| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Декабрь » 9 » Вадим Абрамов: Кўп нарса июнь ва сентябрь ойида ҳал бўлади
12:04 Вадим Абрамов: Кўп нарса июнь ва сентябрь ойида ҳал бўлади |
Бугун, 9 декабрь куни Ўзбекистон миллий терма жамоамиз бош мураббийи Вадим Абрамов билан матбуот анжумани ўтказилди. Бу анжуманда Терма жамоалар маркази бошлиғи Асқар Толибжонов ҳам иштирок этиши кутилганди. Аммо Толибжонов қатнашмади ва журналистларнинг саволларига фақат Вадим Карленович жавоб қайтарди.
- Вадим Карленович, ўтган йилнинг шу пайтида сиз терма жамоани Осиё кубогига тайёрлаш билан банд эдингиз. Ўтган бир йил давомида шахс ва мураббий сифатида қанчалик ўзгардингиз?
- Ўзбекистон миллий ва олимпия терма жамоалари билан ўз гуруҳларимизда йилни биринчи ўринда якунладик. Олдимизга қўйилган вазифалар сари одимлаяпмиз. Эришилган натижалар билан чекланиб қолмасдан, ишлашда давом этсак, ўз мақсадимизга албатта эришамиз. Бир йил давомида инсон сифатида қанчалик ўзгарганимни мен ўзим айта омлайман. Буниси кўпроқ сизларга маълум. Назаримда, аввал қандай бўлсам, ҳозир ҳам шундайлигимча қолганман. Мураббий сифатида эса ҳар куни янги нарсаларни ўрганиб боряпман. Ўрганишдан тўхтаб қолмадим.
- Австралия олимпия терма жамоаси билан ўйиндан кейин жавоб учрашувида Австралияга сюрприз тайёрлаймиз, деб айтдингиз. Сиз назарда тутган сюрприз нимадан иборат?
- Агар нималигини айтсам, унда бунинг сюрпризлиги қоладими? Яхши биласиз, Австралия Ироқ билан ўйинни бизга нисбатан бир кун аввал ўтказди. Бизнинг сюрприз ҳам шунга ўхшаш бўлади. Унинг нимадан иборатлигини тез орада билиб оласиз.
- Ўзбекистон Япония билан ўйингача Кувайт ва Таиланд терма жамоалари билан ўртоқлик ўйинини ўтказади. Терма жамоамиз ЖЧ 4-саралаш босқичига қуръа ташланишидан аввал яхшироқ рейтингга эга бўлиш учун кучли терма жамоалар билан ўртоқлик ўйинларини ўтказгани яхши эмасмиди?
- Менимча, рейтинг ортидан қувишимиз шарт эмас. Биз 4-босқичга қуръа ташлашдан аввал барибир 3-саватчадан ўрин эгалласак керак. Агар Жанубий Корея 4-босқичга чиқа олмасагина, биз 2-саватчадан ўрин эгаллашимз мумкин. Бунинг учун эса Жанубий Корея ўз майдонида Кувайтдан мағлубиятга учраши керак. Бошқа ҳолатда эса биз учинчи саватчада бўлади. Шу боис фақатгина рейтинг учун терма жамоамизнинг тайёргарлик режасини бузиб қўйишни истамаймиз. Миллий ва олимпия терма жамоамиз рейтинг учун ўйнаганидан кўра, жиддий ўйинларга режа асосида тайёргарлик кўргани маъқул. Бир томондан 3-саватча орқали қуръа тортилганимиз маъқул. Шунда 3 июнь куни ўз майдонимизда Жанубий Корея ёки Эронни қабул қилсак, 8 июнь куни Ливан ёки Уммонга сафар уюштирамиз. Баъзан пастки қуръада саватчага тушган яхшироқ бўлади. Масалан, Евро-2012да юқори саватчаларда бўлган жамоалар кучли терма жамоаларга тушиб қолишди. Шунинг учун Кувайт, Таиланд ва Японияга қарши ўйинларда терма жамоамизнинг асосий таркибига кира олмаётган ёшларга имконият берамиз. Бу дегани бу ўйинларда мағлубият учраймиз, дегани эмас. Биз ҳар қандай ҳолатда ҳам ижобий натижа учун курашамиз.
