Португалиялик мутахассис Жозе Моуриньо мавсум якунига етгач, ўзига бошқа иш жойи топса ажаб эмас. Айтишларича, Жозе ёзда Англияга кўчиш ўтиши мумкин экан. Ўз навбатида премьер лиганинг айрим жамоаларининг ороми йўқолди. Уларнинг барчаси Моуриньони қўлга киритишга ҳаракат қилиши шубҳасиз. Даъвогарлар руйхати жуда узун – "Челси”, "Арсенал”, "Тоттенхэм” ва Манчестер шаҳрининг икки жамоаси. Бундан ташқари, Жозе Англия терма жамоасида иш бошалаши мумкинлиги ҳақидаги хабарлар ҳам йўқ эмас.

Sports.ru сайти  мухбири эса Моуриньонинг қайси жамоага келиши борасидаги тахминлари билан ўртоқлашди

«Манчестер Сити»

Ижобий. «Сити» Жозе Моуриньо учун жуда яхши вариант. Негаки, ушбу клуб хўжайини португалиялик мутахассисга керак бўлган пулларни бера олади. Роберто Манчини Англия чемпионатида ижобий натижа кўрсатаётганига қарамай, Чемпионлар лигасидан чиқиб кетди. Агар италиялик мутахассис ўзига билдирилган ишончларни оқлай олмаса уни истеъфога чиқаришлари мумкин. Моуриньо эса унинг ўрнини босишга муносиб номзод.

Сир эмаски, "шаҳарликлар” раҳбарияти Европанинг энг нуфузли мусобақасида ғалаба қозонишни хоҳлашмоқда. Манчинида эса бу борада тажриба кам. Португалия мураббий эса Чемпионлар лигасида қандай ғалаба қозонишни билади. У икки марта мазкур турнирда бош совринни қўлга киритган. Моуриньо бошчилигидаги "Интер” 2010 йилда кимсан "Барселона”ни финалдан маҳрум этгани кўпчиликнинг ёдидан кўтарилмаган бўлса керак.

Салбий. Агар Манчини АПЛда биринчи ўринни қўлга киритса, Моуриньога ҳожатга қолмайди. Негаки, одатда чемпион мураббийларни алмаштирилмайди.

Бундан ташқари, клуб раҳбарлари Манчинининг ҳужумкор тактикасидан воз кечмасликлари мумкин.

Моуриньонинг фикри:

«Мен «Манчестер Сити»да? Бўлиши мумкин эмас», – деганида Жозенинг мадридликлар билан ишлаш иштиёқи баланд эди.

Келиш имконияти: 50%.

«Челси»

Ижобий. Португалиялик мураббий "Смэмфорд Бриж”даги ҳаётини мароқ билан ёдга олади. Ўз навбатида инглиз ҳамкасбларимиз "аристократлар” билан ишлаган мутахассисларни дарҳол Моуриньо билан солиштиришади.

Худди шундай ҳолат Андре Виллаш Боаш билан ҳам содир бўлди. Аксига олиб "Порту”нинг собиқ устози Лондон жамоаси билан барқарор ўйин кўрсата олмаяпти.

Боаш клуб хўжайини Роман Абрамовичдан бироз вақт сўрамоқда. Россиялик миллиардер эса кутишни ёқтирмайди. Шунинг учун "аристократлар” Чемпионлар лигасида ютиш учун собиқ мураббийни қайтаришлари мумкин.

Салбий. Моуриньонинг "Челси”дан кетишига сабаб у Абрамович билан тортишиб қолганди ва уларнинг ўртасига совуқчилик тушган. Бунинг устига Жозе унга ҳурматсизлик қилган жойга қайтиб келишни истамаслиги ҳам турган гап.

Қолаверса, лондонликлар Боашни олиб келиш учун оз эмас кўп эмас 12 миллион фунт пул сарфлашди.

Лекин кичик Моуриньо деб таърифланаётган Боаш ўзига билдираётган ишончни оқламаяпти. Шундай бўлса-да, Абрамович Андредан хафа эмас. Негаки, "Челси” Чемпионлар лигасида омадли юришни давом эттирмоқда.

Моуриньонинг фикри:

"Мен  «Челси»ни яхши кураман, Лондонда яшаганимда ўзимни бахтиёр ҳис этганман. Бу ерда бир умр қолсам керак деб ўйлагандим. Бироқ, орадан бир неча ой ўтиб кетишига тўғри келиб қолди. Шундай экан олдинда сени нималар кутаётганини билмайсан”.

