| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Август » 13 » Юрий Целих: «Мен «Андижон»га меҳмон бўлиб келмадим»
09:42 Юрий Целих: «Мен «Андижон»га меҳмон бўлиб келмадим» |
Биринчи даврани кутилган даражада ўтказа олмаган «Андижон» жамоаси ўйинни кучайтириш учун давралар оралиғида хорижлик икки нафар футболчини таркибга қўшиб олди. «Бургутлар» сафига келиб қўшилган тажрибали ҳужумчи Юрий Целих ўтган мавсумнинг биринчи ярмида «Навбаҳор» сафида тўп сурганини мухлислар яхши билишади. Айрим сабабларга кўра наманганликлар билан хайрлашган бу футболчи орадан бир йил ўтиб, яна Ўзбекистонда тўп суриш имкониятини қўлга киритди. «Андижон» билан ярим йиллик шартномага имзо чеккан Целих янги жамоасидаги илк учрашувни «Пахтакор»га қарши ўтказди ва бу баҳсда гол уришга муваффақ бўлди. Ўтган ҳафтада андижонликлар ўз уйларида «Олмалиқ»ни қабул қилишди. Тажрибали ҳужумчи мазкур ўйинда ҳам бошланғич таркибдан жой олди. Лекин бу сафар у рақиб дарвозасини ишғол қила олмади. Ўйин якунига етгач, биз клуб базасида украиналик футболчи билан учрашиб, бир нечта саволларимизга жавоб олдик.
Юрий, дастлаб бугунги ўйин ҳақидаги фикрингиз билан ўртоқлашсангиз. «Олмалиқ» сизда қандай таассурот қолдирди?
- Ҳар қандай жамоа ўз майдонида ўтадиган баҳсда албатта ғалаба қозониш учун майдонга тушади. Биз ҳам бугунги учрашувда уч очкони кўзлаб майдонга тушгандик. Лекин ҳавонинг иссиқлиги ҳар иккала жамоа аъзолари учун бир қанча муаммоларни келтириб чиқарди деб ўйлайман. Ўйиннинг биринчи бўлими тенг курашлар остида кечди. Танаффусдан сўнг майдондаги устунлик биз тарафга ўтди. Лекин бугун ҳужумда ишимиз юришмади. Кўпгина вазиятлардан унумли фойдалана олмадик. Олмалиқликларнинг ҳаракатлари менга ёқди. Айниқса бу жамоанинг ҳимоясини ёриб ўтиш биз учун қийин бўлди. Рақибимиз қарши ҳужумга таянган ҳолда тўп сурди. Лекин якуний ҳисоб майдонда ким яхшироқ тўп сурганини кўрсатиб берди. Ўйиннинг охиригача гол уришга ҳаракат қилдик ва бунинг учун муносиб тақдирландик.
- Ўтган турда рақиб дарвозасини ишғол қилгандингиз. Бу сафар бундай имкониятга эга бўлмадингиз. Бугунги ўйинингиздан кўнглингиз тўлдими?
- Футболчи майдонда қандай тўп сургани ҳақида мураббийлар фикр билдиришлари мумкин. Чунки айнан мураббийлар футболчининг ҳолатини яхшироқ билишади ва майдонда қандай ўйин кўрсатганини таҳлил қилишади. Мен ўзимнинг ҳаракатларимга баҳо бера олмайман.
- Маълумки сиз ўтган йилнинг биринчи ярмида «Навбаҳор» сафида тўп сургандингиз. Лекин давралар оралиғида наманганликлар билан хайрлашишга қарор қилгандингиз. Биздаги маълумотларга кўра, клуб билан молиявий масалаларда келиша олмаганингиз учун юртингизга қайтиб кетгансиз. Аслида ҳам шундайми ёки Наманганни тарк этишингизга бошқа сабаблар ҳам бўлганми?
- «Навбаҳор»дан кетишимнинг сабабларини кўпчилик яхши билади деб ўйлайман. Ўтган йили бу жамоага келишимиздан олдин бизга катта ваъдаларни беришганди. Афсуски, мавсумнинг биринчи ярми якунланганидан сўнг, клуб биз билан ҳисоб-китоб ишларини тўлалигича бажармади. Шу боис бир нечта шерикларим билан жамоани тарк этишга қарор қилдик. +изиғи ҳозир ҳам мазкур жамоа билан ҳисоб-китоб ишларимиз тўла якунига етмаган.
