Аргентиналик ярим ҳимоячи Хуан Себастьян Верон жорий йилда футболчилик фаолиятида ўзининг сўнгги мавсумини ўтказаяпти. Аслида Верон ўтган йилнинг ноябрь ойида бутсасини михга илишга қарор қилганди. Бироқ унинг "Эстудиантес”даги жамоадошлари ва клуб мухлислари футболчини яна олти ой тўп суришга кўндиришди. Верон собиқ жамоасига 2006 йилда қайтганди.  

Таъкидлаш лозимки, айни дамда Верон фаолиятини якунлагач, нима билан шуғулланиши борасида бир тўхтамга келгани йўқ. Унинг олдида бир нечта вариантлар бор. Эҳтимол, у  "Эстудиантес”нинг спорт директори лавозимини эгаллар. Ёки Аргентина терма жамоасининг маслаҳатчи мураббийи бўладими? Мухлислар эса Веронни "Эстудиантес” ёки Аргентина Футбол федерацияси президенти ролига муносиб кўришмоқда.

Яқинда аргентиналик журналистлар Верон билан суҳбатлашишга муваффақ бўлишди.

-  Сиз қайси жамоа сафида фаолиятингизнинг энг ёрқин дамларини ўтказгансиз?

-  "Лацио”даги фаолиятим барқарор ўтган. У ерда икки йил тўп сурган бўлсам-да, клуб етакчиси эдим. Қолган клубларда ҳам яхши ўйнадим. Аммо барибир Римдаги фаолиятимни мароқ билан эслайман.

- 2001 йилда кўпчилик Зидан билан сизни дунёнинг энг яхши ярим ҳимоячилари сифатида эътироф этганди. Сизни франциялик футболчи билан тенглаштиришларига қандай қарайсиз?

- Биласизми, мени Зидан билан тенглаштириш керак эмас. Иккимизнинг ўйин услубимиз тамоман бошқа-бошқа. Лекин италияликлар Тотти, Дель Пьеро, Зидан каби ўйинчиларни ёқтиришади. Уларни фантазистлар деб аташади. Мени ҳам улар қаторига қўшишмоқчи бўлишди. Бироқ, мен ундай тоифадаги футболчи эмасман.

- Қайси жамоадошингиз билан тил топишиш қийин бўлган?

«Эстудиантес» ҳимоячиси Нестор Кравьотто билан муаммоларга дуч келардим. Бундан ташқари, Роберто Манчини билан ҳам тил топишиш мушкул эди.

- Чиндан ҳам Робертонинг характери анча оғир. Бунга Карлос Тевес билан бўлаётган воқеалар мисол бўла олади?

- Сиз ҳақсиз. Лекин барибир у бошқача инсон. У билан "Сампдория” ва "Лацио” жамоаларида бирга тўп сурганмиз. Кейинчалик Манчини билан йўлимиз "Интер”да кесишди.

"Сапмдория”да ўйнаб юрган кезларимда Роберто билан муштлашишмизга сал қолган. Ўйинларнинг бирида мен жарима тўпини аниқ амалга ошира олмаганман. Шунда Роберто менга танбеҳ берди. Мен ҳам унга оғзаки жавоб қайтардим. Кийиниш хонасида эса Манчини ўзини боса олмай менга ташланди. Бахтимга жамоадошларим уни тўхтатиб қолишганди.

- Наҳотки?

- Биламан, ўшанда ўзимни бундай тутмаслигим керак эди. Кейинроқ ундан кечирим сўрадим. "Интер”га қарши кечган ўйинда кейин Роберто менга шундай деди: "Хуан агар сен ўз имкониятларинг даражасида тўп сура олсанг, биз албатта чемпион бўламиз”.  Унинг сўзлари мен учун анча далда бўлганди.

- "Манчестер Юнайтед” бош мураббийи сэр Алекс Фергюсон билан муносабатларингиз қандай эди?

- Яхши, лекин у ҳар доим ҳам бир хил муносабатда бўлавермайди. Бу битта мен билан бўлган ҳолат эмас. У бир-икки ўйинчини ажаратиб олади ва бутун эътиборни уларга қаратади. Масалан, Ван Нистелрой жамоа тўпурари бўлишига қарамай, уни хотиржам бошқа жамоага бериб юборди.

- Шотландиялик мутахассис билан орангизда тушунмовчиликлар юзага келганми?

