Киевнинг «Арсенал» жамоаси Украина чемпионатининг навбатдаги турида
Полтаванинг «Ворскла» клуби устидан зафар қучди. Жамоанинг голларидан бирига
ҳамюртимиз Максим Шацких муаллифлик қилди.
Учрашувдан сўнг украиналик журналистлар терма жамоамиз ҳужумчисидан
интервью олишди.
- Максим, «Ворскла»га қарши
баҳсда гол урдингиз. Ўйинингиздан ўзингиз ҳам қониқдингизми?
- Ҳеч қачон ҳаммаси идеал бўлмайди. Масалан биринчи бўлимда нима
қилишни билмай қолдик. Ўз дарвозамизга анча яқин ўйнадик. Самарали ҳужумларимиз
эса ғалабамизга сабаб бўлди. Улар худди режалаштирганимиздек амалга ошиди. Мен
гол урган вазиятда яхши комбинация бўлди.
- Бир сўз билан айтганда,
ўйин тақдири биринчи бўлим охирида ҳал бўлди. Мураббийингиз танаффусдан сўнг
нимани ўзгартиришни буюрди?
- Деярли ўзгаришлар бўлмади. Муҳими, ўйинни дарвозамиздан узоқроқда
олиб боришимиз керак эди. Рақиб жамоа сафида бўйдор ўйинчилар кўп. Демак,
ҳаводан ошириладиган тўплар айнан уларга йўналтирилади. Шу боис ҳам иккинчи
қаватда яхши ўйнашимиз талаб этилди. Тўғри, ўйин охирида кўнгилдагидек ҳаракат
қила олмадик. Аммо умумий натижа чакки бўлмади.
- Четлатишлар ҳаққоний
эдими?
- Биринчи қизил карточкада ҳакам ҳаммасини тўғри бажарди. Ҳақиқатдан
ҳам Алексей Курилов рақибига нисбатан қўпол ўйнади. Роман Безус четлатилган
вазиятда эса ҳакам бироз хатога йўл қўйди. Қоидага кўра орқадан қилинган
«подкат» сариқ карточкага тортади. Лекин ўша вазиятда футболчининг хавфли
ўйнаганини инкор эта олмайман. Сергей Симоненко иккинчи сариқ карточка олган
вазият ҳақида ҳам шундай дейиш мумкин. У рақиби билан тўқнашиб кетди. Уни ҳакам
жазоламаса ҳам бўлаверарди.
- Айни пайтда «Арсенал» бор
эътиборини натижага қаратмоқда...
- Ҳар нарсанинг яхши ва ёмон тарафлари бўлади. «Днепр» билан учрашувда
голлар кўп бўлди. Бу футбол мухлисларига ёқади. Афсуски, сўнгги дақиқаларда
ғалабани қўлдан берганимиз ачинарли бўлди. «Шахтёр» билан иккинчи бўлимда яхши
ўйнадик. «Черноморец» билан эса ўйинга яраша натижа бўлди. «Ворскла»га қарши
учрашувимизни муҳим деб атаган бўлардим. Айнан полтаваликлар ўтган мавсумда
бизни еврокубоклардан маҳрум қилишганди. Лекин ўша мағлубиятда ўзимиз
айбдормиз.
- Кейинги рақиб ҳақидаги
фикрингиз қандай? «Динамо» ва «Рубин» ўртасидаги учрашувни томоша қилдингизми?
- Қозонликлар ҳамиша шундай ўйин намойиш қилишади. Ўзларининг зерикарли
ўйинлари билан мухлисларни хурсанд қила олишмайди. Аммо уларда натижа бор.
Демак, бу тактикани қоралай олмаймиз. Бунинг устига бу усул нафақат Россия
чемпионатида, балки еврокубокларда ҳам қўл келмоқда.
- Янги бош мураббий Леонид
Кучук «Арсенал» ўйинига қандай ўзгариш олиб келди?
- Биринчи ўринда жамоани бирлаштирди. Бусиз натижага эришиб бўлмайди.
Шунингдек янги схемалар ҳам эндиликда бошқача. Аввал ҳимояланиб кейин ҳужумга ўтиш.
| 
