| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Август » 21 » «Андижон»га техник мағлубият ёзиладими? ёхуд ПФЛдан кимдир жазоланиши керак!
13:52 «Андижон»га техник мағлубият ёзиладими? ёхуд ПФЛдан кимдир жазоланиши керак! |
Хабарингиз бор, ПФЛнинг қарорига мувофиқ олий ва биринчи лига клублари пойтахтимиздаги "Чиғатой” марказида фаолият юритаётган "Футбол-МЕД” шўъба корхонасида тиббий кўрикдан ўтишга мажбур. Аввалига деярли барча клубларимиз бунга эътироз билдиришганди. Аммо кейинчалик барча индамайгина бўй суниб қўя қолди. Айниқса, иккинчи давра арафасида клубларимиз "Чиғатой”га келган ёки келмаганлигини билмай қолдик. Маълумотларга қараганда, "Футбол-МЕД”да тиббий кўрикдан ўтиш барчага манзур бўлган. Шу боис ҳеч ким мавсум бошида бўлгани каби эътироз билдирмабди. Ёдингизда бўлса, икки ҳафта муқаддам шўъба корхона раҳбари Муаззам Мелиева билан суҳбат уюштирганимизда мамлакатимизда футбол маданияти ошаётганлигига алоҳида урғу берганди. Бироқ ўша маданиятга футболчилар эмас, балки расмий шахслар путур етказаётгани кишини жахлини чиқариши билан бирга, ҳайратини ҳам оширади.
"Футбол-МЕД” билан ПФЛ ҳамкорликда ишлайдими?
Келинг, ҳаммасини бир бошидан бошласак. ПФЛ йил бошида қабул қилган қарорига кўра, клубларимиз "Футбол-МЕД” шўъба корхонасида тиббий кўрикдан ўтиши лозим. Демак, ўз-ўзидан кўриниб турибдики, ушбу шўъба корхона футболчини носоғлом деб топса, у маълум муддат жамоасига ёрдам бера олмайди. Аниқроғи, қайта даволаниб, яна тиббий кўрикдан ўтади. Агар у иккинчи сафар ҳам носоғлом деб топилса, яна "мажбурий таътил”ни давом эттираверади. Хуллас, "Футбол-МЕД” кўрикдан ўта олмаган футболчиларнинг исми-шарифини ПФЛга тақдим қилади. Профессионал Лигамиз мутасаддилари шунга асосан клубларимизни назорат қилишади. Аниқроғи, икки ташкилот ҳамкорликда иш юритади. Аммо ўша ҳамкорликка ўтган ҳафта сал путур етгандек бўлди. Бу ҳақида сал қуйироқда тўхталамиз. Мавсум аввалида тиббий кўрикдан ўта олмаган Кенжа Тўраев "Насаф” шарафини ОФК Кубогида ҳимоя қилган бўлса-да, олий лигани бирор марта майдонга тушгани йўқ. Сабаби, у қайта текширувлардан кейин ҳам соғлом деб топилмаган. Ишонмасангиз текшириб кўринг!
Ёзги тиббий текширувлар давомида ҳатто тишини даволамаган футболчиларга ҳам майдонга тушиш учун рухсат берилмаслигини Муаззам Мелиева каминага берган интервьюсида айтиб ўтганди. Шартли равишда, уларга ўн кун даволаниш имкониятини берганлигини таъкидлаганди.
Ўтган ҳафта ўзбек футболида тушунарсиз вазият юзага келди. Аслида ҳаммаси тушунарли, аммо ҳеч ким буни тушунтиришни истамаяпти. Давралар оралиғида "Андижон” жамоасига келиб қўшилган легионер Юрий Целих тиббий кўрикдан ўта олмаган. Маълум бўлишича, бу футболчининг юраги вақти-вақти билан безовта қилган. Буни "Футбол-МЕД” шўъба корхонасидаги шифокорлар ҳам билган ва Целихга майдонга тушиш учун рухсат беришмаган. Аниқроғи, Юра даволаниш учун қайтариб юборилган. Табиийки, у иккинчи давранинг дастлабки турларини майдондан ташқарисида ўтказиши лозим эди, бироқ ҳаммаси аксинча бўлиб чиқди. Ёдингизда бўлса, Целих 14-турда Тошкентда "Пахтакор” дарвозасини ишғол қилди. "Олмалиқ”қа қарши беллашувда ҳам майдонга тушди. Бундан хабар топган "Футбол-МЕД” раҳбари Муаззам Мелиева ПФЛга очиқ хат ёзган. Қизиғи, дастлабки икки турда майдонга тушиб, гол уришнинг уддасидан чиққан легионер футболчи энди даволаниш курсларини бошлаб юборди. Агар эътибор берган бўлсангиз, украиналик ҳужумчи "Қизилқум”га қарши ўйинда майдонга тушмади. Целих маълум муддатдан кейин қайтадан тиббий кўрикдан ўтади, агар ҳаммаси кўнгилдагидек чиқса, у яна сафга қайтади, мабодо учинчи тиббий кўрик натижаси ҳам ижобий чиқмаса, футболчи "таътил”ни давом эттиришга мажбур. Хўп, ПФЛ ва "Футбол-МЕД” ҳамкорликда ишлайдими ўзи? Агар ҳамкорликда ишласа, нега Целих иккинчи даврани дастлабки турларида майдонга тушди? Унга ким рухсат берди? "Футбол-МЕД” рухсат бермаган бўлса, ПФЛ кўнгилбўшлик қилдими? Ёки "Андижон” легионерга катта пул тўлаётганини инобатга олган ҳолда, ўз бошимчалик қилдими?
