Жамоанинг натижасига бош мураббийлар жавобгар дейишади. Шунинг учун бирор-бир клуб омадсизликка учраши билан бош мураббий истеъфога чиқарилади. Охирги пайтларда Европанинг бир қатор жамоалари мухлислар кутган ўйинни намойиш эта олмаётгани боис шу клубларни бошқараётган мутахассисларнинг курсиси қимирлаб қолди, дейиш мумкин. Бугунги мақоламизда қил устида қолган мураббийлар хусусида сўз юритамиз.

Арсен Венгер (Арсенал)

Узоқ йилдан бери лондонликларни бошқариб келаётган франциялик мутахассиснинг нима сабабдан ҳамон истеъфога чиқмагани кўпчиликни ажаблантирмоқда. Негаки, "Арсенал” сўнгги йилларда ўз мухлисларини хурсанд эта олмаяпти. Айниқса, бу йилги мавсумда Венгер шогирдлари нурсиз ўйин намойиш этишмоқда. Франциялик мутахассис эса бунга жамоани етакчи футболчилар тарк этишганини баҳона қилиб кўрсатмоқда. Аслида-чи? Менимча, бу ерда гап фақат Венгерда. Негаки, унинг тактикалари ва ғоялари аллақачон бошқа жамоалар учун ёд бўлиб кетган. Тўғри у ёшлар билан ишлашни яхши кўради. Аммо замонавий футболда бунинг ўзи камлик қилишини бир неча бор кўрдик.

Шу ерда бир ҳақиқатни тан олайлик. Кўпчилик Фарғонанинг "Нефтчи” жамоаси бош мураббийи Юрий Саркисянни "Манчестер Юнайтед” устози сэр Алекс Фергюсонга қиёслайди. Аслида эса Юрий Вазгеновични айнан Арсен Венгер билан тенглаштириш мумкин. Бу икки мутахассис ҳам ёшлар билан ишлашни ёқтиради. Бундан ташқари, уларнинг тактикаси ва футболга бўлган қараши деярли эскирган.

Сўнгги кунларда Арсен Венгерни вориси ким бўлади, деган савол кўпчиликни қизиқтирмоқда. Маълумотларга қараганда, "Арсенал” клуби раҳбарияти "Барселона” билан шартномасини узайтиришга шошилмаётган Хосеп Гвардиолани Лондонга олиб келишни режелаштиришмоқда.  Бу режа қанчалик амалга ошишини эса олий ҳакам – вақт кўрсатади.

Айтганча, "Арсенал” ўтган ҳафтада Англия кубоги мусобақасидан чиқиб кетгач жамоа мавсумни совринсиз якунлаши деярли ойдинлашди. Бундан шундай хулоса қилиш мумкинки, жамоада ниманидир ўзгартириш керакка ўхшайди.

Клаудио Раньери (Интер)

Чемпионлар лигасининг 2010 йилги ғолиби – "Интер” Моуриньо кетганидан бери бош мураббийга ёлчимаяпти. Португалиялик мутахассисдан кейин жамоада бироз муддат ишлаган Рафа Бенитес гарчи, жамоа билан иккита соврини ютганига қарамай, "Интер” президенти Масиммо Моратти испаниялик мураббийга чиқиш эшикларини кўрсатди. Жорий мавсумга "Интер” Гасперини бошчилигида киришганди. Аммо ушбу мутахассис ҳам яхши натижаларни қайд эта олмагач, у ҳам истеъфога чиқарилди. Кейин катта умидлар билан Клаудио Раньерини олиб келишди. Раньерининг дебют учрашуви омадли бўлди. Умуман "Интер” Чемпионлар лигаси гуруҳ босқичини муваффақиятли якунлай олди. Аммо жамоага барқарорлик етишмаётгани яққол сезилиб турибди. "Кўк-қоралар” янги йилнинг дастлабки ойида анча мазмунли ўйин кўратишаётганди. Аммо Италия чемпионатининг сўнгги турларида жамоа қимматли очколардан маҳрум бўлди.  Ҳозир Италияда кўпчилик Раньерининг истеъфоси ҳақида гапирмоқда.

Қизиғи шундаки, Милан шаҳрининг иккинчи жамоаси ҳам каталонияликлар устози Пеп Гвардиола ишқида ёнмоқда. Буни клуб хўжайини Масиммо Моратти бир неча марта таъкидлаб ўтди.

Юқорида Арсен Венгерни  Фарғонанинг "Нефтчи” жамоаси бош мураббийи Юрий Саркисянга қиёслагандик. "Интер” эса Ғузорнинг  "Шўртан” клубига ўхшайди. Ҳар икки жамоа ҳам охирги пайтларда мураббийларни қўлқопдек алмаштирмоқда.

"Интер” мухлислари ҳам аллақачон Скудеттодан умид ўзиб бўлишган.

Андре Виллаш Боаш (Челси)

Жозе Моуриньонинг яна бир собиқ жамоаси ҳам айни дамда Англияда у қадар муваффақиятли иштирок этаётгани йўқ. Қизиғи шундаки, "аристократлар ҳам худди "Интер” каби Моуриньодан сўнг мураббийга ёлчишмаяпти. Тўғри бу ерда Карло Анчелотти самарали ишлади. Бироқ у ҳам жамоа билан Чемпионлар лигасида зафар қуча олмагач уни истеъфога чиқаришди. Айни дамда "Челси” бош мураббийи Арндре Виллиаш Боашнинг аҳволига ҳавас қилиб бўлмайди. Негаки, португалиялик мутахассис бошчилигидаги жамоа Англия чемпионатида муваффақиятли иштирок эта олмаяпти. Бундан ташқари, Чемпионлар лигасида ҳам  ишлар яхши деб бўлмайди. Шунинг учун Роман Абрамович янги мураббий излашга тушган бўлса ажаб эмас. Олдинроқ Гус Хиддинк борасида гап-сўзлар тарқалганди. Аммо голландиялик мутахассис ўтган ҳафтада "Анжи”да иш бошлади.

Сўнгги маълумотларга қараганда, "Челси” бошқарувига италиялик мутахассис Фабио Капелло келиши мумкин экан. Бошқа бир хабарларда эса Жозе Моуриньонинг Лондонга қайтиши ҳақида маълум қилинмоқда. Воқеалар ривожи қандай якун топишини кўзатишда давом этамиз.

Манба "Футгол” газетаси

Аброр Деҳқонов тайёрлади.