| Наш опрос |
| | |
 |
| Статистика |
|
Онлайн всего: 1 Гостей: 1 Пользователей: 0 | |
|
| Форма входа |
| | |
|
| Календарь |
| | |
|
| Архив записей |
| | |
|
|
 | |  |
| Главная » 2011 » Август » 29 » Ойбек Қиличев: Орзуим - миллий терма жамоа cафида тўп суриш
07:30 Ойбек Қиличев: Орзуим - миллий терма жамоа cафида тўп суриш |
Йил бошида «Андижон» клуби сафига қўшилган иқтидорли ярим ҳимоячи Ойбек Қиличев янги жамоаси сафида ёрқин ўйин намойиш этиб мухлисларнинг эътиборини қозона олди. Бундан ташқари Қиличев олимпия терма жамоамизнинг ҳам асосий таркиб футболчиси саналади. Профессионал фаолиятини Тошкентнинг «Трактор» клубида бошлаган ярим ҳимоячи қисқа давр ичида «Пахтакор» мураббийларининг эътиборига тушди. Ҳозирда андижонликлар сафида ижара асосида тўп сураётган жиззахлик футболчи спортчилар оиласида тарбия топган десак хато қилмаган бўламиз. Унинг дадаси Махмуржон ака Қиличев Жиззах вилояти иккинчи лигасида иштирок этувчи жамоаларда мураббийлик қилиб келмоқда. Катта стажга эга бўлган ишқибозларимиз ўз вақтида биринчи лига учрашувларини бошқарган ҳакам Комилжон Қиличевни яхши эсласалар керак. Комилжон ака Ойбекнинг амакиси бўлади ва айнан у ёш футболчининг мана шу даражага чиқишида алоҳида ўрин тутди. Ўтган ҳафтада биз «Андижон» клубининг базасида бўлиб ёш футболчи билан учрашдик ва унинг фаолияти ҳақида суҳбатлашдик.
БОЛАЛИГИ ҲАҚИДА
- Мен 1989 йилнинг 17 январида Жиззах вилоятининг Зафаробод туманида туғилганман. Бизнинг туманимиздан машҳур футболчилар етишиб чиқмаган. Лекин оиламизда спорт муҳити ҳукмронлик қиларди. Дадам ва амаким футбол билан мунтазам равишда шуғулланиб келишарди. Акаларим эса бокс билан банд бўлишган. Жаҳон чемпиони Рустам Саидов яқин қариндошим бўлса, акам Тўлқин Қиличев бокс бўйича терма жамоамизда фаолият олиб боради. Кўпчилик болалар сингари мен ҳам ёшлигимдан футбол ўйнашга қизиққанман. Болалигимда кўпроқ ўртоқларим билан кўчада тўп тепиб кунни кеч қилардик. Бундан ташқари бироз вақт бокс билан шуғулланишимга тўғри келган. Ким билади футболчи бўлмаганимда, балки боксчи бўлармидим? Кўпинча ўртоқларим билан кўчада бирга юрганимизда бокс ҳақида ҳам суҳбатлашардик. 5-синфни тамомлаганимдан сўнг туманимиздаги спорт мактабига ҳужжатларимни топшириб, ўша ерда ўқишни давом эттира бошладим. Мазкур мактабнинг футбол гуруҳида биринчи мураббийларим Улуғбек Жамолов ва Антон Сереберяковдан миллионлар ўйинининг дастлабки сир-асрорларини ўргандим. Тўрт йил давомида вилоят ва республика миқёсида ўтказилган турли турнирларда иштирок этдик. 9-синфни тамомлаганимдан сўнг амаким мени Тошкентга олиб кетишини айтди. Орадан бир неча кун ўтганидан сўнг биз пойтахтга келдик ва ТТЗ стадионида «Трактор» клубининг машғулотларини кузатдик. Шундан сўнг амаким мураббийлар билан гаплашиб, машғулотларда иштирок этишим мумкинлигини айтди. Шу тариқа «Трактор» клубига қабул қилиндим.
«ТРАКТОР»ДАГИ ФАОЛИЯТИ
- Катта футболга айни пайтда тарқалиб кетган «Трактор» клубида қадам қўйганман. 2006 йилнинг дастлабки ойида мен янги жамоамнинг машғулотларида иштирок этдим. Ўша пайтда бу клуб сафида бир қатор тажрибали футболчилар тўп суришарди. Ярим мавсум давомида ўринбосарлар жамоаси таркибида майдонга тушганимдан сўнг, мураббийлар асосий жамоа машғулотларида иштирок этишимга рухсат беришди. Машғулотлар давомида Нўъмон Ҳасанов, Тимур Айзатулов, Иброҳим Раҳимов, Дилшод Ўрмонов, Илҳом Мўминжонов ва Азиз Ашуров каби ўйинчилардан кўп нарсаларни ўрганишга муваффақ бўлдим. 2007 йилги чемпионатни эса тўлалигича асосий таркиб сафида ўтказдим. Мавсум якунига етгач, менга «Пахтакор» мураббийлари томонидан таклиф бўлди. Албатта ҳар бир ёш футболчи мамлакатимизнинг энг кучли клуби сафида майдонга тушишни орзу қилади. Шу боис мен ҳам бу таклифга ижобий жавоб қайтардим.
