Араб шайхларининг қўлига ўтган Франциянинг "Пари Сен-Жермен” жамоаси  қишки трансфер чоғида анча фаол бўлди. Бироқ, парижликлар йил бошида ўйланган режалари амалга ошмади. Шунинг учун катта харидлар ёзга қолдирилди.

Россиялик ҳамкасбларимиз ПСЖ атрофида юз берган воқеаларни ёдга олиб ўтишди.

КИМЛАРГА ХАРИДОР БЎЛИШГАНДИ

Дэвид БЕКХЭМ

36 ёш,  «Лос-Анжелес Гэлакси» ярим ҳимоячиси

Парижликлар 2011 йилнинг 31 декарь санасида "Гэлакси”даги шартномаси якунига етадиган инглиз футболчисига 18 ой учун 15 миллион евро тўлашни режалаштиришганди. Бироқ Бекхэм уларга рад жавобини берди.

ПСЖ спорт директори Дэвиднинг кела олмаслиги сабабини оилавий муаммога боғлади: "Дэвиднинг оиласи ҳеч нарсани ўзгартирини хоҳламади”.

19 январь куни англиялик футболчи «Лос-Анжелес Гэлакси» билан икки йиллик шартнома имзолади.

Алешандро ПАТО

22 ёш, «Милан» ҳужумчиси

«Милан» парижликлар томонидан юборилган таклифга рози бўлганди. Ўшанда ПСЖ  бразилиялик футболчининг трансфери учун 35 млн. евро тўлашга тайёр эди. Аммо Патонинг ўзи Францияга боришни хоҳламади.

"Милан” менинг уйим. Жамоа тарихида қолишни истайман. Мақсадим "россонерилар” билан янги чўққиларни забт этиш” деб баёнот берган Пато ўшанда.   

Парижликлар устози Карло Анчелоттининг бу борадаги фикри эса бироз бошқачароқ бўлди.

"Пато яхши ҳужумчи аммо музокаралар давомида у кўп нарсаларни талаб қилди. Шунинг учун ушбу трансфер амалга ошмай қолди”.

КАКА

29 ёш, «Реал» ярим ҳимоячиси

Янги йилнинг илк кунларида италиялик мутахассис Каканинг Францияга келиши борасидаги хабарларга қуйидагича изоҳ билдирганди: "Каканинг "Реал” билан тузган шартномаси бор. Биз янги ўйинчиларни сотиб олишимиз учун рақиб томон ҳам рози бўлиши керак”.

Орадан ҳеч қанча ўтмай, Анчелоттининг фикри ўзгарди: "Какани июнь ойида сотиб олишимиз мумкин”, деди дон Карло.

La Gazzetta dello Sport  нашрининг хабар беришича, ёзда «Реал» Какани сотишга рози бўлган. Бунинг учун парижликлар 25 миллион евронинг баҳридан кечишларига тўғри келади.  

Кейсуке ХОНДА

25 лет, ЦСКА ярим ҳимоячи

Яқинда ПСЖ Римга кетишни хоҳлаётган япониялик футболчини ўз сафига қўшиб олишга ҳаракат қилганди. Ҳатто Кейсуке учун 13 миллион евро таклиф қилишганди. Лекин ёзда бўлгани каби яна томонларнинг фикри бир жойдан чиқмади.

Дуглас МАЙКОН

30 ёш, «Интер» ҳимоячиси

Италия ОАВлари тарқатган хабарларга қараганда, ПСЖ бразилиялик футболчи учун "Интер”га 15 млн. евро таклиф қилган. Бундан ташқари, қўшимча бонус сифатида яна 3 миллион евродан воз кечишга ҳам тайёр бўлган.

Аммо ҳимоячининг агенти Роберто Календа расмий чиқиш қилиб барчасига ойдинлик киритди: "Дуглас «Интер»да қолади”.

Федерико БАЛЬЦАРЕТТИ

30 ёш, «Палермо» ҳимоячиси

Федериконинг Парижга кўчиб ўтиши ҳақида анчадан бери гапиришаётганига қарамай, у ҳамон "Палермо” шарафини ҳимоя қилмоқда. Қолаверса, италияликлар президенти Маурицио Зампарини билан музокарага киришнинг ўзи осон бўлмайди.

Леандро ДАМИАО

22 ёш, «Интернасьонал» ҳужумчиси

Пато "Милан” менинг уйим деганидан кейин ПСЖ раҳбарияти бор эътиборини бразилиялик бошқа бир ёш футболчи Дамиаога қаратишди. Бироқ "Интернасьонал” ўзининг суперҳужумчиси учун 60 миллион евро сўради.

Араб миллиардерлари эса 30 миллион таклиф этишди, холос.

