| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2012 » Февраль » 9 » Хорен Оганесян: «Мақсадимиз кучли тўртликка кириш»
05:30 Хорен Оганесян: «Мақсадимиз кучли тўртликка кириш» |
Янги мавсумда ўз олдига жиддий мақсадларни қўяётган "Локомотив” клуби БААдаги йиғиндан қайтиб келгач, ҳозирда машғулотларни пойтахтда давом эттирмоқда. Темирйўлчилар раҳбарияти жамоа мақсадига монанд яқин ўтмишнинг афсонавий футболчиларидан бири, Арманистоннинг ХХ асрдаги энг яхши ўйинчиси, 1990-91 йилги мавсумларда "Пахтакор” жамоаси шарафини муносиб ҳимоя қилган Хорен Оганесянни "Локомотив” бош мураббийлигига таклиф қилганидан хабарингиз бор. Айнан "Пахтакор” Хорен Георгиевич учун футболчилик фаолиятидаги сўнгги клуб бўлиб қолди. Киевнинг "Динамо” жамоасига қарши ўйинда Оганесян оғир жароҳат олди ва натижада фаолиятини якунлади. Бироқ, футболсиз яшай олмаслигини тушунган Хорен Георгиевич ўзини мураббийлик соҳасида синаб кўришга қарор қилди. У мураббий сифатида "Таврия”, АОСС, "Оменетмен”, "Пюник” клубларини бошқарди. 1996-1997 йилларда эса Арманистон терма жамоасига устозлик қилди. 2000-2006 йиллар мобайнида "Пюник” клуби президенти лавозимида ҳам ишлади. Маълум муддат ишсиз юрган Оганесянга ўтган йили "Локомотив” клубидан ҳар томонлама фойдали таклиф тушди. Айни пайтда арманистонлик мутахассис бир йиллик танаффусдан сўнг яна кучлилар сафига қайтган жамоани янги мавсумга тайёрламоқда. Биз навбатдаги машғулотлардан сўнг Хорен Оганесян билан суҳбатлашдик.
- Хорен Георгиевич, Ўзбекистон заминига хуш келибсиз. Суҳбатимиз аввалида "Локомотив”дан бўлган таклиф ва уни қай тарзда қабул қилганингиз ҳақида маълумот берсангиз.
- Очиғи, таклифни узоқ ўйлаб ўтирмадим. Боиси, ўзбек футболи менга бегона эмас. Бу ердан ажойиб, бетакрор хотиралар қолган. Футболчи сифатида икки йил "Пахтакор” жамоасида ўйнаганман. Имкониятимнинг максимал даражасида жамоага ёрдам берганман. Тақдир экан, мана энди жаннатмакон Ўзбекистонга мураббий сифатида келдим. Бу ерда янги жамоа шаклланяпти. "Локомотив” раҳбарияти жамоа олдига катта мақсадларни қўймоқда. Қандай жамоа бўлиб шаклланишимиз ва нималарга қодир эканлигимизни вақт кўрсатади.
- Тошкентга сўнгги бор қачон келгандингиз?
- 2005 йили келгандим. Ўша пайтда Арманистоннинг "Пюник” жамоасида президент лавозимида ишлардим. Бу ерда халқаро турнирда иштирок этганмиз. Ўшанда икки ҳафта мобайнида Тошкентда бўлган эдим. 2006 йилдан Грециянинг "Олимпиакос” клуби тизимида фаолият юритдим. Ўтган йили жамоа билан шартномам якунланди. Узоқ вақт ишсиз қолмадим. "Локомотив” жамоасидан бўлган чорловни бажонидил қабул қилдим.
- Таассуротлар қандай? Пойтахтимиз қиёфасида ўзгаришлар борми?
- Албатта. Қандайдир 6-7 йил ичида асрга татигулик бунёдкорлик ишлари олиб борилибди. Шаҳар қиёфаси тубдан ўзгариб кетган. Янги стадионлар бунёд этиляпти. Мени ўзбекларнинг фақат ўзига хос хислатлари – меҳмон-дўстлик, олийжаноблик ва тантилиги мафтун қилган. Ишонинг, бундай юрт ва халқни дунёнинг бошқа ҳеч қайси мамлакатида кўрмаганман.
- Янги иш жойи ва "Локомотив” клуби қандай таассурот қолдирмоқда?
- Биз ишни нолдан бошладик. Янги жамоани бир-икки кунда ташкил этиб бўлмайди. Бунинг учун маълум вақт керак бўлади. Шундай бўлсада, қисқа фурсат ичида рақобатбардош жамоа ташкил қилишга ҳаракат қиламиз. Энг муҳими, клубда футболни севадиган инсонлар ишлашяпти. Раҳбарият зарурий барча шароитларни яратиб бермоқда. Биз мураббийларга эса фақат ишлаш қоляпти.
- Янги мавсумда "Локомотив” олдига қандай аниқ вазифа қўйилди?
