Европа Суперкубоги

Барселона (Испания) – Порту (Португалия) – 2:0 (1:0)

Голлар: 1:0 – Месси (39), 2:0 – Фабрегас (88).

БАРСЕЛОНА: Вальдес, Дани Алвес, Маскерано, Абидаль, Адриано (Бускетс, 63), Иньеста, Хави, С. Кейта, Педро (Фабрегас, 80), Месси, Вилья (Санчес, 60).

ПОРТУ: Элтон, Роланду, Фусиле, Отаменди, Сэпунару, Моутинью, Гуарин, Соуза (Режес, 77), К. Родригес (Варела, 68), Халк, Клебер (Беллуски, 77).

Огоҳлантиришлар: К. Родригес (30), Иньеста (51), Роланду (65), Гуарин (82).

Четлатиш: Роланду (85), Гуарин (90).

Месси ниҳоят гол урди

Испаниянинг "Барселона” клуби мавсумни жуда омадли бошлади. Гвардиола шогирдлари ўн кун ичида иккита суперкубокни ўзларини қилиб олишди.

Европа суперкубоги учун кечган учрашувда каталонияликлар Европа лигаси ғолиби "Порту”ни доғда қолдиришди.

Учрашувни португалияликлар анча фаол бошлашди. Дастлабки 15 дақиқа ичида Халк ва Гуаринлар "Барса” дарвозаси олдида бир нечта хавфли вазиятларни вужудга келтиришди. Бироқ ҳар гал уларга аниқлик етишмади. Биринчи бўлим ўрталарига келиб устунлик секин-аста "Барселона” томонига ўтди. Энди каталонияликлар ҳам тез-тез Элтонни безовта қила бошлашди. Айтиш жоизки, шу куни "Порту” посбони ҳақиқий қаҳрамонга айланди.

Учрашувнинг 39-дақиқасига келиб ҳисоб очилди. Тиниб-тинчимас Гуарин ҳимоячиларга ёрдам беришга чоғланган бир пайтда хатога йўл қўйди. Унинг тўп оширишидан кейин Месси рақиб посбони билан ёлғиз қолди ва Элтонни қийинчиликсиз доғда қолдирди. Таъкидлаш жоизки, бу аргентиналик ҳужумчининг суперкубоклардаги биринчи голи саналади.

Фабрегаснинг деюбт голи

Иккинчи бўлим ҳам худди биринчиси каби "Порту”нинг шиддатли ҳужумлари билан бошланди. Бироқ вақт ўтиши билан ташаббус яна "Барса” томонига ўтди. Энди Гвардиола шогирдларининг ҳар бир ҳужуми жуда хавфли кўриниш олди. Аммо бу вазиятларда Элтон ўз маҳоратини намойиш этди. Барча майдонга "Барса”нинг янги ўйинчиси Фабрегаснинг тушишини кута бошлади ва Гвардиола "Арсенал”нинг собиқ сардорини 80-дақиқада майдонга туширди. Испания суперкубоги учун кечган баҳсда ҳам тўққиз дақиқа ҳаракат қилган Фарбрегас биринчи совринини қўлга киритганди. Бу гал эса Сеск саккиз дақиқа ичида деюбт голини киритди ва учрашув тақидирини ҳал қилди. Унга тўпни Месси ажойиб тарзда ўзатганди. Айтганча, шу куни "Порту”нинг икки нафар футболчиси бош ҳакам томонидан қизил карточка билан жазоланди.

Айтиш жоизки, шу куни "Барселона” асосий ҳимоячилар Пике ва Пуйолларсиз ҳам рақибдан устун келди ва Европа суперкубоги учинчи марта Испанияда олиб қолди. Маълумки, 2010 йилги суперкубокда Мадриднинг "Атлетико” жамоаси ғалаба қозонганди.