Ўтган ҳафтада германиялик машҳур мутахассис Томас Брдарич Тошкентда
бўлиб қайтди.
Брдаричнинг юртимизга ташрфи унинг янги иш жойи "Бунёдкор” футбол клуби
билан яқиндан танишиш эди.
Бир неча кун мобайнида пойтахтимизда
бўлган германиялик мутахассис "Жар” ҳамда "Бунёдкор”нинг янги барпо этаётган
стадионида бўлди. Клубнинг биринчи
вице-президенти – бош директори Баҳромжон Давлатов
билан музокаралар олиб борди. Бош мураббий Миржалол Қосимов билан суҳбатда
бўлди. "Бунёдкор” футбол мактаби директори Сергей Лушан билан учрашиб, академия билан яқиндан танишди.
Шунингдек, клубнинг бошқа ходимлари ва "Бунёдкор” инфратузилмаси билан ҳам
танишиб чиқди. Томас Брдарич нафақат клубнинг моддий-техника базаси билан
танишди, балки иш юзасидан рўбарў келадиган барча нарсага эътибор қаратди. Ҳатто футбол мактабда
тарбияланаётган болаларнинг ота-оналари билан ҳам суҳбатда бўлди.
- Биздаги шароитлардан Томас
Брдаричнинг кўнгли тўлди ва янги мавсумда бирга ишлаш бўйича келишиб олдик. У
клубнинг спорт ишлари билан шуғулланади ва шу йўналишга жавоб беради. Асосий
жамоадан тортиб, футбол мактабигача бўлган бўғинлар билан ишлайди. Ўйлайманки,
Брдарич юртимизга Европа футболи ҳавосини олиб кела олади ва жамоамизнинг
ўйинини янада кучайишига яқиндан ёрдам беради, - деди клубнинг расмий сайтига
берган интервьюсида Баҳромжон Давлатов.
Томас Брдарич пойтахтимизга
январь ойи бошларида етиб келади ва ўшанда расмий шартномага имзо чекади. У
клубнинг спорт директори лавозимида
фаолият юритади. Ана ўшанда янги ходимнинг расмий тақдимот маросими бўлиб
ўтади.
Томас Брдарич футболчилик фаолияти мобайнида Бундеслиганинг "Ганновер-96”, "Штутгарт” ва "Вольсбург”,
шунингдек, 2002-2004 йиллар мобайнида Германия терма жамоаси шарафини ҳимоя
қилган. Брдаричнинг сўнгги иш жойи
Минскининг "Динамо” клуби эди. Халқаро матбуотнинг фикрича, Томас ўзининг иш
жойини янада кучлироқ бўлган "Бунёдкор”да давом эттириш учун ўзгартирган.
|