- Терма жамоамиз яна бошқа терма жамоалар билан ўртоқлик ўйинини ўтказадими?
- Малайзиядаги йиғилиш давомида БАА миллий терма жамоаси бош мураббийи менга ўртоқлик ўйинини ўтказиш таклифи билан чиқди. Мен унга розилик бердим. Ҳозир бу борада музокаралар олиб бориляпти.
- Малайзия сафари ҳақида сўзлаб берсангиз.
- Бундай конференцияда Ўзбекистон вакили сифатида биринчи марта иштирок этдим. Шу боис бу конференециянинг қандай тартибда ўткизилишини билмасдим. Конйеренцияда Осиё кубогида ярим финалга чиққан терма жамоаларнинг бош мураббийлар маъруза қилишди. Уларнинг орасида мен биринчи бўлиб маъруза қилдим. Айтиб ўтганимдек, маросим қандай ўтишини билмаганим учун унга яхши тайёргарлик кўрмагандим. Бошқа терма жамоалар мураббийлари эса презентациялар, видеороликлар орқали маъруза ўқишди. Келаси сафар мен ҳам яхшироқ тайёрланаман. Бу конференцияда Ўзбекистоннинг ўйини ва эришган натижаларини тан олишгани қувонарли ҳолат бўлди. Махсус техника орқали футболчиларнинг техник ҳаракатларини таҳлил қилишган. Унга кўра, Ўзбекистон техник кўрсаткичлар бўйича Осиёда кучли учликка кираркан. Ҳаттоки кўрсаткичларимиз бўйича Европанинг айрим терма жамоаларидан олдинда эканмиз.
- Ўзаро малака алмашган бўлсанглар керак.
- Менга берилган саволларга жавоб бердим. Конференциядан кейин мураббийлар 4та гуруҳга бўлинишди. У ерда ҳам турли масалалар муҳокама қилинди. Жумладан, симуляция ва фейр-плей масалалари кўтарилди. Менимча, бунга қарши фақат ҳакамлар чора кўриши керак. Афсуски, ҳакамлар майдонда баъзан шифокор вазифасини бажаряпти. Шунингдек, япониялик мураббийлар Европада ўйнаётган футболчиларининг узоқ сафарлар туфайли терма жамоага келишни исташмаётганини таъкидлашди. Бир томондан мана шундай муаммолар келиб чиқаётган бўлса, иккинчи томондан, легионерлар Осиё футболи савиясини ошишига хизмати қилишади.
- Австралия терма жамоаси бош мураббийи Хольгер Осиек билан ҳам суҳбатлашдингизми?
- Ҳа, Осиек ҳам презентация қилди. Австралия 0:6 ҳисобида ютқазганимиздан кейин қандай қилиб жамоани руҳий жиҳатдан кейинги ўйинга тайёрлаганим ҳақида савол беришди. Мен шундай жавоб бердим: Олтита ўйинда 0:1га ютқазгандан кўра, бир марта 0:6 ютқазган яхши". Австралия билан яна бир марта дуч келсак, улардан кучсиз эмаслигимизни исботлаймиз. Олимпия терма жамоаси билан ўйинда ҳам бу терма жамоадан асло кучсиз эмаслигимиз кўриниб қолди. Мен Австралия терма жамоасининг ўйинларини кузатиб боряпман. Таиланд билан улар тенг ўйнашди.
- Куала-Лумпурдаги семинарларда Ўзбекистон терма жамоасининг Тожикистонга қарши ўйинларида олган сариқ карточкалари муҳокама қилинмадими?
