Хави Эрнандес Креус – бу футболчисиз бугунги "Барселона”ни тассаввур этиб бўлмайди. Худди Каталонияни сариқ-қизил рангсиз қиёслаб бўлмагани каби. Хавининг клуб муваффақиятларига қўшаётган ҳиссани катта. Бугуни мақоламизда Испания терма жамоаси етакчиларидан бири – Хавининг ҳаётий қонунларига назар ташлаб ўтамиз.

- Мен ҳеч қачон ғалабалардан туймайман. "Барселона”да 10 йилдан бери тўп сураётган бўлсам, кўплаб совринларни қўлга киритдим. Лекин бу билан тўхтаб қолиш ниятим йўқ.

- Ғалабалар худди бир касалликка ўхшайди. Битта совринни ютганингдан кейин иккинчисида зафар қучиш истаги пайдо бўлади. Кўпчилик ғалаба кишини хотиржамликка ундай деган фикрларни билдиради. Менда эса бунинг акси. Мен ҳамон совринларга ташнаман.

- Олдинда забт этишим лозим бўлган кўплаб чўққилар турибди. Клубдаги рекордларни янгилашимиз керак. Мақсадим "Барселона” сафида энг кўп майдонга тушган футболи сифатида тарихда қолиш. Шунда фаолиятимдан тўла қониқиш ҳосил қилган бўлардим.

-  Ҳар доим айтганман, менинг уйим Каталония. Бирдан бир орзуим фаолиятимнинг сўнгги дамигача "Барселона”да қолиш.

- Мен "Барселона”ни жонимдан ортиқ яхши кўраман. Бу ерда мен бахтиёрман. Менга бошқа нарса керак эмас.

- Ростини айтсам, "Реал” жамоасини ҳурмат қиламан. Лекин ҳеч қачон "Барселона”нинг энг ашаддий рақиби сафига ўтмаган бўлардим.

- Менга Флорентино Перес қўнғироқ қилса, телефонни сира кутармайман. Мадридда ҳеч қачон бахтли бўлмасам керак.

- Криштиану Роналдуни "Барселона”да либосида тасаввур эта олмайман. Бизга ўзига ортиқча бино қўядиган футболчи керак эмас.

- Пул мен учун муҳим эмас. Ахир мен болалигимдан "Барселона” мухлисиман.

- Болалигимда Бернд Шустер ўйинларидан завқ олардим. Марадона менинг иккинчи кумиримга айланди. Мен ёқтирган учинчи футболчи бу Хосеп Гвардиола. Аввалига унинг ўйинларида роҳатланардим. Кейинчалик у менинг ҳаётимдаги унутилмас шахслардан бири бўлди.

- Болалигимда Мэттью ле Тиссьенинг голлардан ҳайратда қолардим. У "Саутгемптон” сафида 444 та ўйин ўтказиб, рақиблар дарвозасига 162 та тўп киритган. Ўзининг ёрқин ўйинлари билан у клуб тарихидаги энг буюк футболчилардан бирига айланди. Ле Тиссье ҳар икки оёғида ҳам ажойиб зарба бера оларди. Рақиблари дарвозасига фантастик голлар киритган Меттью ҳақли равишда "Худо” деган лақабни олган.

- Ёшлигимда Гвардиоланинг ҳар бир ҳаракатини синчковлик билан кўзатардим. Унинг майдонда қилаётган ишларини ўзлаштиришга ҳаракат қилганман. У тўпни қабул қилиб олиши билан тезда қарор қабул қиларди. Бундан ташқари, у ҳар бир жамоадошининг очилишини беэътибор қолдирмасди. Бир сўз билан айтганда у ўйинни ажойиб тарзда кўра оларди.

- Пеп билан алоқамиз жуда мустаҳкам. Иккимиз бир пайтлар бирга ўйнаганмиз. Иккимизнинг футболга бўлган қарашимиз деярли бир хил. Биз кўп мулоқот қиламиз, бир-биримизга қаттиқ ишонамиз. Ўйин пайтида Пеп мени тез-тез ўз олдига чақириб кўрсатмалар беради. Мен эса уни майдонда давом эттиришга ҳаракат қиламан.