- Клуб раҳбарияти юқори марраларни кўзлаяпти. Бунинг учун жамоада барча шароитлар яратилган. Олий лиганинг янги аъзоси учун қисқа фурсат ичида иккита хориж йиғинни ташкил этиш – бу катта гап. Шундан ҳам ниятимиз қандай эканлигини билса бўлади. 2012 йилги мавсумда кучли тўртликка киришга ҳаракат қиламиз. Бу вазифани бажарсак, келаси йили Осиё кубокларида иштирок этишимиз мумкин бўлади.
- БААдаги йиғиндан кўнглингиз тўлдими?
- Мураббий ўз ишидан ҳеч қачон кўнгли тўлмаслиги керак, деб ўйлайман. Акс ҳолда ишлашдан тўхтаб қолади. Йиғинга келсак, уни ўзимиз режалаштиргандек ўтказдик. Ҳар бир назорат ўйинида легионерларни кўрикдан ўтказиб олдик. Шахсан менга ўртоқлик ўйинларидаги натижа муҳим эмас. Мавсумолди ўтказиладиган ўйинлар мураббий учун фикрлаш, чизиқлардаги мавжуд камчиликларни бартараф этиш ва янги футболчиларни синаб кўришга хизмат қилади. Тўғриси, легионерларнинг ҳеч бири талабамизга жавоб бермади.
- Легионерлар учун жорий этилган 3+1 лимитидан тўлиқ фойдаланасизми?
- Албатта. Мавсумга тайёргарликнинг якуний босқичи БААда ташкил этилади. Ушбу йиғин давомида легионерлар масаласини ижобий ҳал этишга ҳаракат қиламиз. Осиёлик футболчи вариантини ҳам кўриб чиқяпмиз. Дубайдаги йиғинимизга япониялик футболчини таклиф қилганмиз.
- Легионерларга нисбатан қўлланилган чекловга муносабатингиз?
- Европада бундай чеклов йўқ. Ўзбекистонда эса бу йилдан легионерлар учун 3+1 тизимида чеклов жорий этилибди. Шахсан мен бу қарорга қаршиман. Майли ПФЛ истагандек майдонда тўрт нафар хорижлик футболчи ўйнасин. Бунга қўшиламан. Аммо заҳира ўриндиғида ҳам камида икки нафар легионер бўлиши керак. Чунки футболчилар жароҳат олиш ва дисквалификациялардан ҳимояланган эмас. Бундай ҳолатга легионер футболчи дуч келганида мураббий унинг ўрнига бошқа хорижликни майдонга тушириш имкониятига эга бўлиши лозим. Шундай йўл тутилганида адолатли қарор бўларди. Такрор айтаман, бу менинг шахсий фикрим.
- Таркибдаги мавжуд ҳозирги легионерлар ҳақида нима дея оласиз?
- Ромик Хачатрян ва Жора Оганесянлар ҳозирча таркибимизда бўлиб туришибди. Хачатрян қолса керак. У майдон марказидаги ўйинлари билан яхши таассурот қолдиряпти. Дубайдаги йиғинимизда бу икки легионер тақдирига ойдинлик киритамиз.
- Одатда мураббий янги иш жойига ўзининг собиқ жамоаларидан футболчиларни таклиф қилади. Сиз бу имкониятдан қай даражада фойдаланмоқчисиз?
- Грециядан икки футболчини таклиф қилганман. Шунингдек, бир француз футболчиси ҳам Амирликлардаги йиғинимизга келиши керак.
- БААдаги йиғин қачонга мўлжалланган?
- 15-29 февраль кунлари Дубайда икки ҳафталик йиғин ташкил қиламиз. Табиийки, йиғин доирасида бир қатор ўртоқлик учрашувлари ўтказилади. Бўлажак ўйинларда янги футболчиларни кўрикдан ўтказиш имконига эга бўламиз.
- Тошкентдаги йиғин қандай давом этяпти?
- Яхши. Ушбу йиғин доирасида бир қатор назорат-синов учрашувларида майдонга тушяпмиз. 3 февраль куни "Андижон” жамоасига қарши ўртоқлик учрашувини ўтказдик. Ўйинда Алишер Шоғуломов, Зайниддин Тожиев ва Жора Оганесян томонидан киритилган голлар эвазига 3:0 ҳисобида зафар қучдик. Энди "Навбаҳор” (8 феврал) ва "Қизилқум” (11 феврал) жамоалари билан куч синашамиз. Дубайга учиб кетишимиздан олдин, аниқроғи 14 феврал куни Тошкентда ўз йиғинини ўтказаётган Қозоғистон клубларининг бирига қарши тўп сурамиз.
- "Локомотив” жамоаси учун янги бунёд этилган стадионни кўздан кечирдингизми?
- Албатта. Жаҳон андозаларига жавоб берадиган бу стадионда мавсумни ўтказиш мароқли. Сифатли майдондаги ўйин ҳам шунга яраша бўлиши керак. Жамоамиз мухлислари, матбуот ходимларининг ишлашлари учун ҳам барча шароитлар муҳайё қилинган.
- Ўтган мавсум жамоа муваффақиятига катта ҳисса қўшган Павел Бугало, Бахтиёр Ашурматов, Зайниддин Тожиев каби тажрибали футболчилар билан шартномалар узайтириладими?