Фарҳод Магомедовдан меҳмондўстлик!
Ўтган ҳафта шу ноаниқликка ойдинлик киритиш мақсадида барча "айбдорлар” билан суҳбатлашдик. Аслида ким айбдорлигини билиш қийинку, лекин тахмин қилса бўлади.
Келинг, бу ёғини ҳам бир бошидан бошласак. "Футбол-МЕД” раҳбари Муаззам Мелиева бу вазиятни қуйидагича изоҳлади:
- Целих ҳақиқатдан ҳам ёзги тиббий кўрикдан ўта олмаган. Шу боис, биз унга майдонга тушиш учун рухсат бермаганмиз. Лекин у иккинчи давранинг дастлабки икки турида ўйнабди. Бундан хабар топганимиздан кейин ПФЛга очиқ хат ёзиб, Целихни майдонга тушишга рухсат бермаслигини сўрадик. У энди яна даволанади ва қайтадан тиббий кўрикдан ўтади.
Бу ПФЛ ишонган шифокорнинг сўзлари, аниқ кўриниб турибдики, "Футбол-МЕД”нинг бу вазиятда умуман айби йўқ. Шу боис, ўтган ҳафта жума кунида ПФЛга йўл олдим. Чунки кимдир бу ҳолатга ойдинлик киритиб бериши лозим эди. Футболимиздаги энг одил ҳакам ПФЛ бўлганлиги учун, Целих масаласини Фарҳод Магомедовнинг ўзи ҳал қилиб беришига ишонгандим. Аммо барчаси аксинча бўлиб чиқди. Тушдан кейин ПФЛга етиб борганимда ишлар қизғин кетаётган экан. Тўғридан-тўғри Фарҳод Магомедовга учрашдим. Қизиғи, ПФЛ бош директори каминани остонада қабул қилиб, остонада хайрлашди. Мана сизга меҳмонга бўлган ҳурмат! Майли, ОАВ ходими эканлигим Фарҳод акага ёқмагандир, аммо меҳмон деган номим борку?! Хўп, бу ёғи бошқа масала, ПФЛ бош директорининг Целих масаласига ойдинлик киритмаганини кишини янада ажаблантирди. Келинг, қисқаса суҳбатимиздан сизни ҳам бохабар қиламан.
- Фарҳод ака, ман "FutGOL” газетасиданман, сиз билан суҳбатлашмоқчи эдим.
- Нима масала бўйича?
- "Андижон”нинг украинлик легионери Юрий Целих "Футбол-МЕД”нинг тиббий кўригидан ўта олмаган бўлса-да, иккинчи давранинг дастлабки турларида майдонга тушди...
- Бўлиши мумкинмас! Кейин бу хабарни қаердан олдингиз?
- Биз ҳам сизга ўхшаб ўзбек футболига хизмат қилиб юрибмиз. Бундай хабарлардан бохабар бўлишимиз табиий!
- Целихнинг қўлида тиббий кўрикдан ўтди, деган рухсатнома бор. У шунинг учун майдонга тушган.
- Лекин у рухсатномани "Футбол-МЕД”дан олмаганку?! Йил бошида "Футбол-МЕД”нинг тиббий кўригидан ўта олмаган футболчиларга майдонга тушишга рухсат йўқ дегандинглар.
- Айнан "Футбол-МЕД”нинг кўригидан ўтиш шарт деган гап йўқ. Кейин бу масалани улар билан ҳал қилинг.
- Унда нега йил бошидаги "Футбол-МЕД”нинг кўригидан ўта олмаган айрим футболчилар майдонга туша олмади. Масалан, "Насаф” ҳужумчиси Кенжа Тўраев?
- Билмадим. Нима гапингиз бўлса, "Футбол-МЕД”дагилардан сўранг!