Карлос ТЕВЕС

28ёш, «Манчестер Сити» ҳужумчиси

Аргентиналик футболчи анча вақтдан бери футболдан ташқарида юрганига қарамай, унга ПСЖ ва "Милан” харидор бўлганди. ОАВларида эса Тевес ҳақида турли миш-мишлар янгради. Лекин охир-оқибат "Сити” Карлосни мавсум якунига қадар сотмасликка қарор қилди.

ФИКРЛАР

Карло АНЧЕЛОТТИ,

ПСЖ бош мураббийи:

– Қишки трансфер чоғида жамоани кучайтириши мумкин бўлган футболчиларни ўз сафимизга қўшиб олишни режалаштиргандик. Агентлар бизга Тевес, Торрес, Бербатов, Павлюченко, Кавани, Льорентеларни тавсия қилишди.

ЛЕОНАРДО,

ПСЖ спорт директори:

–  Бугунги кунда ҳамма ПСЖнинг қандай қудратга эга эканлиги жуда яхши билади. Шундай бўлса-да, пулларни ҳавога совурмоқчи эмасмиз. Шунинг учун музокарага киришдан олдин ҳамма нарсанинг ҳисобини оламиз. Трансфер бозорида беҳуда пул сарфлашни истамаймиз. Мана шу футболчилар билан ҳам Франция чемпиони бўлишимиз турган гап.

КИМНИ СОТИБ ОЛИШДИ

МАКСВЕЛЛ

30 ёш, ҳимоячи

Жорий мавсумда "Барселона” сафида атиги еттита ўйинда майдонга тушган футболчининг ўзи Гвардиола олдига бориб уни ПСЖга қўйиб юборишини сўради.

Ўз навбатида "Барса” устози шундай жавоб қайтарди:

"Агар футболчининг ўзи жамоадан кетишни истаса ва клуб раҳбарлари тил топишса, мен уни ўшлаб турмайман. Мен вазиятни жуда яхши тушунаман”.

Икки томон 12 январь куни бир тўхтамга келишди ва ҳимоячи ПСЖ билан 3,5 йиллик шартнома имзолади. Тransfermarkt.de сайтининг хабар беришича, Максвеллнинг трансфери 3,5 миллион еврога баҳоланган.

АЛЕКС

29 ёш, ҳимоячи

"Челси” раҳбарияти ўтган йилнинг декабрь ойида бразилиялик футболчининг жамоадан кетишига рухсат берганди. ПСЖгача Алекс билан Англиянинг "Куинз Парк Рейнжерс” клуби қизиққанди. Аммо "оғир вазнли” рақибдан устун кела олмади.

27 январь куни Алекс Парижда тиббий кўрикдан ўтгач, 2,5 йиллик шартномага имзо чекди. Алекснинг тахминий трансфер нархи 5 миллион еврога тенг.

"Бу яхши харид бўлди. Негаки, Алексда бизнинг жамоада ўйнаш иштиёқи кучли эди”, деб изоҳ берди ПСЖ бош мураббийи Карло Анчелотти. Маълумки, ушбу мутахассис қўли остида Алекс "Челси”да ҳам тўп сурган.

Айтиш жоизки, Танк лақабли футболчига 13-рақам насиб этди. Журналистлар билан қилган мулоқот чоғида Алекс ПСЖ билан Чемпионлар лигасида ўйнаш нияти борлигини таъкидлаб ўтди: «Бунгача ўзим иштирок этган жамоалар билан чемпионликни қўлга киритиб келганман. Францияда ҳам олтин медални қўлга киритсам, айни муддао бўларди. Аммо менинг асосий мақсадим – ПСЖ либосида Европанинг энг нуфузли турнирида тўп суришдан иборат”.

Тьяго МОТТА

29 ёш, ярим ҳимоячи

Аввалига «Интер» президенти Массимо Моратти ушбу таклифни жиддий қабул қилмаганди. Бироқ парижликлар Моттанинг нархини 8 миллиондан 11,5 миллион еврога кўтаришгач, дарҳол рози бўлди. Ҳар ҳолда трансфер бозорини Моратти жуда яхши тушунади.

Италия чемпионатида 10 та ўйинда иштирок этган ярим ҳимоячи учун парижликлар кўп йиллик битим таклиф қилишди. Бу давр оралиғида Тьяго йиллига 2 миллион евро маош оладиган бўлди.

31 январь куни ПСЖ ўзининг учинчи янги бразилиялик футболчиси расман таништирди. Тақдимот маросимида ўтказилган матбуот анжумани пайтида Мотта "Интер”дан кетиш сабабларига тўхталиб ўтди.

"Ўзимни бошқа жамоада синаб кўриш иштиёқи пайдо бўлди. Гоҳида шундай вазият бўладики, ўзингга янги саргузашт излаб қоласан. Мен ҳам худди шундай ҳолга тушиб қолдим”.