- Бундай ҳолат кузатилмаган. Бироқ унинг ўзини тутиши бироз ғалати. Аввалига Фергюсон сизни ёш боладек эркалайди. Аммо вақт ўтиши билан вазият ўзгаради. Худди унга ортиқ керак эмасдек, таассурот ўйғонади.

- Фаолиятингиздаги энг яхши мураббий ким?

- Бирортасини алоҳида ажратиб кўрсата олмайман. Улар сони кўп.

-  Клуб базасидан қочиб кетган пайтлар бўлганми?

-  Гоҳида шундай қилишга тўғри келарди.

- Буни қандай амалга оширар эдингиз?

- Ҳаммаси оддий машинага ўтириб кетардим. У пайтлар умуман бошқача эди. Журналистлар унчалик кўп эмасди ва футболчиларнинг қадамини пойлаб юришмасди. Ҳозир бундай қила олмайсиз. Дарҳол оммага эълон қилишади. Ажойиб замонларда яшаяпмиз-да, ўзиям.

- Футбол оламидаги дўстларингиз...

- Креспо, Ортега, Пьохо Лопес, Кили Гонсалес… «Эстудиантес»да бирга тўп сурган барча футболчилар. Улар сони ниҳоятда кўп.

- Душманингизчи?

- Ўйлайманки, улар унчалик кўп эмас.

- Сиз Аргентина футболининг "қироли” Мардона ва бугунги кундаги юлдузи Месси билан бирга тўп сургансиз. Уларни тенглаштириш мумкинми?

- Очиғини айтсам, Марадона каби футболчи бошқа туғилмаса керак. Уни майдонда бажарган ишлари ҳеч кимнинг қўлидан келмайди. Кўпчилик Диегонинг ўйинини телевизорда кўриб ҳайратланарди. Мен эса у билан елкама-елка ўйнаганман.

Бир куни Марадона мендан Фабио Каннаваро ва Лилиан Тюрамнинг футболкасини сўраганди. "Парма” – "Ювентус” учрашувидан кейин унинг илтимосини Тюрамга айтганимда у ишонмаганди. Кейин Фабионинг олдига бориб, уни Марадона телефонда кутаётганини айтганимда Каннаваро йиғлаб юборган.

- Футбол оламида Диего ва Леонинг савияси бир хил деб ўйлайсизми?

- Иккисининг тезлиги деярли бир хил. Ҳозир бошқа замон, бошқача футбол. Лео айни дамда дунёнинг энг кучли жамоаларидан бирида тўп суради. Диего эса... мафиялар билан донг таратган Неаполда фаолият юритган.

- Месси ҳаётда қандай. ЖАРдаги Жаҳон чемпионати пайтида сиз у билан битта хонада истиқомат қилгансиз?

- Лео билан 2007 йилги Америка кубоги баҳсларида танишганман. У ҳамиша жим ўтирадиган ва жамоага киришиб кетишга ий-манадиган футболчилар сарасига кирарди. Унинг характери ўзи шунақа. Доимо жим юради. Ҳозир у бироз ўзгарган.

Лекин барибир у билан суҳбатлашганлар ўзларига шундай савол беришлари мумкин: "Бу йигит умуман гапирмайди, унга нима бўлган ўзи?”. Бунинг жавоби битта: "Шунчаки, Лео оддий инсон ва унинг сирлиги ҳам шунда”.

"Футгол” маълумотномаси

Тўлиқ исми: Хуан Себастьян Верон

Туғилган сана: 1975  йил. 9 март

Бўйи - 183 см

Вазни - 79 кг

Ўйнаган жамоалари:

1994 - 1996  Эстудиантес - 22 (2)

1996   Бока Хуниорс - 17 (3)

1996 - 1998  Сампдория - 61 (7)

1998 - 1999  Парма - 26 (1)

1999 - 2001  Лацио - 53 (11)

2001 - 2003  Манчестер Юнайтед - 51 (7)

2003 - 2007  Челси - 7 (1)

2004 – 2006   Интер - 49 (3)

2006 – 2007  Эстудиантес - 29 (2)

2007 - 2011  Эстудиантес - 78 (16)

Эришган ютуқлари:

Аргентина чемпиони: Апертура 2006, Апертура 2010

Либертадорес кубоги ғолиби : 2009

УЕФА кубоги соҳиби : 1999

Италия кубоги соҳиби: 1999, 2000, 2005, 2006.

Италия чемпиони: 1999/00, 2005/06.

Италия суперкубоги соҳиби: 2000, 2005.

Европа суперкубоги соҳиби: 1999

Англия чемпиони: 2002/03

Аброр БЕК тайёрлади