| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Декабрь » 28 » Дэвид Ония: “Бунёдкор”га ўтиб, тўғри йўл тутдим
14:32 Дэвид Ония: “Бунёдкор”га ўтиб, тўғри йўл тутдим |
Сўнгги беш мавсумни Самарқанднинг "Динамо” клубида ўтказган нигериялик ҳимоячи 2012 йилги мавсум арафасида Тошкентнинг "Бунёдкор” футбол клуби билан шартнома имзолади. "Бунёдкор”нинг янги аъзоси клуб расмий веб-сайтига интервью берди.
- Дэвид, суҳбатимиз аввалида футболга кириб келишингиз ҳақида гапириб ўтсангиз.
- 15 ёшимда Лагос шаҳрининг "Динамик” футбол клуби академиясида шуғуллунашни бошлаганман. Унга қадар ҳамма қатори уйда ва маҳалладошларим билан тўп тепиб юрганман.
- Профессионал фаолиятингизни қайси жамоада бошлагансиз?
- "Динамик” футбол клуби Нигерия чемпионатининг иккинчи лигасида иштирок этади. Академиянинг иқтидорли тарбияланувчилари шу жамоа орқали катта футболга кириб келишади. Менда ҳам шундай бўлган.
- Кейинчи?
- 2004 йили селекционер мураббийлар эътиборини тортдим ва менга Озорбайжоннинг "Нефтчи” клубидан таклиф тушди. Икки мавсум бокуликлар шарафини ҳимоя қилдим. 2007 йилнинг иккинчи ярмида эса Самарқанднинг "Динамо” жамоасига келиб қўшилдим.
- Сиз шуғулланган академиядан жаҳон юлдузлари етишиб чиққанми?
- Нванка Кану, Жей-жей Окоча сингари юлдузлар бўлмаса-да, кўплаб дўстларим хориж клубларига йўл олишган. Икки йил илгари бир дўстим Озорбайжон чемпионати тўпурари бўлди. Италияда ўйнаётган дўстларим ҳам бор.
- "Динамо” таклифи қандай юз берди?
- Озорбайжонда ўйнаётган пайтларимда менга нигериялик танишим агентлик қиларди. Ўша агент 2007 йиллари Ўзбекистон чемпионатига бир неча африкалик футболчиларни таклиф этган экан. У мени Самарқанднинг "Динамо” клубида ўзимни синаб кўришимни айтди ва шундан сўнг Ўзбекистонга ташриф буюрдим. Ҳозир у агент билан эмас, бошқа агент билан ишлаяпман.
- Ўша йиллари юртимизга келган африкалик футболчиларнинг деярли ҳаммаси тез орада ортга равона бўлишди. Бироқ Сиз...
- Саволингизни тушундим (кулади). Бу ёруғ оламда яшаб турган ҳар бир инсоннинг ўз мақсади бўлади. Кимнингдир мақсади ўзи учун ижобий, бошқалар учун салбий бўлиши мумкин ёки аксинча. Менда шундай жиҳат борки, саломга қараб алик оламан. Демоқчиманки, "Динамо”га келганимда клуб раҳбарлари мен билан бирданига шартнома тузиш таклифини беришди. Молиявий масалаларни ҳам ижобий келишиб олдик ва уч йиллик битимга имзо чекдим. Пулимни олдим, энди баҳона қилиб тезроқ ортга қайтсам бўлаверади, деб ҳеч ҳам ўйламаганман.
- Ҳатто ўзбекистонлик футболчилар ҳам ўзимизнинг клублар билан кўп йиллик шартнома имзолашга қўрқишади. Сиз уч йиллик битим имзолаш учун кимгадур қаттиқ ишонган бўлсангиз керак?
- "Динамо”га келганимда 22 ёшда эдим. Ўшанда жамоани Тачмурод Агамуродов бошқарар эди. У инсон мен билан суҳбатлашиб, "Сенинг келажагинга умид билан қараяпман, ўзингни ҳар томонлама кўрсатсанг ойлик маошинг ва нуфузинг ошади” деганди. Тачмурод Шамаковичнинг ушбу гапларидан сўнг у инсонга ва "Динамо”га нисбатан ҳурматим чексиз ошган.
- Демак, Тачмурод Агамуродов Сиз учун жудаям қадрли инсон экан-да?
