Одатда бир иборани кўп ишлатамиз. Пулинг кўп бўлса – чангалда шўрва. Бироқ ҳар доим ҳам пул муаммоларимизнинг барчасини ҳал этиб беролмайди. Дунёда пулдан - да муҳимроқ нарсалар бор. Айниқса, "миллионлар ўйини” деб таъриф берилган футболда – пул билан ҳам кўп нарса эришиб бўлмаслиги мумкин. Бугунги мақоламизда Европанинг энг бой клублари ва хўжайинларни "йиғлатиб” келаётган нарса ҳақида гаплашамиз.

Миллиардернинг қайғулари

2004 йилда россиялик бизнесмен Роман Абрамович Лондоннинг "Челси” клубини сотиб олганида, кўпчилик "арситократлар”дан ўлкан натижани кута бошлашди. Дастлабки икки йилда лондонликлар орзуси рўёбга чиқди. Аниқроғи, "Челси” 50 йиллик таннафусдан кейин Англия чемпиони бўлди. Роман Абрамович илк уринишдаёқ бундай натижани қайд этганидан сўнг, Чемпионлар лигаси ҳақида орзу қила бошлади. Аммо мана етти йилдирки, "аристократлар” Европанинг тенгсиз жамоаси бўла олмаяпти.

Роман Аркадьевичнинг қанча бойлиги борлигини кўпчилик яхши билади. Лекин ўша пуллар ҳам "Челси”га ёрдам беролмаётгани  рус миллиардерини қайғуга солаётган бўлса не ажаб.

Бундан ташқари, Абрамович жамоаси учун охирги йиллардан чемпионлик ҳам армонга айланмоқда.

Шайх Мансурнинг боши қотган

Охирги йилларда Англия футболига хорижлик инвесторларнинг кириб келиши одат тусига айланди. "Челси”дан кейин "Манчестер Сити” ҳам сотилди. "Шаҳарликлар”ни амирлик тадбиркор Шайх Мансур сотиб олди. Бироқ ҳозир унинг аҳволига ҳам ҳавас қилиб бўлмайди. Деярли тўрт йилдан бери "Манчестер Сити” мухлисларни қувонтира олмаяпти. Ушбу жамоа Англия премьер лигасида пешқадамлик қилаётганига қарамай, Чемпионлар лигасидаги юришини тўхтатди. Агар жамоа таркибига назар солгансиз. Кўплаб юлдузларга гувоҳ бўласиз. Лекин ҳаётнинг ёзилмаган қонуни "Сити”ни ҳам четлаб ўтмади. Айни дамда Шайх Мансур қандай қилиб чемпионликни қўлга киритиш ҳақида бош қотираётган бўлса не тонг.

Негаки, охирги йилларда ушбу тадбиркор жуда катта пулни сарфлаганига қарамай, Еврокубокларда ҳали ҳеч нарса ютгани йўқ.

Францияликлар орзуси қачон амалга ошади?

Жорий йилдан бошлаб Францияда ҳам миллиардер жамоа пайдо бўлди. Аниқроғи, қатарлик тадбиркор  Носир Ал Кеалифи  Парижнинг ПСЖ клубини сотиб олди.  Бироқ Франция пойтахти шарафини ҳимоя қиладиган жамоа ҳам катта бойликка эга бўлгани билан ижобий натижа қайд эта олмаяпти.  Мавсум бошида Пасторе ва шунга ўхшаша юлдузларни сотиб олган парижликлар чемпионатда кўнгилдагидек қатнаш олишмаяпти. Охири ўйинлардаги салбий натижалар оқибатида ПСЖ клуби устози Антуана Комбуарени ўз лавозимидан бўшатилиб, ўрнига испаниялик мутахассис Рафаэль Бенитес бош мураббий этиб тайинлади.  

Яна бир қизиқ ҳолат миллиардерлар қўлига ўтган клуб бошида мураббийга ёлчимайди.  Бунга "Манчестер Сити” мисол бўла олади. Манчини келгунига қадар ушбу жамоада бир нечта мураббий фаолият юритган.

Айтиш жоизки, ПСЖ қатарлик инвесторнинг қўлига ўтга,  франциялик мухлислар Еврокубоклардаги ғалабани орзу қила бошлашди. Лекин ушбу  ниятлар қачон амалга ошиши номаълум.

Ҳозирча инқилобдан дарак йўқ

Охирги йилларда араб миллиардерлари Европа клубларини сотиб олиш одат тўсига айланди.  Қатарлик яна бир тадбиркор Абдулла бин Носир Ал Тхани Испаниянинг "Малага” клуби хўжайини саналади. Ушбу бизнесмен "Малага”ни сотиб олганидан кейин кўпчилик Испания футболида инқилоб юз беришини башорат қилганди. Аммо "Малага” ҳозирча тахминларни оқлай олмаяпти. Мазкур жамоа таркиби мавсум арафасида сезиларли даражада кучайди. Лекин натижадан дарак йўқ.  Ал Тхани ҳам бошқа сафдошлари каби "йиғлаётган” бўлиши мумкин. Ахир клуб учун у озмунча пул сарфламади.

Керимовнинг хавсаласи пир бўлдими?

2011 йилга қадар россиялик тадбиркорлар хорижий клубларни сотиб олишарди. Жорий мавсумдан бошлаб бу анъанага барҳам берилди. Рус бизнесмени Сулаймон Керимов Махачқалъанинг "Анжи” жамоасига катта сармоя тикди.

Тан олиш керак, бошида Керимов катта пул орқали юқори натижаларга эришса бўлади, деб ўйлаган бўлиши мумкин. Лекин юқорида айтганимиздек, ҳаётда ҳамма нарсани ҳам пул билан сотиб олиб бўлмайди. Гарчи, "Анжи” Роберто Карлос, Самуэль Это`О каби футболчиларни сафига қўшиб олшганига қарамай, айрим футбол юлдузлари Керимовнинг таклифига рад жавобини беришяпти. "Анжи” ҳам қора анъанани давом эттирмоқда. Айни дамда ҳамюртимиз Одил Аҳмедов тўп сураётган жамоа мураббийга ёлчимаяпти.  Гаджиев кетгач, унинг ўрнига муносиб номзод топилмаяпти. Гарчи даъвогарлар сони кўп бўлса-да, кўпчилик Махачқалъага келишга шошилмаяпти.

Бу ҳолат эса Керимовнинг хавсаласини пир қилган бўлса керак.

Манба: «FutGOL» газетаси

Аброр Деҳқонов тайёрлади