри келади”,- деди Пранделли.
Муту афсусда
Италия чемпионатининг бошқа бир вакили – "Чезена” жамоаси ҳужумчиси,
руминиялик футболчи Адриан Муту ҳаётидаги бой берилган лаҳзаларни афсус билан
ёдга олди.
"Ҳаётим мобайнида кўплаб имкониятлар бўлди, шундай экан ўзимни бахтли
ҳис этишим мумкин. Афсуски, тақдир юборган туҳфадан унумли фойдалана олмадим.
Ўшанда ўзимни йўқотиб қўйганимни тан оламан. Нима қилаётганимни ўзим ҳам билмасдим.
Агар ҳаммасини тўғри бажарганимда ҳозиргача "Олтин тўп”ни олган бўлармидим.
Айни дамда шуларни ўйлаб кўп сиқиляпман”, деб пушаймон бўлмоқда Муту.
Аброр
Деҳқонов тайёрлади
| 