«ПАХТАКОР» КЛУБИДА
- «Пахтакор»га кўчиб ўтганимдан сўнг, фаолиятимда сезиларли ўзгаришлар юз берди. Энди мен ўз олдига жиддий мақсадларни қўйган жамоа сафида тўп сураётгандим. Шу боис машғулотларда икки ҳисса кўпроқ куч билан ишлашимга тўғри келди. Умуман олганда Сергей Ковшов ва Мурод Исмоилов олиб борган машғулотлар давомида зерикиб қолмасдик. «Пахтакор» сафида тўп суриш билан бирга кўплаб халқаро турнирларда иштирок этдим. Мисол учун Италияда ҳар йили ўтказиб келинадиган «Карнавал кубоги»да майдонга тушдим. Бироқ ўтган тўрт йил давомида асосий таркибда тўп суриш имконияти жуда кам бўлди. Тўғри, бу жамоада тўп суриб, бир қатор эсда қоларли дамларни ўтказдим. Ўринбосарлар жамоаси билан бирга кичик олтин медалларни қўлга киритган бўлсам, асосий таркиб билан мамлакат Кубогида зафар қучдик. Бундан ташқари чемпионатда иккинчи ўринни эгалладик. Лекин юқорида айтиб ўтганимдек, майдонда ўзим истагандек кўп вақт ҳаракат қила олмадим. Бу ёшимда захирада қолиб кетиш кейинги фаолиятимга салбий таъсир кўрсатиши мумкин эди. Шу боис мураббийлар билан келишган ҳолда ва ўйин амалиётига эга бўлиш учун бошқа жамоа сафида тўп суришга қарор қилдим. Йил бошида «Пахтакор» ва «Андижон» клублари раҳбарларининг келишувига кўра, бир йил давомида «Андижон» сафида майдонга тушадиган бўлдим.
АБРАМОВ ТЎҒРИСИДА
- Менинг фаолиятимда миллий терма жамоамизнинг ҳозирги устози Вадим Абрамов алоҳида ўрин тутади. «Трактор»га келганимда бу мураббий менга жуда кўп нарсаларни ўргатган. Ҳозирда олимпия терма жамоамиз сафида ҳам айнан Вадим Карленович қўл остида шуғулланмоқдаман. Абрамов ўзига хос характерга эга мураббийлардан. Машғулотларда ҳам бошқалардан ажралиб турадиган жиҳатлари кўп. Мисол учун у футболчилар билан тенгма-тенг ҳаракат қилади. Жарима тўплари, пенальтилар тепиш жараёнларида ҳам иштирок этади. Энг асосийси мураббийимиз жуда қувноқ инсон. Доимо футболчиларнинг кайфиятини кўтаришга ҳаракат қилади. Шу билан бирга ўйинчичиларнинг майдонда қай даражада ҳаракат қила олишини, имконияти қанчага етишини деярли тўғри топа олади. Бундан ташқари Абрамов таваккал қилишдан чўчимайди. Мен уни омадли мутахассис сифатида биламан.
ТЕРМА ЖАМОАЛАР
- Кўпчилик мени ёшлар терма жамоамиз мураббийларининг эътиборига «Пахтакор»да ўйнаб юрган вақтида тушган деб ўйлайди. Аслида ундай эмас. «Трактор» сафида тўп сураётганимда ёшлар терма жамоасининг бош мураббийи Аҳмад Убайдуллаев йиғинларга таклиф қилди. Шу тариқа мен ҳозирги олимпия терма жамоамизнинг машғулотларида иштирок эта бошладим. Тўғрисини айтсам, футболга кириб келган пайтимда терма жамоаларимизда тўп суришни асосий мақсад қилиб қўйгандим. Шунинг учун йиғинларда астойдил ишлаб, мураббийларнинг ишончини қозонишга ҳаракат қилдим. Дастлаб бир қатор халқаро турнирларда иштирок этдик. Кейин эса Осиё чемпионатида иккинчи ўринни эгаллаб жаҳон чемпионатига йўлланмани қўлга киритдик. Миср яшил майдонларида ўтказилган жаҳон чемпионатида иштирок этиб катта тажриба тўпладим. Айнан мана шу турнир давомида ўзим учун бир қатор хулосаларни чиқариб олдим. Одатда ёш футболчиларнинг характерларида мана шундай мусобақалардан кейин айрим ўзгаришлар кузатилади. Мен эса мана шу ҳолатни четлаб ўтишга ҳаракат қилдим. Ёшлар терма жамоамиз олимпия термасига айлантирилди. Олдимизда келгуси йили Лондонда ўтказиладиган Олимпиада баҳсларига йўлланмалардан бирини қўлга киритиш вазифаси турибди. Бу борада бизга осон бўлмаслигини ҳозирданоқ айтишим мумкин. Чунки гуруҳимизда кучли жамоалар жам бўлишган. Дастлабки ўйинни Ироққа қарши ўтказамиз. Саралаш учрашувларини муваффақиятли бошлаб олиш муҳим аҳамият касб этади. Шу боис Тошкентда ўтадиган ўйинда бутун эътиборимизни ижобий натижани қўлга киритишга қаратамиз. Умид қиламанки, йўлланмалардан бирини қўлга киритиш учун имкониятларимиз етади. Бу борада бизга Австралия ҳам, БАА ҳам асосий рақобатчи бўлиши мумкин. Лекин ҳар қандай жамоани енгиш мумкинлигини ўсмирлар терма жамоамиз исботлаб берди.
