| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2012 » Февраль » 11 » Ислом Тўхтахўжаев: «Локомотив» варианти яхшироқ кўринди»
08:29 Ислом Тўхтахўжаев: «Локомотив» варианти яхшироқ кўринди» |
Охирги йилларда ўз ўйини билан барчанинг диққат эътиборини ўзига тортаётган Ислом Тўхтахўжаев футболчи сифатида катта ўсишга эришди. У Ўзбекистон миллий ҳамда олимпия терма жамоасининг аъзоси ҳисобланади.
Ҳозирги пайтда олимпиячиларимиз Лондон-2012 йўлланмасини қўлга киритиш учун астойдил курашмоқдалар ва бу йўлда вакилларимиз жуда яхши имкониятга эгалар. Бу борада иқтидорли ҳимоячи Тўхтахўжаевнинг қўшаётган ҳиссаси катта бўлмоқда. Боз устига «Нефтчи»даги шартномаси якунлангач унга талабгорлар жуда кўп эди. Куни-кеча футболчи билан боғланиб, Австралия устидан қозонилган ғалаба ва янги жамоаси хусусида суҳбатлашдик.
- Ислом, Австралияга қарши ўйин биз учун жуда муҳим эди. Лекин ноқулай об-ҳаво юзага келгач, вазифа янада қийинлашди. Шундай эмасми?
- Бундай об-ҳаво шароитида биринчи марта ўйнадик. Табиийки, қорли майдонда ўйнаш бизга ҳам, уларга ҳам қийин бўлди. Негаки, бундай пайтда ўз ўйинингни намойиш этиш жуда оғир бўлади. Шунга қарамасдан мухлисларимиз олдида Ўзбекистон шаънини муносиб ҳимоя қилишга ҳаракат қилдик. Ҳаво анча совуқ бўлса-да, стадионга кўплаб ишқибозлар келишди ва бизни қўллаб-қувватлаб турдилар. Бунинг учун барча мухлисларимизга миннатдорлик билдирамиз.
- Австралияликлар билан бўлган биринчи учрашувда 0:0 ҳисоби қайд этилганди. Умуман, бу жамоа сизда қандай таассурот қолдирди?
- Биринчи ўйинда сафарда тўп суриб, дурангга эришдик. Бу сафар эса мезбонлик бизнинг тарафимизда эди. Рақибимиз иккала учрашувда ҳам бир хил услубда ўйин кўрсатди. Шахсан мен Австралиянинг ўйинида янгилик кўрмадим.
- Учрашувнинг қайси вақтида ғалаба қозонишимизни аниқ ҳис қилдингиз?
- Майдонга фақат ютамиз деб чиқамиз. Шунинг учун ўйиндан олдин ғалаба бизнинг томонда бўлишини билгандим. Чунки йигитларда ишонч юқори эди.
- Миллий терма жамоамизни ҳисобга олмаганда, қолган терма жамоаларимизнинг Австралияга қарши ўйинларида омад биз томонда бўлади...
- Тўғри, шундай. Лекин бунинг кечаги ўйинга алоқаси йўқ. Масалан, миллий терма жамоамиз ҳозирча уларни мағлуб эта олгани йўқ. Умуман айтганда, ўз кучимиз эвазига Австралияни мағлубиятга учратиб келяпмиз. Лекин миллий терма жамоамиз ҳам албатта ғалаба қозонади, деб ўйлайман.
- Олимпия терма жамоамизни олдинда Ироқ ҳамда БААга қарши учрашувлар кутиб турибди. Кечаги муваффақиятдан кейин эса имкониятимиз янада ошди...
- Худо хоҳласа, Ироқни мағлубиятга учратсак, кўп нарсага ойдинлик киритилади. Лекин қолган иккала учрашувда ҳам асосан максимум натижага эришиш учун курашамиз.
- Гуруҳдаги барча олимпия терма жамоалари билан беллашдик. Сизнингча, қайси бири Ўзбекистон учун муаммо туғдиради деб ўйлайсиз?
- Ўз ўйинимизни кўрсата олсак, ғалаба биз томонда бўлади. Мураббийлар кўрсатмаларини тўлиқ бажарган ҳолда тўп сурадиган бўлсак, рақиблар учун муаммоларни биз туғдирамиз.