Келиш имконияти: 15%.

«Манчестер Юнайтед»

Ижобий. Кўп йиллардан бери Моуриньо сэр Алекс Фергюсоннинг  меросхўри сифатида эътироф этилади. Бу икки мутахассис бир-бирини қанчалик ҳурмат қилиши барча яхши билади. Жозе ҳам худди шотландиялик мутахассис каби футболчилар билан руҳий жиҳатдан ишлаш ҳадисини олган. Фергюсон гарчи, "қизил иблислар” билан яна уч йил ишлаш нияти борлигини айтаётган бўлса-да, Моуриньонинг келиши уни фикридан қайтариши мумкин. Яна ким билади, дейсиз.

Салбий. Балки САФнинг ўзи яна уч йил "МЮ”ни бошқарар. Бунинг учун қария мураббийда имконият бор. Бундан ташқари, "Манчестер Юнайтед” раҳбариятига жамоа билан узоқ муддат ишлайдиган мутахассис керак. Моуриньо эса ўзига янги саргузаштлар излашни ёқтиради. "МЮ”нинг афсонавий футболчилардан бири сэр Бобби Чарльтон фикрига кўра, Фергюсоннинг ўрини эгаллаш учун унинг собиқ шогирди Оле Гуннар Сулшер муносиб номзод экан. Жозе эса Чемпионлар лигасини ютгач, жуфтлакни ростлайди.

Моуриньонинг фикри:

"Манчестер Юнайтед”да ишлашга қарши эмасдим. Аммо бу ерда бошқа масала бор. Ҳаиқиқатдан ҳам  «Юнайтед» мени  сэр Алекс Фергюсоннинг вориси сифатида қабул қила олармикан? Агар шундай бўлса, бу ниятим амалга ошиш эҳтимолдан ҳоли эмас”.

Келиш имконияти: 10%.

«Тоттенхэм»

Ижобий. "Шпорлар” ёзда Гарри Реднаппсиз қолишлари деярли аниқга ўхшаб қолди. Негаки, ушбу мутахассис Англия терма жамоасининг кейинги устози бўлиши учун асосий даъвогарлардан бири бўлиб турибди. Маълумки, Европа чемпионатидан кейин Капеллонинг АФА билан тузган шартномаси якунига етади. Реднапп италиялик мутахассиснинг ўрнини эгаллашига кўпчилик шубҳа қилмаяпти.

Қолаверса, "Тоттенхэм” раҳбарларидан бири Дэниэл Леви анчадан бери Моуриньо ишқида ёнмоқда. "Реал” бош мураббийининг айтишича, бугунги кунга қадар "Шпорлар” беш марта Жозега расмий таклиф билан чиқишган. 2007 йилда Моуриньо "Челси”дан кетгач, лондонликлар португалиялик мутахассисга худди "аристократлар” каби маош таклиф қилгани ҳақида маълумотлар бор. Ўшанда, "Челси” раҳбарияти Моуриньога қўшимча пул тўлаб бир йил давомида Англия клубларини бошқармасликни талаб қилишган экан.

Моуриньо учун «Тоттенхэм»даги саргузашти худди "Челси”дагидек бўлади. Жамоа олдига АПЛда чемпион бўлиш вазифаси қўйилади.

Реднапп қанчалик кучли мутахассис бўлмасин, барибир жамоага барқарорлик етишмаяпти. Айнан мана шу нарса олтин медал учун курашда "Шпорлар”га қимматга тушмоқда. Моуриньо келгач, барчаси ўзгаришиэҳтимолдан ҳоли эмас.

Салбий. "Тоттенхэм” президенти Моуриньонинг ўзига хос траснферлари учун етарлича пул топиб бера олмаслиги мумкин. Негаки, "Шпорлар”нинг молиявий имконияти у қадар юқори деб бўлмайди.

Бундан ташқари, Реднапп ҳеч қачон "Тоттенхэм”нинг молиявий масалаларига аралашмайди. Моуриньо эса барчаси ўз назоратида бўлишини хоҳлайди. Шунинг учун португалиялик мутахассис ва Левининг тил топишиб кетишига ишониш қийин. 

Боз устига Моуриньо бундай ҳолатда ишлашга сира рози бўлмаслиги ойдек равшан.

Моуриньонинг фикри:

"Реал”дан кетгач, Англия ёки Италиянинг энг кучли жамоалардан бирида ишлашни хоҳлайман. Лекин илгари мен бахтли бўлган клубнинг асосий рақибида фаолият юртишни истамайман”.