- Худди шундай. Шамакович менга отамдек бўлиб қолган. Ҳақиқий отам Нигерияда бўлса, бу ердагиси Агамуродов.
- Ўзбекистон ва Нигерия чемпионати ўртасида қандай фарқлар бор, деб ўйлайсиз?
- Очиғини айтаман, Нигерия футболи анча юқори. Бизнинг чемпионат ўйинларида кураш жудаям қизғин ва муросасиз кечади. Рақобат ҳам кучли. Борди-ю, жароҳат олиб сафдан чиқсангиз кейин таркибга кира олишингиз жуда-жуда мушкул. Шунингдек, ойлик оляпман-у, деб беҳуда вақт ўтказувчи футболчилар йўқ. Нафақат Нигерия, балки Африка мамлакатлари чемпионатларида иштирок этувчи маҳаллий футболчиларнинг мақсади битта – хорижлик селекционерлар эътиборини тортиб, бошқа юртларга кетиш.
Клубларда яратилган шароитлар ва футболчиларга ҳақ тўлаш борасида Ўзбекистон чемпионати Нигериядан юқори.
- Нигерия клублари футболчиларга қанча миқдорда ҳақ тўлашади?
- Юқори дивизион клублари футболчиларга 1000 доллар атрофида маош беришади. Принцпиал учрашувларда ва совринли ўринларда юрган клубларни ютган жамоа футболчилари мукофот пуллари ҳам олишади.
- Ўзбекистон терма жамоаси ўйинларини кузатиб турасизми?
- Албатта. Ўйлашимча, сўнгги йилларда терма жамоа ўйини кучайган. Одил Аҳмедов, Сервер Жепаров, Виктор Карпенко, Игнатий Нестеров каби футболчилар жуда кучли даврларини ўтказишмоқда.
- Мухлислар ўртасида миш-мишлар урчиган. Эмишки, яна ярим йилдан сўнг Дэвид Ония Ўзбекистон фуқаролигини қабул қилиб, бизнинг терма жамоа учун ўйнаркан. Бу фикр қанчалик ҳақиқат?
- Очиғини айтсам, менга ҳеч қандай расмий шахслардан бу борада таклифлар ёки фикрлар келмаган. Бироқ, гоҳида мухлислар, баъзида эса журналистлар шу ҳақида сўраб қолишади. Шуни аниқ айта оламанки, агар бунинг имкони бўлса, мен рози бўлардим. Бундай жаннатмакон юртда футболга бўлган эътибор ҳар йили ошиб, футболчилар савияси кўтарилиб бормоқда.
- Демак, Сизда Ўзбекистон терма жамоаси учун ўйнаш ҳохиши бор экан-да?
- Ҳа, жудаям кучли.
- Эшитишимга қараганда, Ўзбекистонда турмуш қурган экансиз?
- Ҳа, шундай. Рафиқам самарқандлик. Исми – Любовь.
- Қандай танишгансизлар?
- (кулимсираб) буни тарихи узун. Самарқандда танишдим, 1-1,5 йил давомида учрашиб юрдик кейин турмуш қурдик.
- Фарзандинглар борми?
- Ҳа, битта қизим бор уни исми Энжел.
- Оилангиз қаерда?
- Самарқандда ижарага олган уйим бор эди. Ҳозирча оилам Самарқандда вақтинча қолган. Ўзим эса Тошкентдаман. Тез орада уларни пойтахтга олиб келаман.
- Ўзбекистон Сизга ёқдими?
- Жудаям ёқди. Агар юртингиз менга ҳуш келмаганида балки ортга қайтиб кетармидим?! Бу ернинг мевалари ва таомлари жудаям ширин ва мазали. Шаҳарларнинг гўзаллиги, инсонларнинг очиқ кўнгиллиги ва меҳмондўстлиги каби ҳислатлар бошқа жойларда йўқ. Энг асосийси – Ўзбекистон тинч ва осойишта мамлакат.
- Тўрт йиллик Ўзбекистондаги фаолиятингиз мобайнида турли хил юртдошларингизни юртимиз футболида учратган бўлишингиз керак. Альберт Нсофор, Уче Ихеруоме, ...
- Ҳа, уларни бу ерда учратдим. Илгари бу номларни умуман эшитмагандим.
- Нигериялик дўстларингиз борми Ўзбекистон чемпионатига келмоқчи бўлган?
- Бундайлар сони жудаям кўп (кулади).