- Мен ёшларга катта эътибор бераман. Таркибни ёшартириш тарафдориман. Лекин бу футболчиларнинг жамоада қолишини истардим. Уларнинг бой тажрибаси олий лига баҳсларида жамоамизга фойда келтиради.
- "Локомотив”нинг ёшлар жамоаси билан танишдингизми?
- Амирликлардан қайтиб келганимиздан сўнг жамоамизнинг ёшлар таркиби билан учрашдим. Улар ҳам мавсумга тайёргарликни бошлашди. Таркибда истеъдодли ёшлар кўп. Ўйлайманки, яқин келажакда уларнинг кўпчилиги асосий таркибда тўп суришади.
- "Пахтакор” жамоасида сиз билан бирга тўп сурган футболчилар билан муносабатларингиз қандай? Бу ерга келишдан олдин улар билан ҳам маслаҳатлашдингизми?
- Улар билан дўстона алоқаларим сақланиб қолган. Биз худди бир оиладек эдик. Миржалол билан "Бунёдкор”га қарши ўйнаганда, Игорь ва Геннадий Денисовлар билан эса "Олмалиқ”қа қарши кечган ўйинларда учрашдим. Улар билан майдонда рақибмиз холос, унинг ташқарисида эса дўстмиз.
- Ўзбек футболи ҳақида қандай фикрдасиз?
- Ўзбек футболи барча даврларда ўзининг кучли мактабига эга бўлган. Ўтган асрнинг 60-70 йилларида "Пахтакор” жамоаси шарафини ҳимоя қилган Гена Красницкий, Миша Ан, Володя Фёдоров, Биродар Абдураимов каби футболчилар бутун иттифоқда машҳур эдилар. Кейинги авлод орасида Миржалол Қосимов, Геннадий Денисов, Игорь Шквырин, Азамат Абдураимов, шунингдек, фаолиятини давом эттираётган Максим Шацких ана шундай машҳурлик чўққисига чиқишди. Бугунги кунда ҳам бу анъанани давом эттираётганлар етарлича топилади. Миллий терма жамоангиз ЖЧ-2014 финал босқичига чиқишга асосий даъвогарлардан бири бўлиб турибди. Олимпиячиларингизда ҳам имкониятлар етарли. Ўсмирлар терма жамоангиз Мексикадаги жаҳон чемпионатида муваффақиятли иштирок этди. Бундан ҳам хабарим бор. Энг муҳими, мамлакат ҳукумати футбол тараққиётига жуда катта эътибор қаратяпти. Давлат томонидан бўлаётган эътибор ўз мевасини бермоқда.
- Фаолиятингизнинг маълум қисми ўтган Греция футболида катта пасайиш кузатилмоқда. Терма жамоа ЕВРО-2004даги оламшумул муваффақиятдан сўнг тобора пастлаб боряпти...
- Фикрингизга қўшиламан. Бу ҳолат мени ҳам ташвишга соляпти. Бунга энг катта сабаб – Грециядаги иқтисодий инқирознинг ҳамон давом этаётгани. Буни бутун дунё билади.
- Фаолиятингиздаги энг эсда қоларли воқеаларни эслай оласизми?
- Бундай воқеалар кўп бўлган. "Бавария”га қарши ўйин, 1976 йили Европа чемпионатидаги иштирокимиз, Аргентина терма жамоаси дарвозасига киритган голим. Амалдаги жаҳон чемпионларига қарши ўйин 1:1 ҳисобида якунланганди. Аргентина таркибида ягона голни кимсан Марадона киритганди. Жаҳон чемпионатларидаги иштирокимизни ҳам унутиб бўлмайди. Шахсий коллекциямда Марадона, Зико каби машҳур футболчиларнинг футболкалари бор эди. Лекин уларнинг аксариятини яқинларимга совға қилганман. Фақат Зиконинг футболкаси қолган.
ХОРЕН ГЕОРГИЕВИЧ ОГАНЕСЯН
1955 йилнинг 10 январь куни Арманистоннинг Ереван шаҳрида туғилган. Арманистонинг 20 асрдаги энг яхши футболчиси. Ёшлар ўртасида Европа чемпиони (1976). Москва Олимпиадасининг бронза медали совриндори (1980). "Арарат” таркибида собиқ иттифоқ чемпиони (1976), кубоги соҳиби (1975). Григорий Федотов номидаги тўпурарлар клуби аъзоси. Мураббийлик соҳасида "Пюник” билан бирга Арманистон чемпиони (1996, 1997), мамлакат кубоги эгаси (1996 года), Суперкубокни (1998) қўлга киритган. Собиқ иттифоқ терма жамоаси либосида 34 та ўйинда 6та гол урган. Терма жамоадаги илк учрашувини Руминияга (3:1, 14.10.1979) қарши ўтказган. Сўнгги ўйин эса Норвегия (1:1, 10.10.1984) билан бўлиб ўтган. Олимпия терма жамоасида 3 та ўйинда 2та голга муаллифлик қилган.
Манба: www.lokomotiv.uz
|
|
Категория: Ўзбек футболи |
Просмотров: 445 |
Добавил: 11x11
| Рейтинг: 0.0/0 |
| |
 | |  |
|