- "Барселона”нинг муваффақиятларида Хосеп Гвардиоланинг хизматлари беқиёс. У жамоага янги муҳит олиб кира олди. Тартиб – интизомни йўлга қўйди. Ажойиб ғояларини амалга оширди. Кўпчилик эса "Барселона”нинг сири Месси-Хави – Иньестада деб ўйлайди. Аммо бу нотўғри. Барибир жамоанинг натижаларига биз жавоб бермамиз. Шундай экан, ғалабаларда мураббийнинг меҳнатлари кўп синган десак хато бўлмайди.

- Тўпни қабул қилиб олишинг билан ҳужумни қандай давом эттириш кераклигини ўйлашинг лозим. Жамоадошларим доимо очилишларини хоҳлайман. Футбол бу жамоавий ўйин. Бир киши унда ҳеч нарса қила олмайди. Жамоадошларим очилишмаса, менинг қўлимдан ҳеч вақо келмайди.

- Профессионал футболчи сифатида ҳар доим ўзим ҳақимда қайғуришим керак. Шунинг учун майдонда ҳамиша жароҳат олмасликка интиламан. Негаки, фаолиятимни нохўш ҳолатда якунлашни истамайман. Жамоа билан тузган шартномам 34 ёшимга қадар давом этади. Шу давр оралиғида мен ҳозирги формамни ўшлаб туришим керак.

- Мен учун асосийси натижа эмас, аксинча ҳар бир мағлубиятдан сабоқ олиш даркор. Мағлубиятлар футболнинг ажралмас қисми. Буни тўғри тушуниш керак. Дунёда мағлубиятга учрамайдиган жамоанинг ўзи борми? Лекин ҳар бир муваффақиятсизлик менга қўшимча куч ато этади.

- Барқарорликни сақлаб қолишимнинг сабаби, жамоанинг ғалабаларига ўз ҳиссамни қўшишга бўлган иштиёқнинг кучлилиги. Мен ҳали кўплаб чўққиларни забт этишим лозим.

- Профессионал футбол рақобатсиз тасаввур этиш мушкул. Жамоада ички кураш бўлмас экан, натижа ҳам ёмонлашиб бораверади. Ўз навбатида мен рақобатдан чучимайман.

- Мен ҳар доим бир нарсани таъкидалб келаман. Фабрегас бу "Барселона” учун бегона эмас. У Ла Масияда ўқиган пайтида "Барса”да ўйнаш нима эканлиги онгига сингиб қолган. Кўпчилик Сеск иккимиз майдонда бир-бирига тўп ўзатмайди, деган фикрларни билдиради. Лекин бу нотўғри. Ҳаммаси аксинча биз майдонда бир-биримизни сўзсиз тушунамиз. Умуман, Фабрегаснинг жамоага тезда мослашиши ҳам унинг каталонияликларга бегона эмаслигидан далолат беради. Фабрегас қандай ўйинчи эканлиги "Арсенал” ва Испания терма  жамоасида кўрсатиб бўлган.

- Месси - феномен. Бундай футболчини топиш амри маҳол. У мен учун ажойиб шерик.

- Ростини айтсам, "Барсеона”нинг келажаги 60-70 фоиз Месси билан боғлиқ. У гарчи, ёш бўлишига қарамай, уч марта дунёнинг энг яхши футболчиси бўлди. Биз қўлимиздан келганича унга ёрдам беришимиз лозим. Бундай савиядаги ўйинчиларни олиб қолиш учун бор имкониятни ишга солиш керак. Лео ҳам худди мен каби кайфиятсиз бўлса, майдондаги ишлари умуман юришмайди.

- Мессида айни дамда футболнинг учмас юлдузлари Зидан ва Марадонадаги хислатлар мужасам. У ҳамиша ўйинни томошага айлантиширга ҳаракат қилади.

- Бу даражага етгунимча, жуда оғир кунларни бошдан кечирганман. Лекин ҳеч қачон клубни тарк этиш хаёлимга келмаган. Жамоага келганимда менинг амплуамда Гвардиола тўп сурарди ва уни рақобатда ортда қолдиришнинг иложиси йўқ эди. Ўшанда 17-18 ёшли ўсмир эдим. Аммо ҳар қандай ҳолатда ҳам хавсалам пир бўлмасди. Мен сабр-бардош билан ўз вақтимни кутишдан чарчамадим.

- Бугун "Барселона” ўйинчиси бўлиб турганимнинг сабабчиси менинг онамдир. У кишининг жамоага бўлган муҳаббати ва сўзида туриб олиши "Милан”га ўтиб кетишимнинг олдини олган.

