Украинада бўлиб ўтган Лобановский хотира турнирида қатнашган Ўзбекистон олимпия терма жамоаси бош совринни қўлга киритди. Ҳал қилувчи ўйинда вакилларимиз мезбонларни пенальтилар сериясида мағлубиятга учратишди ва бош совринни Тошкентга олиб келишди.

Сербия устидан ғалаба

Биринчи куни ярим финалда Абрамов шогирдлари Сербия Олимпия терма жамоасини 2:0 ҳисобига доғда қолдиришди.  Учрашувнинг биринчи бўлимида ҳисоб очилмади. 55-дақиқада мураббийлар майдонга Шерзод Каримов ва Владимир Козакни туширишди. Ушбу ўзгариш олимпиячиларимиз ўйинига ўз таъсирини ўтказди ва орадан ҳеч қанча ўтмасдан ушбу футболчилар гол муаллифига айланишди.

Ўйин давомида Зотеев, Мустафоев, Нурлибоев сариқ карточка олган бўлсалар, ўйин сўнгида Ойбек Қиличев майдондан четлаштирилди. Таъкидлаш лозимки, "НБУ-Осиё" ҳужумчиси Нодир Одилов ҳам олимпия терма жамоаси сафида дебют қилди.

Ярим финалнинг иккинчи жуфтлигида Украина терма жамоаси Исроил устидан 3:0 ҳисобида зафар қучди.

Лобановский хотира турнири.

Ярим финал

ЎЗБЕКИСТОН О.Т.Ж – СЕРБИЯ О.Т.Ж - 2:0 (0:0)

Голлар: Шерзод Каримов 56, Владимир Козак 60

Ўзбекистон: Санжар Қувватов, Абдуқаҳҳор Ҳожиакбаров, Салим Мустафоев, Фаррух Нурлибоев, Ислом Тўхтахўжаев, Фозил Мусаев (Жавлон Иброҳимов 82), Дилшод Раҳматулаев (Нодир Одилов 64), Жасур Ҳасанов (Зоҳир Пиримов 82), Олег Зотеев (Шерзод Каримов 55), Темурхўжа Абдухолиқов (Ойбек Қиличев 64), Кенжа Тўраев (Владимир Козак 55).

Сербия: Васич (Кировски 46), Игновски (Катаи 56), Миланович, Маслач (Гудел 76), Настасич, Максимович, Крстичич, Мркела (Цакич 56), Кнежевич, Алексич (Кожич 73), Шепович.

Огоҳлантиришлар: Олег Зотеев, Салим Мустафоев, Фаррух Нурлибоев - Максимович, Мркела

Четлатиш: Ойбек Қиличев 90+2

9 август. Киев. В.Лобановский номидаги стадион. 50 томошабин.

Бош ҳакам: Эйтан Шмолекич (Исроил).

Пенальтилар сериясидаги омад

Ҳал қилувчи учрашув кутилганидек, шидатли ва кескин курашларга бой тарзда бўлиб ўтди. Биринчи ва иккинчи бўлимда томонлар ҳарчанд ўринишмасин таблодаги нолларни ўзгартириш насиб этмади. Ўйиннинг сўнгги дақиқасида мезбонлар жуда қулай имкониятдан фойдалана олишганида бош соврин Киевда қолган бўлармиди? Аммо бу вазиятда Бабирь яратилган имкониятни голга айлантира олмади.  Пенальтилар сериясида эса омад вакилларимизга кулиб боқди. Футбол лотореясида томонлар еттитадан тўп киритишди. Абдуқаҳҳор Хожиакбаров бизнинг саккизиничи голимизни киритди. Алексей Бабирь эса ўша саккизинчи зарбани голга айлантира олмади! Мочалов тўпни қайтарди.

Ўзбекистон олимпия терма жамоаси Валерий Лобановский хотираси учун ташкил этилган халқаро мусобақа ғолиби!

Ўйиндан сўнг ҳамюртларимиздан Ислом Тўхтахўжаевга мусобақанинг "Энг яхши ҳимоячиси” учун соврин, Шерзодбек Каримовга эса "Энг яхши ярим ҳимоячи” соврини топширилди.

Лобановский хотира турнири.

ФИНАЛ. 10 август

ЎЗБЕКИСТОН О.Т.Ж - УКРАИНА (U-21) - 0:0. Пен.сер: 8:7

Ўзбекистон: Виктор Мочалов, Акбар Исматуллаев, Абдуқаҳҳор Ҳожиакбаров, Салим Мустафоев, Шерзод Каримов (Нодиржон Одилов 74), Олег Зотеев (Владимир Козак 46), Жасур Ҳасанов, Жавлон Иброҳимов, Дилшод Раҳмутуллаев (Фозил Мусаев 46), Жасур Ҳасанов (Зоҳир Пиримов 46), Темурхўжа Абдухолиқов (Кенжа Тўраев 62).

Украина: Максим Коваль, Сергей Кривцов, Евгений Опанасенко, Дмитрий Хомченовский (Денис Гармаш 46), Кирилл Петров (Алексей Бобырь 46), Евгений Павлов (Юрий Путраш 46), Андрей Ткачук, Евгений Шахов (Виталий Виценец 46), Виталий Федотов (Дмитрий Еременко 58), Андрей Богданов (Ромен Безус 58), Дмитрий Гречишкин.

Огоҳлантиришлар: Виталий Федотов 21, Дмитрий Еременко 90.

Вадим Абрамов: "Бундай мусобақада ғолиб чиқиш биз учун ёқимли”

В.Лобановский хотира турнирининг финал ўйинидан сўнг олимпиячиларимиз устози  украиналик ҳамкасбларимизга турнир хусусидаги таассуротларини айтиб ўтди.

- Бундай мусобақада ғолиб чиқиш биз учун ёқимли. Ўйлашимча, ярим финалда яхшироқ ўйнагандик. Финалда озгина бизга омад кулиб боқди. Лекин ғалаба қандай бўлишидан қатъий назар, барибир ғалаба. Биз бу ерга турнир ғолиблигини қўлга киритиш учун келгандик. Қаторасига икки кун майдонга тушиш қийин. Украинларга эса бу борада осон эди. Чунки Павел Яковенконинг ихтиёрида кўплаб футболчилар бор эди.

- Нима деб ўйлайсиз асосий вақтда ғалаба қозонишинлар учун имконият бормиди?

- Ўйлашимча, ҳа. Фақат ўйиннинг охирида украиналикларда гол киритиш учун жуда қулай вазият бўлганди. Бироқ ўз навбатида бизда ҳам бир нечта имкониятлар бўлди. Ўйинчиларимга озгина тетиклик етишмади, шу сабабли улар менинг ҳужумга аталган бир кўрсатмаларимни охиригача бажара олишмади.

А. Деҳқонов тайёрлади