- Эътиборга молик томони шундаки, гуруҳдаги тўртта учрашувда ҳам дарвоза дахлсизлиги сақлаб келинмоқда. Ниманинг эвазига бундай натижага эришяпмиз?
- Мураббийларимиз бизга тўғри йўл кўрсатишяпти ва қандай ўйнаш кераклигини уқтиришмоқда. Бу борада йигитларнинг ҳам ҳиссаси катта. Устозларимизнинг кўрсатмаларини бажариб келаётганимиз ҳам ўз фойдасини беряпти.
- Яқинда Юрий Саркисян билан гаплашганимизда сизнинг «Нефтчи»дан кетганингизни айтди. Бу вазиятга ўзингиз ҳам ойдинлик киритиб ўтсангиз...
- Ҳа, Фарғонадан кетдим.
- «Нефтчи»ни тарк этишингизнинг боиси нимада?
- Футбол шунақа ўйин. Бир у ерда, бир бу ерда ўйнайсиз. Менга «Локомотив»дан таклиф тушди ва мен бу клуб билан шартнома туздим.
- Янги мавсумда «Локо» билан нималарни кутяпсиз?
- «Локомотив» билан Осиё чемпионлар Лигасида қатнашишни орзу қиляпмиз. Жамоа раҳбарлари билан гаплашганимда шундай вазифа қўйилганлигини айтишди.
- «Нефтчи»да ҳамиша яхши ўйин кўрсатиб келгансиз. Жамоа эса юқори ўринлар учун курашарди. Лекин сиз «Локомотив»га ўтдингиз. Нима учун айнан ушбу клубни танладингиз?
- «Локомотив» варианти менга ёқди. Тўғри, менда бошқа жамоанинг таклифлари ҳам бор эди. Бироқ «Локо» менга бошқалардан кўра яхшироқ кўринди.
- Фарғоналик ишқибозларга нима деган бўлардингиз?
- Уларга раҳмат дейман. Кўп йиллардан бери «Нефтчи»ни тинимсиз қўллаб-қувватлаб келишмоқда. Бунинг учун барчаларига миннатдорлик билдираман. Фақат мени тўғри тушунишларини хоҳлардим. Футболда ҳар нарса бўлиши мумкин.
- «Нефтчи»ни тарк этиш сиз учун оғир кечмадими?
- Албатта оғир. Ёшлигимдан «Нефтчи»га мухлислик қилардим. Кейин ўзим футболчи бўлиб, ушбу жамоа учун ўйнадим. Умуман, яхши кўрган клубимни тарк этиш қийин. Лекин бу - футбол.
- «Нефтчи»да ўтказган фаолиятингиздан қандай хотиралар қолди?
- Боя айтганимдек, бу жамоага болалигимдан ишқибозлик қилардим. Ўша пайтда Юрий Саркисян, Сергей Лебедев, ака-ука Дўрмонов каби мураббийлар билан ишлашни истардим. «Нефтчи»да тўп суриб, орзумга эришдим. Энди бўлса олдинга қадам ташлашим керак эди. Шу боис «Локомотив»га ўтишга қарор қилдим.
- Юрий Саркисян билан ҳам хайрлашдингизми?
- Фарғонага энди келдим. Шу боис Юрий Вазгенович билан хайрлашишга ҳали улгурмадим.
- Айни пайтда «Локо» янги мавсумга ўзгача руҳда тайёргарлик кўрмоқда. Жамоага янги ўйинчилар таклиф этиляпти. Жиддий мақсад қўйилгани учун футболчиларнинг зиммасидаги масъулият ҳам шунга яраша кучаяди...
- Албатта, вазифа жиддий бўлгач, масъулият ҳам янада ортади. Биз кучимиз борича олдимизга қўйилган вазифани бажаришга ҳаракат қиламиз.
манба : "ИнтерФУТБОЛ" газетаси
|
|
Категория: Интервью |
Просмотров: 489 |
Добавил: 11x11
| Рейтинг: 0.0/0 |
| |
 | |  |
|