Келиш имконияти: 10%.

«Арсенал»

Ижобий. Бир ҳафта олдин англиялик журналистлар Арсен Венгер "Реал”ни бошқариш учун биринчи рақамли номзод дея эътироф этишди. 2009 йилда ҳам мадридликлар президенти Флорентино Перес франциялик мутахассисга таклиф юборганди. Ўшанда Венгер унга рад жавобини берган. Ҳозир эса вазият умуман бошқача. Бундан ташқари, Моуриньо ҳам худди Венгер каби мухлисларда норозилик ўйғотмоқда. Шундай экан уларнинг ўрин алмашиш эҳтимоли ҳам йўқ эмас. 

Бугунги кунда "Арсенал”га айнан Моуриньодек қаттиққўл мураббий етишмаяпти. Жозе келгач, лондонликлар учун 1:0 ҳисоби энг ёқимли ҳисоб бўлиб қолиши мумкин.

Салбий. Бизнингча, мухлисларнинг хоҳиш-истаги туфайли клуб раҳбарлари Венгерни истеъфога чиқариб юборишига ишониш қийин. Арсеннинг "Тўпчилар” билан тузган шартномаси 2014 йилда якунига етади. Айнан мана шундан сўнг, "Арсенал” раҳбарлари янги мураббий излашга киришишса ажаб эмас.

Моуриньонинг фикри:

"Арсенал” юлдузлар фабрикаси бўлмай қолганига анча бўлди. Мен бу жамоанинг муаммолари нимада эканлигини яхши биламан”.

Келиш имконияти: 5%

«Ливерпуль»

Ижобий.  Моуриньо «Порту»дан кейин айнан "Ливерпуль”га келиши мумкин эди. Бироқ клуб раҳбарлари Рафа Бенитес номзодини маъқул кўришганди. Ҳозир Англиянинг энг буюк клублардан бири мухлисларнинг севимли ўйинчиси бўлган Кенни Далглиш бошқармоқда. Ўтган ҳафта ушбу мураббий клуб раҳбарларини танқид қилгач, орага совуқчилик тушгани бор гап. Америкалик миллиардерлар Чемпионлар лигасини ютадиган мураббий излашга тушишгани ҳеч кимга сир эмас. Агар "Ливерпуль” бу йил ҳам ЕЧЛдан маҳрум бўлса, Даглиш истеъфога чиқиши аниққа ўхшайди.

Салбий. "Ливерпуль” ҳам худди "Манчестер Юнайтед” каби узоқ йил давомида ишлайдиган мураббий билан шартнома имзолашни маъқул кўради. Моуриньо эса...

Моуриньонинг фикри:

"Ливерпуль”дек жамоада ишлаш ҳар бир мураббийнинг орзуси. Аммо 2004 йилда "Челси”нинг янги ғояси ушбу клубга ўтишимга тўсқинлик қилган”.

Келиш имконияти: 3%.

Англия терма жамоаси

Ижобий. 2007 йилда Стив Макларен истеъфога чиқгач, Моуриньо Англия терма жамоасини бошқариш учун асосий номзод эди. Аммо ўшанда португалиялик мутахассис бунга ҳали эрта эканлигини таъкидлаганди. "Реал”даги бош оғриқлардан сўнг, унга яна Англия варианти пайдо бўлиши мумкин.

Салбий. АФА вакиллари Англия терма жамоасининг кейинги бош мураббийи инглиз бўлишини таъкидлашдан чарчашмаяпти. Шунинг учун Гарри Реднапп "уч шерлар” бошқарувини қўлга олишга жуда яқин турибди. Бундан ташқари, Англия Футбол Ассоциацияси раҳбарлари янги мураббийга кўп маош бера олмасликларини айтиб ўтишди. Айни дамда Капелло йилига 6 миллион фунт миқдорида ойлик олмоқда. АФА эса харажатларни камайтиришни режалаштирмоқда. Демак, Моуриньо уларга қимматлик қилади.

Моуриньонинг фикри:

«Англия терма жамоасини қабул қилмаганимнинг сабаби мен бундай турмуш тарзига тайёр эмасдим. Одатда терма жамоалар йил давомида бир нечта ўйин ўтказишади холос. Қолган вақт эса томошабин бўлиб ўтириш керак бўлади. Мен бундай зерикарли ҳаётга ўрганмаганман”.

Келиш имконияти: 7%.

Аброр Деҳқонов тайёрлади