- Англия футболига бўлган меҳрим баланд. Болалигимда унга меҳр ўйғонган. Ўша пайтларда "Ливерпуль” Европанинг энг кучли жамоаси саналарди. Ушбу жамоа мухлисларга ёқадиган футбол намойиш этарди. Лекин унинг ўйинлари ҳозирги "Барселона” ва Испания терма жамоасининг ўйинларидан тубдан фарқ қиларди.

- Испания чемпионатини бугунги кундаги энг кучли биринчилик деб атаган бўлардим. Биз техник ва тактик жиҳатдан бошқалардан устунмиз. Аммо АПЛ тезлик ва қизиқарлиги билан ажралиб туради.

- Жамоанинг философияси муваффақиятларимиз бир бўлаги.  Кройф жамоага ўзининг ғояларини олиб кирганида мухлислар уни кўриб ҳайратда қолишганди. Мана орадан 15-20 йил ўтгач, ишқбозлар "Барселона”нинг бошқача ўйинни тан олишмайди. "Барса” тезкор, ҳужумкор ўйин намойиш этади. Биз учун энг муҳими тўпнинг назоратини ўзимизда сақлаб қолиш. Бу футболчилардан катта кучни талаб  қилади. Шундай бўлса-да, буни аъло даражада уддалаб келяпмиз.

- Мен мустақилманми? Йўқ, йўқ ва яна йўқ. Бизнинг усулибимиз бир хил ва натижа бир ўйинчига боғланиб қолмайди.

- Мен машина эмасман ва дам олишга ҳаракат қиламан. Шундай бўлса-да, ҳамиша ўйинашга тайёрман. Ўзимни 100 фоиз тайёр эмаслигимни сезсамгина майдонга тушмаслигим мумкин.

- Асосийси ҳеч ҳам хотиржамликка берилмаслик керак. Максимум даражада ўйнаш учун машғулотларда ҳам тўлиқ шуғулланишимиз шарт. Бироз бепарво бўлиб қолсак, оддий жамоадан фарқимиз қолмайди. Бундай бўлишини сира хоҳласамдим.

- Менга ҳамиша мукофот олиш учун номзод бўлиш ёқади, фаворит сифатида эътироф этиш эмас. "Барса”да ҳамма хилма-хилликни ёқтиради. Шунинг учун рақиблар баъзан бизнинг ҳаракатларимизни пайқамай қолишади.

- "Барселона”да бошимни баланд кўратиб ўйнашга ўргатишган. Ўйин пайтида ҳамиша шундай қилишга интиламан. Бунинг иқтидорли бўлишинг керак. Буни амалга ошириш ҳар кимнинг ҳам қўлидан келавермайди.

- Техника ва иқтидор умуман бошқа – бошқа нарсалар. Қайсидир йўланиш бўйича аниқ тўп узатишда техника қўл келади. Бироқ, рақиблар учун кутилмаганда ва юқори савияда пас беришда иқтидорнинг роли катта.

- Испания терма жамоаси ва "Барселона” ўйинида бир хиллик бор. Негаки, икки жамоанинг ҳам асосий мақсади ҳужумкорликни ошириш. Бу терма жамоа "Барса” усулида футбол ўйнайди дегани эмас. Терма жамоанинг ўз йўналиши бор. Тўғри бош жамоа сафида "Барса”нинг кўплаб футболчилари тўп суради. Шунга қарамай, бу бизнинг услубимиз дейишга асосларимиз йўқ.

- Футбол ҳаммасидан устун. Уни сиёсат ёки бошқа нарса билан солишитириб бўлмайди. "Миллионлар ўйини”ни ҳамма жойда бирдек севишади. Каталонияда ҳам, Андалусияда ҳам, Басклар юртида ҳам. Кимга бу спорт тури ёқмаса, уни томоша қилмай қўя қолсин.

- Бизнинг услубимиз қачондир модадан қолишига ишонгим келмайди. Бизнинг ўйинимиз юқори иқтидорни талаб қилади. Қобилят ва иқтидордан ҳосил бўлади, "Барса”нинг асосий кучи. Майдонда 11 та атлетикачини тушиш мумкин. Лекин бу ғалабага кафолат бера олмайди. Ҳамма мантиқ мана шунда.  

- Мен футбол фанатиман ва қўлимдан келгунича тўп сураман.

Аброр Деҳқонов тайёрлади