- Рус тилини қаерда ўзлаштиргансиз?
- Ўзбекистонга келиб рус тилида гапира бошладим. Озорбайжондалигимда инглиз ва озор тилини ўрганаётгандим. Ҳозир озор тилини унутганман.
- Ҳамюртимиз Баҳодир Насимов билан 2007-2008 йилги мавсумларда "Динамо”да бирга ўйнагансиз. Ҳозирда Насимов Сизнинг собиқ жамоангиз "Нефтчи”да тўп сурмоқда. Ундан собиқ жамоангиз ҳақида маълумотлар олиб турасизми?
- Баҳодир Бокунинг "Нефтчи” жамоасига ўтганида мендан кўп бор маслаҳатлар олган. Ҳозирги кунда мен ундан фалон ўйинчи борми, фалон мураббий ишлаяптими, деб сўраб тураман.
- Ҳимоячи сифатида айтингчи, Ўзбекистондаги қайси ҳужумчига қарши ўйнаш осон эмас?
- Юртингизда юқори савияли ҳужумчилар бор. Бироқ мен бу кучли, униси кучсиз деб ажратмайман. Ҳар қандай ҳужумчига қарши доимо ўзимни энг юқори кучимни сарфлашга ҳаракат қиламан.
- Дэвид Ониянинг кучли ва кучсиз жиҳатлари нималардан иборат?
- Буни айта олмайман. Онияга қарши ўйнайдиганлар мени яхшилаб ўрганишсин ва кучсиз томонларимни илғаб олишсин.
- Қайси жамоа мухлисисиз?
- "Манчестер Юнайтед”.
- Ўйинчиларданчи?
- Рио Фердинанд ва Жон Терри ҳаракатларини ўзим учун ўзлаштиришга ҳаракат қиламан.
- Илгарилари ҳам Ўзбекистон клубларидан тез-тез таклифлар бўлиб турганми?
- Ростини айтсам, ҳар мавсум турли хил жамоалардан таклифлар тушади.
- Нега қабул қилмагансиз?
- У пайтларда таклифларни кўриб чиқадиган ёшда эмасдим. Шу боис битта жамоа шарафини ҳимоя қилаверганман. Ҳозир ёшим 26да. Мана энди таклифлар борасида бош қотиришим мумкин, деб ўйлайман.
- Агамуродов Сизга отангиздек бўлган бўлса, нега у билан эргашмагансиз?
- Шамакович "Шўртан” ва "Локомотив”да ишлаганида мени ўз жамоаларига чақирган. Бироқ, бу жамоаларнинг "Динамо”дан деярли фарқи бўлмаганлиги учун жамоа алмаштирмаганман. Бу қароримни Агамуродов тўғри тушунган.
- "Бунёдкор” билан шартнома имзолашингизга қарамасдан, "Пахтакор” машғулотларида ҳам иштирок этишга улгурдингиз. Тегишли ташкилотлар Сизни жазолашидан қўрқмадингизми?
- "Пахтакор” менга икки йилдан буён алоқага чиқиб келган. Бироқ бу мавсум негадир улар жимиб кетишди. Бу вақтда эса "Бунёдкор” билан шартнома имзолаб қўйдим. Бундан хабар топган пахтакорчилар кейин қўнғироқ қилишди. Тачмурод Агамуродов мен учун отамдек бўлиб қолганини юқорида таъкидлаб ўтдим. Уларнинг юзидан ўтолмай, "Пахтакор”да шуғулланиб турдим. Очиғини айтаман, роса аросатда қолдим. Мен легионер эканлигимни ва футбол орқали маблағ ишлаб, ота-онамга юборишим лозимлигини тушунтирдим ва амалдаги шартномамни тўлиқ бажариб, эркакча иш тутишим лозимлигини уқтирдим. Футболчи сифатида шаклландим, ўсдим, ўзимга яраша ном қозондим. Энди ўз олдига юқори мақсадларни қўядиган клубда бемалол ўйнай оламан. Шундай экан, "Бунёдкор” билан шартнома имзолаб адашганим йўқ, деб ўйлайман.
Баҳодир МИРЗАЕВ суҳбатлашди
Манба: www.fcbunyodkor.com
|
|
Категория: Ўзбек футболи |
Просмотров: 635 |
Добавил: 11x11
| Рейтинг: 0.0/0 |
| |
 | |  |
|
