Футбол тарихи ва статистикаси халқаро федерацияси (IFFHS) клубларининг навбатдаги рейтингини эълон қилди. Унга кўра кучли 400 та клуб сафига учта Ўзбекистон жамоалари киритилган. ОФК кубогини қўлга киритган ва Ўзбекистон чемпионатида кумуш медалларга эга чиққан "Насаф” ўтган ойга нисбатан 14 поғона юқорилади ва 94-ўринга чиқиб олди. Қаршиликлар ҳисобида 124 очко мавжуд. Таъкидлаш лозимки, Англиянинг "Ливерпуль” клуби ҳам "аждарлар” билан бир поғонада жойлашган. Мамлакат чемпионлигини 4-марта расмийлаштирган "Бунёдкор” эса 211-ўриндан 204-ўринга кўтарилишга эришди. "Қалдирғочлар” ҳисобида 86 очко бор. Ўзбекистон кубогини қўлга киритган Тошкентнинг "Пахтакор” клуби эса 353-поғонадан 269-ўринга чиқиб олди. "Шерлар” ҳисобида айни пайтда 74 очко мавжуд.

Умумий рейтингни ҳамон Испания ва Европа чемпионлар лигаси ғолиби "Барселона” клуби бошқариб бормоқда. Кейинги ўринни Мадриднинг "Реал” ва Аргентинанинг "Валес Сарсфилд” клублари эгаллашган.