- Йўқ, бу мавзу ҳаттоки кўтарилмади. У ердагилар профессионал. Моуриньо ёзиб кўрсатгани учун омманинг эътиборига тушиб қолди. Мен эса бундай қилмадим. Футбочлиларимизнигн 6 нафар Японияга қарши ўйинни ўтказиб юборишининг қўрқинчли жойи йўқ. Мана қаранг, Япония футбол федерацияси футболчиларнинг Европадан учиб келишни истамаётнини айтишмоқда. Биз ҳам етакчи футболчиларимизни парвозлар орқали ортиқча қийнашни истамайман. Гуруҳда 1-ўринни қўлга киритганимиз ҳеч нарсани ҳал қилмайди. Бу ўйинда етакчи футболчиларимизнинг ўрнини эгаллайдиган ёш футболчилар ўзларини кўрсатишлари учун керак бўлади. Биз ўзимиз хоҳлаган ўйинда хоҳлаган ўйинчимизга дам бериб, хоҳлаган футболчимизни ўйнатиш имкониятига эга бўляпмизми, демак, бу бизнинг ютуғимиз. Энг асосийси ҳал қилувчи ўйинларда асосий таркиб футболчиларимиз майдонга туша олишса бўлгани.
Боз устига, тўртта жамоамиз Осиё чемпионлар лигасида иштирок этади. Март ойида бошланадиган мусобақа олдида бу клубларимиз сафида тўп сурадиган футболчиларни ортиқча чарчатиб, клубларимизни қийин аҳволга солишни истамаймиз. Айниқса, "Бунёдкор" қийин гуруҳга тушиб қолди. Уни узоқ парвозлар кутиб турибди. Буларнинг барчасига тўғри ёндашиш керак. Терма жамоанинг асосий ўйинлари эса июнь ва сентябрда бўлади. Унда кўп нарса ҳал бўлади. Бу вазиятга профессионал ёндашиш керак. Ортиқча "сюрприз"лар - жароҳату дисквалификациялар бизга керакмас.
- Эшитган бўлсангиз, Кореянинг "Сувон" клуби Александр Гейнрих билан шартнома узайтирмасликка қарор қилибди. Бунга муносбатингиз?
- Гейнрих бу клубда ижара асосида тўп сурарди. Ижара муддати якунлангача, у "Пахтакор"га қайтиб, ўз жамоасида тайёргарликни бошлаши керак. Шунинг учун бу савол "Пахтакор" раҳариятига берсангиз тўғри бўларди. Энг асосийси, Саша қаерда ўйнаса ҳам, терма жамоа ўйинларига тайёр ҳолатда келса бўлгани.
- Олимпия саралаш ўйинларида кўп баҳслар 0:0 билан тугамоқда. Бунинг боиси нимада?
- Биз кучли гуруҳдан ўрин олганмиз. Гуруҳимизда жамоаларнинг барчаси тенг. Натижалар ҳам бундан далолат бермоқда. Ироқни мағлуб этганимизда, уни зўрға ютганимиздек кўринди. Шунда кўпчилик бу ўйин билан Лондонга бора олмаслигмизни таъкидлашган. Бир нарсани билиш керак, рақиб ҳам ютқазишни истамайди, у ҳам Лондонга боришни истайди. Ўйлайманки, биринчи даврадаги стратегик режани бажардик. Саралаш охирида ҳам биринчи ўринда бўлишни истаймиз. Бунинг учун эса биринчи навбатда Австралияни ўзимизда ютишимиз шарт! Шунинг учун олимпия терма жамоасини 6 январдан бошлаб йиғяпмиз. Кувайт, Таиланд ва Японияга қарши ўйинларда уларни тоблаб борамиз.
- Йигитлар БАА ва Австарлияга қарши ўйинларда гол ўтказишдан қўрққандан кўринди.
- Ҳар қандай жамоа гол ўтказишдан қўрқади. Натижа барибир муҳим ҳисобланади. Йигитларда БААга исбатан руҳий чегара бор эди. Шунинг учун таваккал қилмадик.
- Менимча, олимпия терма жамоасига яхши ҳужумчи етишмаяпти.
- Абдухолиқовга ҳам клубда, ҳам терма жамоада катта юк тушмоқда. Кенжа Тўраев эса ўз клубида яхши ўйин амалиётига эга бўлмаяпти. Шунинг учун ҳужумчиларда мувозанат бузилмоқда.
Манба: www.uff.uz
|
|
Категория: Ўзбек футболи |
Просмотров: 595 |
Добавил: 11x11
| Рейтинг: 0.0/0 |
| |
 | |  |
|
