Британиялик журналистларнинг фикрича, Лондоннинг "Челси” жамоаси Чемпионлар лигасининг чорак финалига чиқа олмаса клуб хўжайини Роман Абрамович португалиялик мутахассис Андре Виллиаш Боашга чиқиш эшигини кўрсатиши мумкин.

Негаки, россиялик миллипрдер бундан олдин ҳам номдор мураббийларни  қўрқмасдан истеъфога чиқариб юборган ва бунинг учун катта маблағдан воз кечган.  Бугунги мақоламизда ана шу мутахассисларни ёдга олиб ўтамиз.

2004 йил 31 май

Клаудио РАНЬЕРИ

Ўша мавсумда "аристократлар” чемпионатда иккинчи ўринни қўлга киритишдан ташқари, Чемпионлар лигасида 49 йилдан кейин биринчи марта ярим финалга етиб келишди. Аммо мана шу натижалар ҳам Раньерининг Лондонда қолишига етарли бўлмади. Натижа италиялик мураббийга чиқиш эшиклари кўрсатилди.

Абрамовичнинг фикрича, 120 миллион евро иккинчи ўринни олиш учун сарфламаган экан. "Челси” мавсум олдидан трансферлар учун айнан шунча маблағ ишлатганди.  

Роман Абрамович бош мураббий билан шартнома бекор қилиш учун 6 миллион евродан воз кечишига тўғри келди.  Ўшанда росиялик бизнесмен жамоага Эрикссонни олиб келишни режалаштирганди. Аммо негадир ушбу ўтиш амалга ошмай қолди.

2007 йил. 20 сентябрь

Жозе МОУРИНЬО

Португалиялик мутахассиснинг "Челси”даги охирги учрашуви "Русенборг”га қарши ўйинга тўғри келди. Ўшанда лондонликлар Чемпионлар лигаси гуруҳ босқичининг дастлабки ўйинида кутилмаганда дуранг натижа қайд этишди. Эртасига клубнинг энг омадли мураббий билан ҳамкорлик тўхтатилди. Бу ҳолатни кўпчилик Абрамович ва Моуриньонинг ўртасидан ола – мушук ўтгани билан изоҳлади.

Бош мураббийнинг истеъфога чиқариш ҳақидаги қарорга келишдан олдин "Челси” вакиллари махсус йиғилиш ўтказишди ва унда Моуриньо айрим ҳолатларда хатога йўл қўйгани таъкидланди. Жумладан, Жозе украиналик футболчи Андрей Шевченко ва жамоа сардори Жон Террилар билан тил топиша олмаган экан. Ушбу қарорга мухлислар қанчалик норози бўлишмасин, Абрамович шартномани бекор қилиш учун 10,5 миллион евродан воз кечишга рози бўлди.

2008 йил. 24 май

Авраам ГРАНТ

Абрамовичнинг энг яқин дўсти саналган Грант аввалига "Челси”да спорт директори лавозимида ишлади. Кейинчалик эса бош мураббий сифатида Моуриньо эриша олмаган натижани қайд этди. Аниқроғи, "аристократлар”ни Чемпионлар лигаси финалига олиб чиқди. Аммо Москвадаги "Лужники” стадионида бўлиб ўтган баҳсда пенальтилар сериясида омад "кўклар”дан юз ўгирди. Чемпионатда ҳам олтин медални "Манчестер Юнайтед”га бой бериб қўйгани туфайли орадан уч кун ўтиб, Грант истеъфога чиқарилди. Клуб раҳбарияти ўшанда исроиллик мутахассисга спорт директори лавозимига қайтишни таклиф этишди. Аммо Грант бунга рози бўлмади.

Олдинги мураббийлар билан ўз вақтида ҳисоб-китоб қилган Абрамович негадир Грантга пул беришни чўзиб юрди. Бундан дарғазаб бўлган мураббий судга мурожаат этишга тайёр эди. Аммо Абрамович уни суҳбатга чақириб, шартномани бекор қилгани учун 3,5 миллион евро беришини айтди. Грант ноилож рози бўлди.

2009 йил. 9 февраль

Луис Фелипе СКОЛАРИ

"Челси”нинг қишки омадсизликлар ("аристократлар” тўққиз ўйиннинг атиги учтасида ғалаба қозонишди) Абрамовичнинг хавсаласини пир қилди. Натижада бразилиялик мутахассис билан Чемпионлар лигаси плей-офф арафасида ҳамкорлик тўхтатилди.

Бу ҳолатни Сколарининг агенти Аказ Феллегер шундай изоҳлади: - Жамоанинг кетма-кет очко йўқотиши Абрамовичнинг сабр косасини тўлдириб юборди ва у Сколарини истеъфога чиқариш борасида қарор чиқарди”.

Сколари билан шартнома 2011 йилга қадар амалда бўлиши лозим эди. Шунинг учун Абрамович яна компенсация тўлашига тўғри келди. Бу гал россиялик бизнесмен Луис Филипе Сколарига 7,5 миллион евро тўлади. Агар Сколари шартнома якунига қадар Лондонда ишлаганида 15 миллион евро миқдорида маош оларди. Аммо битим бекор қилингач, унга ўша сумманинг ярми берилди.

2011 йил. 22 май

Карло АНЧЕЛОТТИ

Италиялик мутахассис 2009 ва 2010 йилларда "Челси” билан икки марта "олтин дубль” қайд этган ягона мураббий саналади. Лекин италиялик мураббийнинг ишлари 2011 йилда у қадар яхши кечмади. Шунинг учун 38-турдан кейин унга истеъфога чиқарилгани маълум қилинди. Ўша куни "Кўклар” сафарда "Эвертон”га ютқазиб қўйгач, биринчи марта мавсумни совринсиз якунлашганди.  Дон Карло ўиндан кейинги матбуот анжуманида иштирок этди. Автобусда чиқишида эса клуб спорт директори Анчелоттига истеъфога чиқарилгани ҳақидаги хабарни етказади. Шундан кейин италиялик мутахассис Абрамович билан суҳбатлашиш ниятида эканлигини айтади. Аммо унинг нияти амалга ошмайди.

Италиялик мутахассис билан хайрлашиш Абрамовичга 6 миллион еврога тушди. Негаки, ўртадаги шартнома 2012 йилга қадар амалда бўлиши лозим эди.

Аброр Деҳқонов тайёрлади