- Украинага етиб борганингиздан сўнг, «Закарпатье» билан шартнома имзолаганингизни биламиз. Бу жамоа билан қанча вақт бирга бўлдингиз?
- «Навбаҳор» билан хайрлашганимдан сўнг, узоқ вақт жамоасиз қолиб кетмадим. Украинага боргач, «Закарпатье» клуби раҳбариятидан таклиф тушди. Ўшанда мураббийлар жамоани олий лигага олиб чиқиш ниятида эканликларини ва менга умид билдиришаётганини айтишди. Натижада мен мазкур жамоа билан шартнома туздим. Бироқ учта ўйиндан сўнг клубда бош мураббий ўзгарди. Яъни менга ишонч билдирган мураббий клубдан четлаштирилди. Янги мураббий жамоада кескин ўзгаришларни амалга оширди. 10 нафар футболчи билан хайрлашмоқчи эканлигини очиқ айтди. Бу футболчилар орасида мен ҳам бор эдим. Шу тариқа «Закарпатье»да узоқ вақт қолиш насиб этмади. Ҳозир бу жамоа билан судлашмоқдамиз. Чунки клуб билан ҳал қилиб олишимиз керак бўлган айрим масалалар бор.
- «Закарпатье»да учта ўйинда майдонга тушган бўлсангиз, кейинги фаолиятингиз қандай кечди?
- Бу орада менга биринчи лиганинг бошқа бир вакили - «Букавина» жамоасидан таклиф тушди. Мен спорт формамни ушлаб туриш мақсадида шу клуб сафида ярим мавсум майдонга тушдим. Украина чемпионати куз-баҳор тизимида ўтади. Бизда янги мавсум эндигина бошланди. «Андижон» таклиф билан чиққанида эркин агентга айланиб бўлгандим. Шу боис яна бир марта юртингизда тўп суришга қарор қилдим.
- «Андижон»га сизни ким таклиф қилди?
- Мен билан жамоа вакиллари боғланишди ва клубга таклиф қилишди. Мени Александр Половков мураббийларга тавсия қилган экан. «Андижон»га ўтишимда Половков муҳим ўрин тутди деб айта оламан. Бундан ташқари Саша клубдаги вазият билан мени яқиндан таништирди. У жамоада муаммолар йўқлигини, ойлик маошлар вақтида берилишини айтиб ўтди. Шундан сўнг менда ҳам бу жамоага бўлган қизиқиш ортди.
- Бошқа жамоалар ҳам сизни ўз сафида кўриш учун таклиф билан чиқишдими?
- Бир нечта таклифлар бўлди. Буларнинг орасида украин ва ўзбек жамоалари ҳам бор эди. Қизиғи шундаки, Украинада дам олаётганимда менга «Навбаҳор»дан қўнғироқ қилишди. Лекин мен бу таклифга дарҳол рад жавобини бердим.
- Ўзбек футболи сиз учун бегона эмас. Ўтган йили «Андижон»га қарши майдонга тушгандингиз. Энди эса шу жамоа аъзосисиз. Ўтган вақт давомида клубда бирор ўзгаришни сездингизми?
- Мен «Андижон»га қарши учрашувда гол ургандим. Тақдир тақазоси билан энди мазкур клуб либосини кийдим. Нафақат «Андижон», балки юртингизда футбол жадаллик билан ўсиб бормоқда. Ўйлайманки, яқин вақт ичида ўзбек футболи юқори чўққиларни забт эта олади.
- Сиз ҳужумчисиз. Табиийки ишқибозлар сиздан голлар кутишади. Биринчи учрашувдаёқ гол урганингиздан кейин мухлислар яна ва яна бу ишни амалга оширишнигизни исташмоқда.
- Буни тўғри тушуниб турибман. Ўзим ҳам имкон қадар кўпроқ гол уриб жамоага фойда келтирган ҳолда клубимизнинг ашаддий ишқибозларини хурсанд қилмоқчиман. Сафарда ўтган учрашувда «Пахтакор»га гол урганимни ҳисобга олсак, меҳмондаги ўйинларда омадим келадиганга ўхшаб турибди. Энди сафарда «Қизилқум» дарвозасини ишғол қилишга уриниб кўраман.
З.НЕЪМАТОВ ва М.МАМАДАЛИЕВ суҳбатлашди
Манба: www.andijon-pfc.uz
|
|
Категория: Интервью |
Просмотров: 513 |
Добавил: 11x11
| Рейтинг: 0.0/0 |
| |
 | |  |
|
