Халқаро футбол ташкилоти – ФИФА ҳозирда қаттиқ очарчилик ва турли касалликлардан азият чекаётган Африка қитъасидаги Сомали давлатига 1 миллион доллар миқдоридаги ёрдам пули ажратди. Маблағ Халқаро Қизил Ҳоч Қўмитаси ҳисобига ўтказиб берилади.

ХҚҲ қўмитаси ФИФА томонидан ажратилган пулларни тахминан учдан бир қисмини озиқ-овқат маҳсулотлари сарфлашни кўзлаган. Халқаро Қизил Ҳоч қўмитаси бу озиқ-овқат маҳсулотларидан бир ой давомида 25 000 минг оилани ёки бошқача айтганда 150 000 кишини қорнини тўйғазиш учун фойдаланади. Қолган маблағ ҳам мамлакатдаги аҳволни яхшилаш учун сарфланади.

ХҚҲ шу бир ой ичида Сомалининг 1 миллиондан ортиқ аҳолисига ёрдам кўрсатишни ўз олдига мақсад қилган. Ҳозирда мамлакатнинг жанубий ва марказий қисмларида аҳвол  жуда оғир.

ФИФА ўз вақтида Япония, Гаити, Покистон, Хитой, Чили ва 2004 йилдаги цунамидан кейин жанубий-шарқий Осиё мамлакатларига ҳам худди шундай гуманитар ёрдам берганди.