ГОЛЛАРИ ҲАҚИДА
- Фаолиятим давомида бир қатор голларга муаллифлик қилганман. Лекин уларнинг энг эсда қоларлисини «Андижон»га ўтганимдан кейин нишонладим. Бу йилги мавсумнинг ўз майдонимиздаги биринчи учрашувида «Сўғдиёна»ни қабул қилдик. Иккинчи бўлимнинг ўрталарига келиб меҳмонлар 1:0 ҳисобида олдинда боришаётганди. Вазиятни ўзгартириш учун гол керак эди ва бизда жарима тўпини тепиш имконияти юзага келди. Ўша зарбани мен бердим. Тўп эса дарвоза тўридан жой олди. Якунда биз 2:1 ҳисобида ғалаба қозондик. Бундан ташқари мазкур гол «Андижон»нинг бу йилги чемпионатдаги биринчи голи ҳам эди. Шунинг учун у менга қадрли бўлиб қолди. Дарвоқе, кўпчилик мендан жарима тўпларини тепиш учун алоҳида машғулотлар олиб боришим ҳақида сўрайди. Биринчи навбатда жарима тўпларини ўйинга киритишни ёки дарвозага йўллашни яхши кўришимни айтмоқчиман. Ҳақиқатдан ҳам жарима тўпларини тепиш борасида машғулотларда алоҳида дастур асосида иш олиб бораман. Шу билан бирга машғулотлардан кейин майдонда қолиб бироз муддат жарима тўпларини тепиш борасида ишлайман.
ОРЗУЛАРИ
- Ҳар қандай футболчи миллий терма жамоаси сафида жаҳон чемпионатида иштирок этишни орзу қилади. Шу қатори менинг ҳам энг катта орзуим бош жамоамиз билан жаҳон чемпионатида иштирок этишдан иборат. Бундан ташқари яқин вақт ичида Россия клублари сафида майдонга тушишни ҳам режаларимга киритиб қўйганман. Бу борада Одил Аҳмедовга ҳавас қиламан. Мен учун шарқий Осиё мамлакатлари чемпионатларида тўп суриш унчалик қизиқарли эмас. Россияда тўп суриш орқали тажриба ошириш ҳамда Европа клубларига йўл олиш имконияти кўпроқ бўлади деб ўйлайман. Бунинг учун менда вақт ҳам, имконият ҳам бор. Ўз вақтида менда Россияда тўп суриш учун яхшигина имконият бўлганди. «Пахтакор»да ўйнаётганимда «Рубин» селекционерлари юртимизга ташриф буюрдилар. Аниқ эсимда «Навбаҳор» ўринбосарларига қарши ўйинни кўриш учун Марат Мифтахутдинов ва «Рубин» вакили Наманганга келгандилар. Ўша ўйиндан кейин Марат ака менга «Рубин»нинг машғулотларида иштирок этиб синовдан ўтишим кераклигини айтди. Аммо айрим сабаблар туфайли Қозонга бора олмадим. Агар яна шундай имконият пайдо бўлса, бу сафар албатта ундан фойдаланаман.
БОШҚАЛАР ХУСУСИДА
- Бўш вақтим кам бўлади. Лекин бўш қолдим дегунча, машинамни миниб шаҳар айланишни ҳуш кўраман. Бундан ташқари футбол учрашувларини ҳам томоша қиламан. Айниқса Мадриднинг «Реал» клуби иштирокидаги ўйинларни ўтказиб юбормасликка ҳаракат қиламан. Чунки бу жамоанинг ашаддий мухлисиман.
Зафарбек Неъматов
ёзиб олди.
Манба: www.andijon-pfc.uz
|
|
Категория: Интервью |
Просмотров: 555 |
Добавил: 11x11
| Рейтинг: 0.0/0 |
| |
 | |  |
|