Хуллас, бу вазиятга ПФЛ бош директори ҳам ойдинлик киритиб бера олмади ёки буни истамади.
Биз "Андижон” футбол клуби матбуот котиби Шуҳратбек Жўраевдан Юрий Целихнинг "Қизилқум”га қарши беллашувда нима сабабдан майдонга тушмаганлигини сўраганимизда, қуйидагича жавоб олдик.
- Билишимча, Целих Тошкентдаги тиббий кўрикдан ўта олмаган. Ҳозир у даволаняпти.
- Унда нега дастлабки икки турда майдонга тушди?
- Ҳайронман!
Кўрдингизми, матбуот котиб ҳам воқеаликдан тўла хабардор эмас. Чунки бу ишлар катталар ўртасида амалга оширилган!
Кимдир жазоланиши шарт! Ўша ким бўлади?
Энди биз билганимиз ва эшитганимиздан бохабар қиламиз. Целих ҳақиқатдан ҳам тиббий кўрикдан ўта олмаган. Чунки унинг юраги безовта қилган. Бу ҳақида Муаззам Мелиевага ҳам айтган. Бундан жамоа мутасаддиларининг ҳам хабари бўлиши аниқ. Тахминан, легионер футболчини клубга ёрдам бермасдан, захирада ўтириши расмийларга ёқмаган. Уни футбол ўйнашган мажбур қилишган. Аввало футболчи майдонга тушиб тўп тепиши учун "Футбол-МЕД”нинг рухсати керак, агар бу шўъба корхона рухсат бермаса ПФЛдан рухсат олса ҳам бўлади, фақат бундан шифохондагилар бехабар қолишса бўлди. Хуллас, вазият шундай бўлган. ПФЛда кимдир "Андижон” легионерига майдонга тушиш учун рухсат бериб юборган. Лекин бу аниқ Фарҳод Магомедов эмас! Чунки футболимиз раҳнамоларидан бири бундай иш қилишига ишониш қийин. Фарҳод ака, камина билан бўлган суҳбатда вазиятга ойдинлик киритишни истамаганини шундай тушиниш мумкин: у ҳам бу ишдан хабардор, фақат кимни айбдор қилишни билмаяпти. Сабаби, "Андижон” раҳбарларини айбдор қилай деса, Целихга ПФЛ рухсат берган, аниқроғи, унинг ишчилари. Қўл остидаги ишчиларни жазолай деса, бу ПФЛнинг обрўсига сабий таъсир қилиши аниқ. Қисқаси, вазият бир-бирига боғланиб кетган. Лекин барибир бу вазиятга кимдир жавоб бериши шарт! Аниқроғи, ПФЛдан ўша "маданиятли” инсон ишдан кетиши лозим. Акс ҳолда, бундай дилхираликлар давом этаверади.
Ёдингизда бўлса, 1-лига вакили "Дўрмон-Спорт” биринчи босқичнинг сўнгги турида жазоланганди. Сабаби, тўртта сариқ карточкаси бор Вадим Нигматуллин майдонга тушган, бу жамоага техник мағлубият ёзилишига олиб келди. "Андижон”даги ҳолатни ҳам шунга ўхшатиш мумкин. Иккинчи давранинг дастлабки икки турида "Футбол-МЕД”нинг рухсати бўлмаган футболчи майдонга тушган, демак, "Андижон”га ҳам техник мағлубият ёзилиши шарт! Акс ҳолда, клубларимиз очиқчасига бош кўтаришлари мумкин. Агар Фарҳод Магомедов таъкидлаганидек, ўйинчиинг қўлида қайси шифохонадан бўлишидан қатъий назар, тиббий рухсатнома бўлса, унда жамоаларимиз "Футбол-МЕД”нинг кўригидан ўтишлари шарт эмас! Демак, Целих даволанмасдан, кейинги турларда ҳам майдонга тушса бўлаверади. Агар ПФЛ ходимларидан кимдир "Андижон”га "махсус рухсатнома” берган бўлса, Фарҳод Магомедов у инсонни жазолаши керак. Ё «Андижон» регламентни бузгани учун икки учрашувига техник мағлубият ёзилсин. Ёки Фарҳод Магомедов ПФЛ ва "Футбол-МЕД” ҳамкорликда ишламайди десин. Қисқаси, биз ҳақиқат қарор топишини истаймиз! Ўйлаймизки, Фарҳод Магомедов яқин кунларда бу муаммога ойдинлик киритиб беради.
Фурқатбек Нишонов
Манба: «FutGOL» газетаси
|
|
Категория: Ўзбек футболи |
Просмотров: 596 |
Добавил: 11x11
| Рейтинг: 0.0/0 |
| |
 | |  |
|
