Журналистлар ўртасида Ўзбекистоннинг 2011 йилдаги энг яхши футболчиси ва мураббийини аниқлаш учун ўтказилган сўровнома ўз ниҳоясига етди.

Овоз бериш жараёнида Ўзбекистон Футбол Федерацияси томонидан аккредитациядан ўтган ва оммавий ахборот воситаларида фаолият юритаётган 100 нафарга яқин журналист иштирок этди. Айтиб ўтиш керакки, ўтган йили бу кўрсаткич 78тани ташкил этганди. Журналистлар бу сафар жами 19 нафар футболчи ва 10 нафар мураббийга ўз овозларини беришди. 

Умуман олганда сўровномада футболчилардан Сервер Жепаров, Александр Гейнрих, Одил Аҳмедов, Игнатий Нестеров ва Аббосбек Махсталиев, мураббийлардан эса Алексей Евстафеев, Вадим Абрамов, Анатолий Демьяненко, Миржалол Қосимов ва Юрий Саркисян бошқаларга нисбатан кўпроқ овоз тўплаган ҳолда юқори бешликдан ўрин эгаллади.

Эслатиб ўтамиз, ўтган йили ушбу соврин Ўзбекистон миллий терма жамоаси сардори Сервер Жепаров ва Ўзбекистон ўсмирлар терма жамоаси бош мураббийи Алексей Евстафеевга насиб қилган. Бу йилги соврин эгаси эса ЎФФнинг йил якунлари бўйича ўтказадиган ҳисобот тадбирида эълон қилинади.